WAN wan tɛm, di wan dɛn we rayt di Baybul bin de ripit di sem wɔd dɛn. Lɛ wi tɔk bɔt tri rizin dɛn we go dɔn mek di wan dɛn we rayt di Baybul bin de du dat:

Di tɛm we dɛn bin rayt di Baybul. Insay di Izrɛlayt dɛn tɛm, bɔku pipul dɛn nɔ bin gɛt dɛn yon skrol usay di Lɔ bin de. Bɔku tɛm, na we ɔlman gɛda na di tabanakul ɛn na di tɛmpul na in dɛn kin yɛri we dɛn de rid di Lɔ. (Dit. 31:​10-12) I go mɔs bi se tin dɛn de we bin de tek dɛn atɛnshɔn we dɛn bin de lisin ɛn tinap fɔ lɔng tɛm na krawd. (Nɛi. 8:​2, 3, 7) Dɛn tɛm dɛn de, we dɛn de ripit impɔtant wɔd dɛn, i go dɔn mek i izi fɔ di pipul dɛn fɔ mɛmba di skripchɔ dɛn ɛn aplay dɛn. We dɛn de ripit patikyula wɔd dɛn, dat go dɔn ɛp di pipul dɛn fɔ mɛmba tin dɛn bɔt di lɔ dɛn we Jiova dɔn gi dɛn.—Lɛv. 18:​4-22; Dit. 5:1.

Aw dɛn bin de rayt. Dɛn rayt sɔm pat dɛn na di Baybul as siŋ dɛn; fɔ ɛgzampul Sam, Sɔlɔmɔn in Siŋ, ɛn Lamɛnteshɔn. Sɔntɛnde, dɛn bin de ripit sɔm wɔd dɛn insay di siŋ. Dis bin de ɛp pipul dɛn fɔ no wetin di siŋ de bɔt ɛn fɔ sabi di wɔd dɛn ɔfɛd. Fɔ ɛgzampul, notis di wɔd dɛn we de na Sam 115:​9-11 we se: “E Izrɛl, abop pan Jiova; na in de ɛp una, ɛn in na una shild. E Erɔn in famili, una abop pan Jiova; na in de ɛp una, ɛn in na una shild. Una we de fred Jiova, una abop pan Jiova; na in de ɛp una, ɛn in na una shild.” We dɛn de ripit dɛn wɔd dɛn ya, dat go dɔn ɛp di wan dɛn we bin de siŋ fɔ kɔntinyu fɔ tink bɔt dɛn fayn wɔd dɛn de.

Fɔ tɔk mɔ bɔt impɔtant tin dɛn. Sɔntɛnde, di wan dɛn we bin rayt di Baybul bin de ripit impɔtant wɔd dɛn. Fɔ ɛgzampul, we Jiova bin tɛl di Izrɛlayt dɛn nɔ fɔ it blɔd, i bin mek Mozis ripit di rizin we mek dɛn nɔ fɔ du dat bɔku tɛm. Gɔd bin want dɛn fɔ no se na insay di blɔd di layf de, we min se blɔd tinap fɔ layf. (Lɛv. 17:​11, 14) Leta we di apɔsul dɛn ɛn di ɛlda dɛn na Jerusɛlɛm bin de tɛl Kristian dɛn wetin dɛn fɔ avɔyd fɔ lɛ dɛn nɔ mek Gɔd in at pwɛl, dɛn bin tɔk bak bɔt di rizin we mek dɛn nid fɔ avɔyd blɔd.—Akt 15:​20, 29.

Pan ɔl we di Baybul kin ripit sɔm wɔd dɛn, i nɔ min se Jiova want wi fɔ mek am abit fɔ ripit di sem wɔd dɛn we de na di Baybul. Fɔ ɛgzampul, Jizɔs bin tɔk se: “We yu de pre, nɔ se di sem tin igen ɛn igen.” (Mat. 6:7) Dɔn i tɔk bɔt tin dɛn we wi kin pre fɔ we gri wit wetin Gɔd want. (Mat. 6:​9-13) So pan ɔl we wi nɔ kin ripit di sem wɔd dɛn igen ɛn igen we wi de pre, i nɔ bad fɔ lɛ wi tɔk bɔt di sem tɔpik dɛn igen ɛn igen.—Mat. 7:​7-11.

So gud rizin dɛn de we mek dɛn ripit sɔm patikyula wɔd dɛn insay Gɔd in Wɔd. Dis na wan pan di bɔku we dɛn we wi Ticha we Pas Ɔl Ɔda Ticha Dɛn de tich wi fɔ bɛnifit wisɛf.—Ayz. 48:​17, 18.