NIVÎSKARÊN Kitêba Pîroz cara hine gotinên xwe, xeber bi xeber diwekilandin. Gelo çira? Were em dîna xwe bidine van sê meniya, ku dibeke çira wana usa dikir:

Kengê hate nivîsarê? Wedê berê, nivîsarên Qanûna Mûsa destê gelek Îsraêliyada tune bûn. Çaxê cimet ber konê pîroz top dibû, Qanûn dihate xwendinê, û geleka gotinên Qanûnê tenê hingê dibihîstin (Qanûna Ducarî 31:10-12). Ewana nav elaleteke mezinda bi siheta piya disekinîn, lema jî diqewime wanra hêsa nîbû, ku rind guh bidin (Nehemiya 8:2, 3, 7). Wextên usada, wekilandina fikirên ferz alî guhdara dikir, wekî rêza bîra xweda xwey kin û bidine xebatê. Wekilandina hine xebera alî wan dikir, ku ewana qanûnên Yehowa bîr nekin (Qanûna Kahîntiyê 18:4-22; Qanûna Ducarî 5:1).

Çawa hate nivîsarê? Hine parên Kitêba Pîroz ça kilam hatine nivîsarê, mesele Zebûr, Stirana Silêman û Lûrînên Yêremya. Hine kilamada gotin têne wekilandinê, yên ku fikirên sereke dubare dikin û alî guhdara dikin, wekî ew gotinên kilamê ezberî hîn bin. Mesele, dîna xwe bide gotinên ji Zebûr 115:9-11: “Gelî Îsraêlîya! Xudanda guman bin, Ew e komekdar û mertala we. Mala Harûn! Xudanda guman be, Ew e komekdar û mertala we. Gelî Xwedêxofa! Xudanda guman bin, Ew e komekdar û mertala we”. Bi saya wekilandina hine gotina, fikirên kilamê hêsa digihîştin hiş û dilê kilambêja.

Çira hate nivîsarê? Nivîskarên Kitêba Pîroz carna gotinên ferz dubare dikirin. Mesele, Yehowa Îsraêliyara got ku gerekê ewana xûnê nexwin, û ewî meniya vê qanûnê bi saya Mûsa çend cara wekilandibû. Yehowa dixwest, wekî cimet rind fem ke, ku xûn jîyîn tê hesabê (Qanûna Kahîntiyê 17:11, 14). Çend qirne şûnda, gava şandiyên Îsa û rûspiyên li Orşelîmê besa tiştên ku li Xwedê xweş nayên, kirin, wana dîsa got ku gerekê xwe ji xûnê dûr bigirin (Karên Şandiya 15:20, 29).

Lê Yehowa nedixwest ku wekilandina hine rêza û gotina bibe edet. Mesele, Îsa got: “Duayên xweda eynî xebera dîsa û dîsa [newekilînin]” (Metta 6:7). Paşê, ewî zelal kir ku em dikarin bona çi dua bikin (Metta 6:9-13). Lema jî gerekê em duayên xweda her gav eynî xebera nedine xebatê, lê hemikî em dikarin eynî têma biwekilînin (Metta 7:7-11).

Meniyên baş hene, ku Kitêba Pîrozda hine gotin têne wekilandinê. Yehowa bi vî cûreyî rêberiya me dike, çi ku her tim bona kara me ye (Îşaya 48:17, 18).