Teˇ pawˆ pawˆ kʼo, Liꞈ hpu bvuhꞈ paˍ teˇ lawn ceh tiˉ ve htaꞈ laiˉ pawˆ bvuhꞈ ve yoˬ. Yawˇ hui chi hkʼe te ve awˬ hkʼaˇ 3 hkʼaˇ cawˬ ve lehˬ:

Bvuhꞈ ve awˬ yanˇ. Oˇ htaˇ teˇ co˗e Iˉsaˍreˍlaˆ chaw maˇ˗awˍ ve chaw lehˬ, Moˉseˍ ve awˬ liˇ tawˇ hkawˇ a shu yawˇ ve liꞈ kʼoˆ maˇ cawˬ. Mvuhˇ miˬ yaˇ hkʼa peu˗eˬ daꞈ kehˬ ve aˉ po kʼo lo pawehˇ teˇ hpaˍ cawˬ htaˇ, awˬ liˇ tawˇ hkawˇ chi ve ca na la ve yoˬ. (Bon maˍ ve 31:10-12) Chaw awˬ moˍ lonˉ huˉ taˍ leh laiˉ naˍ riˍ na chehˇ htaˇ, yawˇ hui hkʼa dehꞈ maˇ na gʼa tuˬ laiˉ ceuˬ te piˇ ve yoˬ. Chi htaꞈ pa taw, a yeˇ uiˍ ve awˬ lawn htaꞈ laiˉ pawˆ kʼoˆ ve lehˬ, mvuhˇ miˬ yaˇ Liꞈ hpu awˬ tawn htaꞈ tawnˇ gʼa leh a shaꞈ teꞈ kuiˬ hkʼaw yuˬ yehˇ tuˬ ga piˇ ve yoˬ. (Neˍhaˍmiˆ 8:2, 3, 7) Chi hkʼe te ve lehˬ, yawˇ hui Yaˬhoˉvaˬ ve awˬ liˇ tawˇ hkawˇ a yeˇ uiˍ ve htaꞈ tawnˇ gʼa tuˬ ga piˇ ve yoˬ.—Oˉ kʼoˍ pui ve 18:4-22; Bon maˍ ve 5:1.

Bvuhꞈ ve awˬ hkʼaˇ. Liꞈ hpu hkʼaw ve awˬ lawn awˬ tanˇ aˬ laˬ hkʼe 10 peun˗sehn ve kʼa muiˬ hkawˇ hpehꞈ ve yoˬ. Tawˇ pa haˉ te kʼo, Chiˇ mvuh ve liꞈ, Sawˉlaꞈmonˍ ve kʼa muiˬ hkawˇ, leh Dawˇ haˍ ve kʼa muiˬ hkawˇ, chi teˇ hpaˍ hpehꞈ ve yoˬ. Tcuhˉ kuiˬ hkʼa shuˍ˗ehꞈ hpehꞈ tuˬ, mvuhˇ miˬ yaˇ kʼa muiˬ hkawˇ tawnˇ gʼa tuˬ, ga piˇ gʼa ve lehˬ, kʼa muiˬ hkawˇ teˇ maˬ maˬ kʼo tawˇ hkawˇ hkʼa shuˍ˗ehꞈ ve yehˇ ve yoˬ. Tawˇ pa haˉ te kʼo, Chiˇ mvuh ve liꞈ 115:9-11 hkʼaw ‘Iˉsaˍreˍlaˆ chaw teˇ hpaˍ˗oˬ, Gʼuiˬ sha htaꞈ ceh tiˉ gʼaˇ va˗o. Yawˇ nawˬ hui htaꞈ ga laˇ, haꞈ shaˉ laˇ chehˇ ve yoˬ. Gʼuiˬ sha ve paw hkuˇ teˇ hpaˍ˗oˬ, Gʼuiˬ sha htaꞈ ceh tiˉ gʼaˇ va˗o. Yawˇ nawˬ hui htaꞈ ga laˇ, haꞈ shaˉ laˇ chehˇ ve yoˬ. Gʼuiˬ sha htaꞈ ceh tiˉ gʼaˇ va˗o. Yawˇ nawˬ hui htaꞈ ga laˇ, haꞈ shaˉ laˇ chehˇ ve yoˬ.’ Tawˇ hkawˇ hkʼa shuˍ ve htaꞈ laiˉ pawˆ kʼoˆ ve lehˬ, kʼa muiˬ hkawˇ kʼa ve chaw awˬ lawn awˬ tanˇ htaꞈ tawnˇ gʼa tuˬ ga piˇ ve tehꞈ nawˬ mawˬ ve maˇ heˆ laˇ?

