BIIBILIMIK allattut ilaasa oqaaseqatigiit assigiimmik allattarpaat. Tamatumunnga pissutaasinnaasut pingasut sammeriartigit.

Qanga allanneqarnera. Itsaq Israalimi inuit amerlanersaasa inatsisinik allaqqitat piginngilaat. Inatsisit atuarneqarnerat pingaartumik inuiaqatigiit guutisiorfimmi katersuuk­kaangamik tusarnaar­tarpaat. (Mos 5. 31:10-12) Inuppassuit piffissami sivisuumi nikorfallutik tusarnaartarput avatangiisiminnillu akornusersor­neqartas­sagunarlutik. (Neh 8:2, 3, 7) Pisuni taamaattuni oqaaseqatigiit pingaarnerit uteqattaar­neqartaramik eqqaamajuminar­nerullutillu maleruaruminar­nerusarput. Aamma inatsisini Guutip tunniussaani oqaatsit aalajangersimasut uteqattaar­neqartarmata annikitsualut­tortaat eqqaamasin­naanerusarpaat. – Mos 3. 18:4-22; Mos 5. 5:1.

Allattariaaseq. Biibilip erinarsugas­siarpassuit – soorlu Tussiaatit, Erinarsugassiat Pingaar­nersaat aamma Upputit – imarai. Erinarsuutit ilaat uteqattaar­tagartaqarput. Tamatuma erinarsuummi sammineqartoq erseqqis­sartarpaa tusarnaar­tunullu alanngaaruminar­nerusarluni. Assersuutigalugu Tussiaat 115:9-11 oqaatsit uku maluginiakkit: “Israeli, Naalagaq tatigiuk! Taanna ikiortigaat eqqortin­naveeqqutigalugulu. Aronikkut, Naalagaq tatigisiuk! Taanna ikiortigaat eqqortin­naveeqqutigalugulu. Guutimik mianerin­nittusi, Naalagaq tatigisiuk! Taanna ikiortigaat eqqortin­naveeqqutigalugulu.” Oqaatsinik uteqattaarinermi sallusuissutit erlinnartut erinarsortut uummammiuliun­nerusarpaat.

Pingaar­nerusunik erseqqissaaneq. Biibilimik allattut ilaannikkut pingaar­nerusunik uteqqiisarput. Assersuutigalugu Jehovap Israalikkunnut aattoqqusin­nginneranut pissutaasoq Moorsisip arlaleriarluni uteqqittarpaa. Guutip erseqqis­sarusuppaa uinngup uumassutaa aammiittoq, tassa aak inuunermut assersuutaasoq. (Mos 3. 17:11, 14) Kingusin­nerusukkut apustilit utoqqaanertallu Jerusalem­mimiittut Guutimut iluarisaajuarumallutik kristumiut suna ingalas­simassagaat pillugu allakkamik aammik itigartitsinissaata pingaaruteqassusia erseqqis­saqqippaat. – ApS 15:20, 29.

Biibilimi oqaatsit uteqattaar­neqaraluartut imaanngilaq Jehovap kissaatigigaa Biibilimi oqaatsinik issuaaqat­taarneq ileqquliutis­sagipput. Jiisusimi oqarpoq: “Qinugaangassi … oqaatsisi uteqattaar­tassanngilasi.” (Mat 6:7) Taamatut oqareerluni Guutip iluarisai qinnutigisin­naasagut arlallit eqqaavai. (Mat 6:9-13) Tassa qinnutitsinni oqaatsit uteqattaan­ngikkaluarlugit qinnutigisagut uteqqat­taarsin­naavagut. – Mat 7:7-11.

Biibilimi oqaatsit oqaaseqatigiillu aalajangersimasut uteqattaar­neqarnerannut pissutis­saqarluarpoq. Taamaaliornikkut Ilitsersuisorsuatta iluaqutigisatsinnik ilinniar­tippaatigut. – Es 48:17, 18.