OMAFIMBO amwe, ovashangi vOmbiibeli ova li va endulula omautumbulilo a faafana oshitya noshitya. Natu ka taleni omatomheno atatu kutya omolwashike ovashangi tashi dulika va ninga ngaho:

Pefimbo opo ya shangwa. MuIsrael shonale, ovanhu vahapu kava li ve na eekopi dopaumwene dOmhango. Ova li ashike hava udu Omhango, ngeenge oshiwana sha ongala pamwe ketwalihangano. (Deut. 31:​10-12) Otashi dulika pa li hapa kala omapiyaaneko, eshi tava pwilikine nove li ofika oule weevili dihapu ve li ongudu inene. (Neh. 8:​2, 3, 7) Peemhito da tya ngaho, okweendulula omautumbulilo a faafana okwa li hashi shi ningifa shipu kovanhu va dimbuluke omishangwa noku di tula moilonga. Okweendulula oitya yonhumba, okwa li unene haku va kwafele va dimbuluke oinima yonhumba, ngaashi omaufomhango nomatokolo aKalunga. — Lev. 18:​4-22; Deut. 5:1.

Onghedi omo ya shangwa. Eepelesenda 10 lwaapo dOmbiibeli oda shangwa momaimbilo, mwa kwatelwa omambo Omapsalme, Eimbilo laSalomo nosho yo Omaimbilokemo. Omafimbo amwe, omaimbilo okwa kwatela mo oitya oyo ye liendulula. Osho ohashi divilike enenediladilo leimbilo nohashi kwafele ovapwilikini va koneke momutwe eendjovo. Pashihopaenenwa, didilika eendjovo odo tadi hangwa mEpsalme 115:​9-11, KB-13, tadi ti: “Israel, ove, lineekela Omwene! Oye ekwafo loye noshikelelifo shoye. Ovaneumbo laAron nye, lineekeleni Omwene! Oye ekwafo leni noshikelelifo sheni. Ava hamu tila Omwene, lineekeleni Omwene! Oye ekwafo leni noshikelelifo sheni.” Okweendulula eendjovo odo okwa kwafela ovaimbi va kaleke momitima davo omadiladilo oo a fimana.

Oya shangwa, opo i divilike oinima ya fimana. Omafimbo amwe, ovashangi vOmbiibeli ova li hava endulula omautumbulilo a fimana. Pashihopaenenwa, eshi Jehova a li a lombwela Ovaisrael vaha lye ohonde, okwa li a lombwela Moses a endulule etomheno lwoikando ihapu. Kalunga okwa li a hala okudivilika kutya omwenyo wombelela ou li mohonde, sha hala kutya, ohonde oi lile po omwenyo. (Lev. 17:​11, 14) Lwanima, eshi ovayapostoli novakulunhu vomuJerusalem va shanga kombinga yoinima oyo Ovakriste va pumbwa okuhenuka, opo va hafife Kalunga, ova li va divilika natango omhumbwe yokulikaleka kokule nohonde. — Oil. 15:​20, 29.

Nonande Ombiibeli oye liendulula, osho inashi hala kutya Jehova okwa hala tu kale tu na onghedindjikilile yokweendulula omautumbulilo Ombiibeli. Pashihopaenenwa, Jesus okwa ti: “Ngeenge to ilikana, ino endulula oinima ya faafana.” (Mat. 6:7) Opo nee okwa tumbula oinima oyo hatu dulu okwiilikana kombinga yayo, oyo i li metwokumwe nehalo laKalunga. (Mat. 6:​9-13) Onghee nonande ihatu endulula oitya ya faafana momailikano etu, otwa manguluka okwiilikana kombinga yoshinima sha faafana lwoikando. — Mat. 7:​7-11.

Eendjovo daKalunga da nwefwa mo oda endulula oitya nomautumbulilo onhumba omolwomatomheno mawa. Oyo oi li onghedi imwe yomeenghedi dimwe dihapu omo Omuhongi wetu munenenene he tu hongo, opo tu mone ouwa. — Jes. 48:​17, 18.