Bvuhꞈ ve na gʼa tuˬ awˬ hkʼaˇ. Liꞈ hpu hkʼaw a yeˇ uiˍ ve awˬ lawn htaꞈ kʼoˆ tuˬ, teˇ pawˆ pawˆ kʼo Liꞈ hpu bvuhꞈ ve chaw teˇ lawn ve htaꞈ laiˉ pawˆ kʼoˆ tuˬ loˍ ve yoˬ. Tawˇ pa haˉ te kʼo, Yaˬhoˉvaˬ Iˉsaˍreˍlaˆ chaw htaꞈ awˬ suhˍ maˇ caˇ tuˬ tawˇ piˇ htaˇ, Yaˬhoˉvaˬ lehˬ awˬ lawn chi Moˉseˍ htaꞈ laiˉ pawˆ kʼoˆ tcuh ve yoˬ. Awˬ suhˍ lehˬ a shaꞈ htaꞈ caˉ daꞈ ve yoˬ. Chi kʼoˆ gaˇ ve lehˬ, awˬ suhˍ a shaꞈ hpehꞈ ve yoˬ. (Oˉ kʼoˍ pui ve 17:11, 14) Peuˬ hkʼawꞈ nawˉ, tcuh yaˇ hui leh Yeˍruˆsaˍlehnˍ venˇ lo ve awˬ hoˉ chaw mawˇ teˇ hpaˍ, Gʼuiˬ sha nyi hkʼaˇ suh ve te piˇ tuˬ Hkriꞈ yaˇ jaw kʼai cawˇ ve awˬ ceuˬ htaꞈ kʼoˆ taˍ ve yoˬ. Yawˇ hui teˇ pawˆ kʼawꞈ kʼoˆ ve, awˬ suhˍ htaꞈ jaw kʼai loˬ.—Tcuh yaˇ 15:20, 29.

Liꞈ hpu hkʼaw ve awˬ lawn bvuhꞈ peuˬ kaꞈ bvuhꞈ ve htawˇ, tawˇ hkawˇ chi ve teˇ hpaˍ bon lawˬ htaˇ, Yaˬhoˉvaˬ ngaˬ hui htaꞈ tawnˇ gʼaw tcuh gaˇ ve tehꞈ kʼoˆ gaˇ ve maˇ heˆ. Yeˍsuˆ kʼoˆ ve, “nawˬ hui bon lawˬ ve teˇ yanˇ kʼoˆ peuˬ kaꞈ taˇ kʼoˆ.” (Maꞈhtehˍ 6:7) Leh Yeˍsuˆ kʼawꞈ kʼoˆ ve, aˬ htoꞈ ma awˬ lawn bon lawˬ ve htawˇ, Yaˬhoˉvaˬ ve a loˍ htaꞈ hawˍ daꞈ tcuh cawˇ ve yoˬ. (Maꞈhtehˍ 6:9-13) Chi htaꞈ pa taw, ngaˬ hui bon lawˬ htaˇ teˇ lawn ceh tiˉ ve htaꞈ laiˉ pawˆ maˇ kʼoˆ cawˇ. Yaꞈ hkʼaˇ, ngaˬ hui teˇ lawn ve hkʼaw bon laiˉ pawˆ lawˬ kaꞈ gʼa ve tehꞈ shiˍ ve yoˬ.—Maꞈhtehˍ 7:7-11.

Ngaˬ hui ve Saˍ laꞈ lonˉ Yaˬhoˉvaˬ lehˬ Liꞈ hpu hkʼaw teˇ lawn ve htaꞈ kʼoˆ peuˬ kaꞈ kʼoˆ tcuh ve lehˬ daꞈ ve awˬ hkʼaˇ cawˬ ve yoˬ. Yaˬhoˉvaˬ ngaˬ hui awˬ pon awˬ bon cawˬ tuˬ maˍ laˇ ve lehˬ laiˉ hkʼaˇ ve hkʼaw chi ve kaꞈ teˇ hkʼaˇ hpehꞈ ve yoˬ.—Iˉsaˍyaˆ 48:17, 18.