လၢလံာ်စီဆှံအပူၤန့ၣ် တဘျီတခီၣ် ပှၤကွဲးလံာ်စီဆှံဖိ ကွဲးဖျါထီၣ်က့ၤ တၢ်ဂ့ၢ်တခါလီၢ်လီၢ် အဘျီအါမး. ဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်န့ၣ် ပကကွၢ်သကိး တၢ်ဂ့ၢ်သၢထံၣ်–

ပှၤကွဲးဝဲ အဆၢကတီၢ်ဖဲလဲၣ်. လၢညါ ဖဲပှၤအံၣ်စရ့လးဖိ အစိၤန့ၣ် ပှၤအါတက့ၢ် တအိၣ်ဒီး လံာ်တၢ်သိၣ်တၢ်သီလၢ အနီၢ်ကစၢ်အဂီၢ်ဘၣ်. အါတက့ၢ် အဝဲသ့ၣ် မ့ၢ်ပာ်ဖှိၣ်ထီၣ်သးတပူၤဃီလၢ ဒဲစီဆှံမၣ် အဝဲသ့ၣ်နၢ်ဟူဘၣ် ပှၤဖးလံာ်တၢ်သိၣ်တၢ်သီ. (၅ မိၤ ၃၁:၁၀-၁၂) ဒီးဖဲအဝဲသ့ၣ် ဆၢထၢၣ်ဒိကနၣ်တၢ် တဘျုးနၣ်ရံၣ် ဒီးဆၢထၢၣ်ဝဲလၢ ပှၤအါဂၤအကျါအခါ တၢ်လၢကမၤတံာ်တာ် အဝဲသ့ၣ်န့ၣ် ကအိၣ်ဝဲစ့ၢ်ကီး (ဃ့ ၈:၂, ၃, ၇) အဃိ ဖဲတၢ်ကဲထီၣ်သးဒ်န့ၣ်အခါ ပှၤမ့ၢ်ဖးဖျါထီၣ်က့ၤ တၢ်ဂ့ၢ်တခါလီၢ်လီၢ် အဘျီအါမးန့ၣ် ပှၤဂီၢ်မုၢ်လၢ အဒိကနၣ်တၢ်တဖၣ် တိၢ်နီၣ်ဘၣ်ကညီ ဒီးမၤထွဲဝဲကညီ. တကးဒံးဘၣ် ကမၤစၢၤအဝဲသ့ၣ်ဒ်သိး အကနီၣ်ဘၣ်က့ၤ ယဟိဝၤယွၤ အတၢ်သိၣ်တၢ်သီ ဒီးအတၢ်မၤလိာ်တဖၣ်.—၃ မိၤ ၁၈:၄-၂၂; ၅ မိၤ ၅:၁.

ပှၤကွဲးဝဲ အကျိၤအကျဲဒ်လဲၣ်. လံာ်စီဆှံအကူာ်တနီၤ ဒ်သိးဒီး စံးထီၣ်ပတြၢၤ, တၢ်သးဝံၣ်တဖၣ်အတၢ်သးဝံၣ် ဒီးသးသယုၢ်တၢ်န့ၣ် ပှၤကွဲးဝဲ အကျိၤအကျဲ ဒ်သိးဒီး ပှၤကွဲးတၢ်သးဝံၣ်. ဒီးတဘျီတခီၣ် ဖဲပှၤကွဲးတၢ်သးဝံၣ်အခါ ပှၤသူဝဲ တၢ်ကတိၤတဖျၢၣ်လီၢ်လီၢ် အဘျီအါမး. အဃိ အမၤစၢၤပှၤဒ်သိး ပှၤကသ့ၣ်ညါထီၣ် တၢ်သးဝံၣ်အတၢ်ဂ့ၢ်မိၢ်ပှၢ် ဒီးပှၤတိၢ်နီၣ်ဘၣ်အီၤ ကညီအဂီၢ်. အဒိ ပကကွၢ်သကိး တၢ်ကတိၤဖဲ စံးထီၣ်ပတြၢၤ ၁၁၅:၉-၁၁ လၢအတဲဝဲလၢ “အိ အံၣ်စရ့လးသ့ၣ်ဧၢ, နာ်န့ၢ် ယဟိဝၤယွၤတက့ၢ်. အဝဲမ့ၢ်ပှၤလၢ အမၤစၢၤသု ဒီးအမ့ၢ်သုကတီၤလီၤ. အိ စီၤအၤဟရိၣ် အစၢၤအသွဲၣ်သ့ၣ်ဧၢ, နာ်န့ၢ် ယဟိဝၤယွၤတက့ၢ်. အဝဲမ့ၢ်ပှၤလၢ အမၤစၢၤသု ဒီးအမ့ၢ်သုကတီၤလီၤ. သုဝဲလၢအပျံၤ ယဟိဝၤယွၤသ့ၣ်ဧၢ, နာ်န့ၢ် ယဟိဝၤယွၤတက့ၢ်. အဝဲမ့ၢ်ပှၤလၢ အမၤစၢၤသု ဒီးအမ့ၢ်သုကတီၤလီၤ.” ခီဖျိလၢ ပှၤကွဲးဖျါထီၣ်က့ၤ တၢ်ကတိၤတဖျၢၣ်လီၢ်လီၢ် အဃိ ပှၤသးဝံၣ်တၢ်ဖိတဖၣ် တိၢ်နီၣ်ဃာ် တၢ်ကတိၤလၢ အလုၢ်ဒိၣ်ပှ့ၤဒိၣ်တဖၣ်န့ၣ် ညီဝဲ.

