WANK sut ebʼ li xeʼxtzʼiibʼa chaq li Santil Hu nekeʼxye naabʼal sut jun li aatin. Kʼaʼut nekeʼxbʼaanu? Qilaq oxibʼ li naʼlebʼ li maare kiʼokenk:

Joqʼe kitzʼiibʼamank. Saʼ li najteril Israel naabʼalebʼ chaq ebʼ li poyanam moko wankebʼ ta rikʼinebʼ reetalil li Chaqʼrabʼ. Nekeʼrabʼi li naxye naq chixjunil li tenamit nekeʼxchʼutubʼ ribʼ re naq teʼxyaabʼasi saʼ li loqʼlaj naʼajej ut saʼ rochoch li Jehobʼa (Deut. 31:​10-12). Saʼ xkʼabʼaʼ naq chiru naabʼal li hoonal wankebʼ chi xaqxo chi rabʼinkil chixjunil li nayeemank, naru tqakʼoxla naq wank naabʼal bʼar naxik wiʼ xchʼoolebʼ (Neh. 8:​2, 3, 7). Saʼebʼ li hoonal aʼan, rabʼinkil naabʼal sut ebʼ li aatin li wank xwankil naxbʼaanu chaq naq teʼxjultika ut teʼxyuʼami. Ut aʼin qʼaxal wank xwankil naq naabʼal li naʼlebʼ naʼokenk chisaʼ, joʼ li xchaqʼrabʼ li Jehobʼa (Lev. 18:​4-22; Deut. 5:1).

Chanru kitzʼiibʼamank. Saʼ li Santil Hu wank naabʼal ebʼ li bʼich, joʼ eetalil, li hu Salmos, El Cantar de los Cantares ut Lamentaciones. Saʼ wiibʼ oxibʼ li bʼich wank li xyeebʼal wiʼ chik. Ebʼ li aatin aʼin nakʼanjelak re xkʼebʼal xwankil junaq li naʼlebʼ saʼ li bʼich ut re naq inkʼaʼ tchʼaʼajkoʼq xjultikankil. Re xtawbʼal chiʼus aʼin, qilaq li naxye Salmo 115:​9-11: «Ex ralal xkʼajol laj Israel, kawaq eechʼool rikʼin li Qaawaʼ: aʼan laj tenqʼahom qe, aʼan li naqakol wiʼ qibʼ! Ex ralal xkʼajol laj Aharón, kawaq eechʼool rikʼin li Qaawaʼ: aʼan laj tenqʼahom qe, aʼan li naqakol wiʼ qibʼ! Laaʼex li nekexiwa ru li Qaawaʼ, kawaq eechʼool rikʼin: aʼan laj tenqʼahom qe, aʼan li naqakol wiʼ qibʼ!». Naq junaq naxbʼicha li bʼich aʼin, chʼolchʼo naq nakanaak saʼ xchʼool.

Kʼaʼut kitzʼiibʼamank. Wiibʼ oxibʼ laj tzʼiibʼanel naabʼal sut nekeʼxye junaq li aatin xbʼaan naq jwal wankebʼ xwankil ut nekeʼraj xjultikankil. Jun eetalil, naq li Jehobʼa kixye rehebʼ laj Israel naq inkʼaʼ teʼxtzeka li kikʼ, kixbʼaanu naq laj Moisés naabʼal sut kixye rehebʼ kʼaʼut kikʼemank li chaqʼrabʼ aʼan. Li Yos kiraj naq tchʼolaaq chiruhebʼ naq li yuʼam re li yoʼyokebʼ wank saʼ li kikʼ, naraj naxye naq li kikʼ aʼan reetalil li yuʼam (Lev. 17:​11, 14). Naabʼal chihabʼ chirix aʼin naq ebʼ li apóstol ut ebʼ li cheekel winq re Jerusalén xeʼaatinak chirix li kʼaru tento tqatzʼeqtaana wi naqaj xsahobʼresinkil xchʼool li Yos, xeʼxye wiʼ chik li xwankil chirix inkʼaʼ xtzekankil li kikʼ (Hech. 15:​20, 29).

Usta li Santil Hu naxye naabʼal sut junaq li naʼlebʼ, aʼin moko naraj ta xyeebʼal naq li Jehobʼa naraj naq tqaye naabʼal sut junaq li aatin, chanchan tawiʼ ak xaqabʼanbʼil. Li Jesús kixye: «Naq tattijoq, moko taaye ta naabʼal sut jun ajwiʼ li naʼlebʼ» (Mat. 6:7). Joʼkan ajwiʼ, kiʼaatinak chirix naabʼal ebʼ li naʼlebʼ li naru tqaye saʼ li qatij li naxkʼam ribʼ rikʼin li rajom li Yos (Mat. 6:​9-13). Usta naq nokootijok chiru li Jehobʼa inkʼaʼ naqaye naabʼal sut jun li aatin, naru tooʼaatinaq chirix jun li naʼlebʼ naabʼal sut joʼ naqaj (Mat. 7:​7-11).

Qʼaxal chaabʼil naq li Santil Hu naxye naabʼal sut ebʼ li naʼlebʼ! Aʼan aʼin jun li naʼlebʼ li naroksi li Xnimal ru aj Kʼutunel re xkʼutbʼal chiqu junaq li naʼlebʼ re naq us tooʼelq (Is. 48:​17, 18).