BAFUNDIL BIBL baakady bambulul misang yikwaabw mwaak ku mwaak. Tukontononaay tubingil tusat twaakady mwa kwiikal tusak bafundil Bibl bwa kulong nook:

Ciisang cimufundilobw. Mu Izaleel wa kal, baat bavul kabaakadyoh bend ni mikand ya may ma Mawej. Baakady civul bumvw may ma Mawej haakadyobw biikongakeen haakaabumw ku mutand a kukongakeen. (Mmu. 31:10-12) Misang yikwaabw baakady batum meej maabab kwa bituh bwaal baakady bumvw ni biimanakan kwiiwul mutancy muleeh mukacy mwa baat ba biyool. (Neh. 8:2, 3, 7) Mu biisang bya nook, kwambulul kwa myaak ya buseeb kwaakady mwa kwambulwiish baat bwa kuvuluk biheehel may ma Mawej ni kwiimakooyel. Kwambulul kwa myaak kaahand, kwaakady mwa kwiibambulwiish nang-nang bwa kuvuluk may ma Mawej maakadyobw biibumvwiij.—Leev. 18:4-22; Mmu. 5:1.

Mushind waakadyobw bamufund. Mu Bibl mudy misambw yivul—mudy: mukand a Misambw, Musambw muhit kulengel, ni Kudilakan. Misang yikwaabw misambw yaakady ni may ma kuhunguluj naam (refrain) maakady mumvwiij, musambw woos ni mambulwiish baat baakady biiyumvw bwa kukwaat may ma misambw aay. Cileejel, tal bu may matusaasangan mu Misambw 115:9-11: “Nun, bis bya Izaleel, teekaay mucim iinun woos teng kudy Mawej [Yehow]—Ciikuul aababw ni ngabw aababw, i yiy! Nzubw Aaron, teek mucim iibuh woos kudy Mawej [Yehow]—Ciikuul aababw ni ngabw aababw, i yiy! Nun baciinciin Mawej[Yehow], teekaay mucim iinun woos kudyey.—Ciikuul aababw ni ngabw aababw, i yiy!” Kwambulul kwa may aam, kwaakady mwa kwambulwiish baakady bumb misambw bwa kukwaatobw may malengel aam ku micim.

Kwiimanyin ha myand yitam. Misang yikwaabw baat bafundil Bibl baakady bambulul byambil bya buseeb. Cileejel, Haakady Yehow mwambil bin Izaleel bwa kulekobw kudy mash, wambiil Moyiz bwa kwambululey kabingil ka mukenj oow misang misang. Mawej waakady mukat kutookeshel biin Izaleel neey: buumy bwa ciit cyoos budy mu mash, nook, mash maleeleej buumy. (Leev. 17:11, 14) Kuunyim, haakady bapostol ni bakul ba ku Yeruzalem bafundil biin Krist bwa myand yaakadyobw ni bwa kulek bwa kusangej Mawej, Baleebel cikwaabw eey: bikaam kulek kudy mash.—Yil. 15:20, 29.

Ning mudyobw bambulul byambil kaahand mu Bibl, biinaaby kabiish byumvwiij neey Yehow ukaakaam neey twiikal ni ciibidil cya kwambulul byambil bya mu Bibl. Cileejel, Yeez uleebel neey: “Hawuloolomb Mawej, kwambululoh bend may mamw-mamw.” (Mat. 6:7, NWT) Ni uleejel myand yitudy mwa kulomb yiiheehetangan ni lukat lwa Mawej. (Mat. 6:9-13) Ning mutuleelek kwambulul myaak yumw-yumw misang ni misang mu masambil miitut, tudy ni mushind a kulomb bwa bwaal bumw-bumw oobw misang ni misang.—Mat. 7:7-11.

I bwa tubingil tulengel hadyobw bambulul yimw myaak ni bimw byambil mu Diiy dya Mawej. Wiinoow i umw wa ku mishind yivul yidy Mulongweesh iitut mutam wiitulongweesh bwiitut kuhet musangal.—Ye. 48:17, 18.