ပှၤကွဲးဖျါထီၣ် တၢ်ဂ့ၢ်တခါလီၢ်လီၢ် ဒ်သိး ပှၤကပာ်ဖျါထီၣ်တၢ်ဂ့ၢ်လၢ အရ့ဒိၣ်အဂီၢ်. တဘျီတခီၣ်န့ၣ် ပှၤကွဲးလံာ်စီဆှံဖိ ကွဲးဖျါထီၣ်က့ၤ လံာ်ကျိၤလၢ အရ့ဒိၣ်တဖၣ်. အဒိ ဖဲယဟိဝၤယွၤ မၤလိာ်ပှၤအံၣ်စရ့လးဖိလၢ တဘၣ်အီၣ် တၢ်သွံၣ်ဘၣ်အခါ အမၢစီၤမိၤၡ့ တဲဖျါထီၣ်က့ၤ တၢ်ဂ့ၢ်တခါန့ၣ် တဘျုးဘျီညါ. ယဟိဝၤယွၤ အဲၣ်ဒိး ဒုးသ့ၣ်ညါအဝဲသ့ၣ် တၢ်ဂ့ၢ်အရ့ဒိၣ်လၢ သးသမူန့ၣ် အိၣ်လၢတၢ်သွံၣ်အပူၤ ဒီးတၢ်သွံၣ်န့ၣ် အမ့ၢ်ဝဲ တၢ်သးသမူ. (၃ မိၤ ၁၇:၁၁, ၁၄) လၢခံ ဒ်သိးခရံာ်ဖိတဖၣ် ကမၤတၢ်လၢ အဘၣ်ကစၢ်ယွၤအသးအဂီၢ် တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ်လၢ ဝ့ၢ်ယရူၤၡလ့ၣ်အပူၤ ကွဲးဖျါထီၣ်ဝဲ ဘၣ်ဃးဒီး တၢ်လၢအဝဲသ့ၣ် ကဘၣ်ဟးဆှဲးဝဲ. ဒီးအဝဲသ့ၣ် တဲဖျါထီၣ်က့ၤဝဲလၢ အရ့ဒိၣ်ဒိၣ်မးလၢ ခရံာ်ဖိတဖၣ် ကဘၣ်ဟးဆှဲး တၢ်သွံၣ်.—မၤတၢ် ၁၅:၂၀, ၂၉.

တဘျီတခီၣ် ပှၤကွဲးလံာ်စီဆှံဖိ တဲဖျါထီၣ်က့ၤ တၢ်ဂ့ၢ်တခါလီၢ်လီၢ် အဘျီအါမး သနာ်က့ အခီပညီ တမ့ၢ်လၢ ယဟိဝၤယွၤ အဲၣ်ဒိးလၢ ပကတဲဝံၤတဲက့ၤ တၢ်ကတိၤတဖျၢၣ်လီၢ်လီၢ် ခဲအံၤခဲအံၤဘၣ်. အဒိ ယ့ၣ်ၡူး တဲဝဲလၢ “ဖဲသုဃ့ထုကဖၣ်တၢ်အခါ တဘၣ်တဲဝံၤတဲက့ၤ တၢ်ကတိၤ အလီၢ်လီၢ်” တဂ့ၤ. (မး ၆:၇) ဝံၤဒီး ယ့ၣ်ၡူး တဲဖျါထီၣ်ဝဲ တၢ်ဂ့ၢ်တနီၤလၢ ပဃ့ယဟိဝၤယွၤသ့. (မး ၆:၉-၁၃) အဃိ ဖဲပဃ့ထုကဖၣ်အခါ ပမ့ၢ်တတဲ တၢ်ကတိၤ တဖျၢၣ်လီၢ်လီၢ်ဘၣ် သနာ်က့ ပဃ့တၢ်ဂ့ၢ် တခါလီၢ်လီၢ်သ့.—မး ၇:၇-၁၁.

ကစၢ်ယွၤအကလုၢ်ကထါ ကွဲးဖျါထီၣ်က့ၤ တၢ်ကတိၤ တဖျၢၣ်လီၢ်လီၢ် ဒီးလံာ်ကျိၤ တကျိၤလီၢ်လီၢ်န့ၣ် တၢ်ဂ့ၢ်လၢအရ့ဒိၣ် အိၣ်ဝဲအါမး. ဒီးပသ့ၣ်ညါလၢ ယဟိဝၤယွၤ လၢအမ့ၢ် ပသရၣ်လၢ အဒိၣ်အထီန့ၣ် အသိၣ်လိပှၤ တၢ်လၢအဂ့ၤကတၢၢ် လၢပဂီၢ်ထီဘိ.—ၡါ ၄၈:၁၇, ၁၈.