NA MALUAKU yankaka bansoniki ya Biblia vutukilaka bampova ya mutindu mosi na bisika mingi. Beto tadila bamfunu tatu yina mbala yankaka salaka ti bansoniki ya Biblia sala mutindu yina:

Kilokola ya ntangu yina yasonamaka. Na Yisaele ya ntama, bantu mingi vuandaka ve na bakopi ya Nsiku ya bau mosi. Mbala mingi bavuandaka kuwa ntangulu ya Nsiku ntangu bantu vuandaka sangana kintuadi na tabernakle. (Kul. 31:10-12) Kondua ntembe yavuandaka na mambu yina vuandaka katula bau dikebi ntangu bavuandaka kuwa mpe kutelema bawola mingi na kati ya grupe ya nene ya bantu. (Neh. 8:2, 3, 7) Na maluaku ya mutindu yina, kuvutukila bampova ya mfunu vuandaka sala ti yavuanda pete samu na bantu na kubambukila Masonukua mpe kusadila yau. Kuvutukila bampova yankaka vuandaka sadisa bau mingimingi samu babambukila mambu ya fiotifioti ya bansiku yina Yehova pesaka bau.​—Levi 18:4-22; Kul. 5:1.

Mutindu ya kusonikina. Bitini yankaka ya Biblia kele ya kusonama lokola miyimbu​—na kifuani, mukanda ya Nkunga, mukanda ya Nkunga ya Salomo, mpe mukanda ya Bidilu. Na bantangu yankaka miyimbu kevuandaka na bampova yina bakevutukilaka (refrain), yina kebulaka nsoso na yintu ya diambu mpe yina kesadisaka bantu yina kena kuwa na kukanga bampova yango na yintu. Na kifuani, tala bampova yina kele na Nkunga 115:9-11: ‘O Yisaele, tudila Yehova ntima​—Yandi kele lusadusu na bau mpe kitanunu na bau. O yinzo ya Arona, beno tudila Yehova ntima​—Yandi kele lusadusu na bau mpe kitanunu na bau. Beno bantu yina kebangaka Yehova, beno tudila Yehova ntima​—Yandi kele lusadusu na bau mpe kitanunu na bau.’ Kuvutukila bampova yango, vuandaka sadisa bantu yina vuandaka yimbila na kulunda makanisi yina ya mfunu na bantima na bau.

Samu na kubula nsoso na mambu ya mfunu. Na bantangu yankaka bansoniki ya Biblia vuandaka vutukila bampova ya mfunu. Na kifuani, ntangu Yehova tubilaka Bayisaele babika kudia menga, yandi lombaka Mose yandi vutukila mfunu ya nsiku yango mbala mingi. Nzambi zolaka bula nsoso ti luzingu ya nsuni kele na kati ya menga, yazola tuba ti, menga kemonisaka luzingu. (Levi 17:11, 14) Na manima ntangu bantumua mpe bankulutu na Yerusaleme sonikaka mambu yina Baklisto fueti manga kusala samu na kusepedisa Nzambi, babulaka diaka nsoso na mfunu ya kumanga menga.​—Bis. 15:20, 29.

Atako Biblia kevutukilaka bampova na yau na bisika yankaka, yazola monisa ve ti Yehova zola beto kuma na kikadulu ya kuvutukilaka bampova ya Biblia. Na kifuani, Yesu tubaka: ‘Ntangu nge kena kusambila, kuvutukila ve kaka mambu yango mbala na mbala.’ (Mat. 6:7) Na manima yandi tubilaka mambu yina beto lenda lomba na kisambu yina kele na nguizani na luzolo ya Nzambi. (Mat. 6:9-13) Na yau, ata kana beto kena kuvutukila ve bampova ya mutindu mosi mbala na mbala na kisambu na beto, beto lenda sambila samu na mambu ya mutindu mosi mbala na mbala.​—Mat. 7:7-11.

Yakele samu na mfunu ya mbote Mpova ya Nzambi kevutukilaka bampova yankaka mpe bafraze yankaka. Yakele mosi ya mitindu yina Nlongisi na beto ya Nene kelongaka beto mutindu ya kubakila Mpova na yandi mambote.​—Yez. 48:17, 18.