CHYUM LAIKA ka ai ni gaw, ga hkaw langai hpe sha kahtap htap ka chye ai. Lam masum hpe yu yu ga:

Ka ai prat. Moi na Israela prat hta masha law malawng, Jep Ai Tara laika hpe n madu ma ai. Nawku sum hta Israela yawng zuphpawng ai aten, Jep Ai Tara laika hti dan ai shaloi she madat lu ma ai. (Trj 31:10-12) Shawa hpawng ting, hkying hkum law law tsap nna madat ra ai majaw myit bra chye ai. (Neh 8:2, 3, 7) Dai majaw, ahkyak ai ga hkaw ni hpe kahtap htap tsun ya ai gaw, chyum ga yan ni hpe matsing na matu, hkan sa na matu loi shangun ai. Grau nna, Karai a rit kawp tara ni, tara dawdan ai lam ni zawn re ai, ahkri ahkrai chye ging ai lam ni hpe matsing shangun ai.—Jaw 18:4-22; Trj 5:1.

Ka hkrang. Chyum Laika a tsa lam shadang 10 daram gaw mahkawn ni re. Ga shadawn, Shakawn Kungdawn laika, Shawlumon mahkawn, sharung sharawt laika ni re. Kalang lang, mahkawn ni hta kahtap taw ai ga yan ni lawm chye ai. Kahtap taw ai ga yan ni gaw, mahkawn a madung lam hpe dan dawng shangun ai. Ga yan ni hpe matsing shangun ai. “Israela e, Yehowa hpe shamyet shanat nga u; Shi gaw, shanhte a karum ai wa hte n-gang rai nga ai. Arun a dap e, Yehowa hpe shamyet shanat nga u: Shi gaw shanhte a karum ai wa hte n-gang rai nga ai. Yehowa hpe hkrit hkungga ai ni e, Yehowa hpe shamyet shanat nga mu; Shi gaw, shanhte a karum ai wa hte n-gang rai nga ai” ngu ai Shakawn 115:9-11 kaw na ga yan ni hpe sadi yu u. Dai ga yan ni hpe kahtap mahkawn shagu, mahkawn hkawn ai ni a myit masin hta, manu dan ai tengman lam hpe bai myit hkrup na re.

Ka ai lam. Ahkyak ai ga hkaw ni hpe Chyum Laika ka ai ni kahtap htap ka chye ai. Ga shadawn, sai n sha na matu Israela ni hpe Mawshe kaw na, Yehowa matsun ai aten hta, hpa majaw n sha shangun ai lam hpe chyahkring hkring tsun dan ai. Hkum shan a asak gaw asai hta rawng nga ai. Asak gaw sai re ai hpe ahkyak shatai mayu ai majaw re. (Jaw 17:11, 14) Hpang de, Karai a sharawng awng ai lam lu na matu Hkristan ni koi ra na lam ni hpe, Yerusalem mare na kasa ni hte salang ni tsun dan ai aten hta mung, sai hpe koi na matu kahtap nna bai lawm wa ai.—Kas 15:20, 28-29.

Chyum Laika hta ga hkaw nkau gaw kahtap htap lawm ai. Raitim, Yehowa gaw dai ni hpe kahtap htap shakrai ai akyang nga shangun mayu ai lachyum gaw n re. Ga shadawn: “Nanhte akyu hpyi nga myit yang, . . . ga bai kahtap htap hkum rai nga myit” ngu Yesu tsun ai. (Mat 6:7) Karai Kasang myit ra ai akyu hpyi ga byin na matu, hpyi shalawm mai ai lam ni hpe tsun dan ai. (Mat 6:9-13) Akyu hpyi ga langai hpe sha kahtap htap n hpyi ai raitim, lam langai a matu ga baw dat nna chyahkring hkring hpyi mai ai.—Mat 7:7-11.

Chyum Laika hta, ga si, ga hkaw nkau kahtap htap lawm ai gaw, kaja ai yaw shada lam nga ai. Dai gaw, anhte akyu a matu Grau Htum Ai Sharin Achyin Ai Wa, sharin ya ai ladat langai re.—Esa 48:17, 18.