ເຈົ້າຮູ້ບໍ?
ເປັນຫຍັງຄຳພີໄບເບິນຈຶ່ງມີຄຳເວົ້າທີ່ຂຽນຊ້ຳກັນ?
ບາງເທື່ອຜູ້ຂຽນຄຳພີໄບເບິນກໍຂຽນຄຳເວົ້າບາງຄຳຊ້ຳກັນ. ໃຫ້ເບິ່ງເຫດຜົນ 3 ຢ່າງທີ່ອາດເຮັດໃຫ້ເຂົາເຈົ້າເຮັດແບບນັ້ນ.
ໄລຍະເວລາທີ່ຂຽນ. ໃນສະໄໝອິດສະຣາເອນບູຮານ ປະຊາຊົນສ່ວນຫຼາຍບໍ່ມີສຳເນົາກົດໝາຍຂອງໂມເຊ. ເຂົາເຈົ້າໄດ້ຟັງການອ່ານກົດໝາຍນີ້ຕອນທີ່ຄົນໝົດຊາດມາຢູ່ນຳກັນໃນຍາມເທດສະການຕ່າງໆເທົ່ານັ້ນ. (ພບຍ. 31:10-12) ເປັນໄປໄດ້ວ່າມີຫຼາຍຢ່າງທີ່ເຮັດໃຫ້ເຂົາເຈົ້າເສຍສະມາທິຕອນທີ່ຢືນຟັງເປັນກຸ່ມໃຫຍ່ດົນຫຼາຍຊົ່ວໂມງ. (ນຮຢ. 8:2, 3, 7) ໃນສະພາບການແບບນັ້ນ ການເວົ້າຊ້ຳຄຳສຳຄັນຫຼາຍໆເທື່ອອາດຊ່ວຍປະຊາຊົນໃຫ້ຈື່ຂໍ້ຄຳພີຕ່າງໆແລະເອົາໄປໃຊ້ໃນຊີວິດໄດ້. ການເນັ້ນແບບນີ້ຈະຊ່ວຍເຂົາເຈົ້າໃຫ້ຈື່ກົດໝາຍແລະຄຳສັ່ງຕ່າງໆທີ່ພະເຢໂຫວາໃຫ້ເຂົາເຈົ້າ.—ລລວ. 18:4-22; ພບຍ. 5:1
ຮູບແບບການຂຽນ. ເນື້ອໃນບາງສ່ວນໃນຄຳພີໄບເບິນເປັນເພງ ເຊັ່ນ: ປຶ້ມເພງສັນລະເສີນ ເພງຂອງໂຊໂລໂມນ ແລະເພງໂສກເສົ້າ. ບາງເທື່ອໃຊ້ຄຳຊ້ຳກັນເພື່ອໃຫ້ຄວາມໝາຍໄປໃນທາງດຽວກັນແລະເພື່ອຊ່ວຍຜູ້ຟັງໃຫ້ຈື່ເນື້ອເພງໄດ້. ຕົວຢ່າງເຊັ່ນ: ເພງສັນລະເສີນ 115:9-11 ບອກວ່າ: “ພວກອິດສະຣາເອນເອີ້ຍ ໃຫ້ໄວ້ໃຈພະເຢໂຫວາ. ເພິ່ນເປັນຜູ້ຊ່ວຍແລະເປັນໂລ້ຂອງພວກເຈົ້າ. ລູກຫຼານຂອງອາໂຣນເອີ້ຍ ໃຫ້ໄວ້ໃຈພະເຢໂຫວາ. ເພິ່ນເປັນຜູ້ຊ່ວຍແລະເປັນໂລ້ຂອງພວກເຈົ້າ. ພວກເຈົ້າທີ່ນັບຖືພະເຢໂຫວາ ໃຫ້ໄວ້ໃຈພະເຢໂຫວາ. ເພິ່ນເປັນຜູ້ຊ່ວຍແລະເປັນໂລ້ຂອງພວກເຈົ້າ.” ເຈົ້າເຫັນແລ້ວແມ່ນບໍວ່າການໃຊ້ຄຳຊ້ຳໆກັນແບບນີ້ຈະຊ່ວຍນັກຮ້ອງໃຫ້ຈື່ເນື້ອເພງໄດ້ຂຶ້ນໃຈ?
ຈຸດປະສົງຂອງການຂຽນ. ບາງເທື່ອຜູ້ຂຽນຄຳພີໄບເບິນຈຳເປັນຕ້ອງເນັ້ນຄຳເວົ້າທີ່ສຳຄັນຫຼາຍເທື່ອ. ຕົວຢ່າງເຊັ່ນ: ຕອນທີ່ພະເຢໂຫວາຫ້າມຄົນອິດສະເອນບໍ່ໃຫ້ກິນເລືອດ ເພິ່ນກໍໃຫ້ໂມເຊເວົ້າເຖິງເຫດຜົນນັ້ນຫຼາຍເທື່ອ. ພະເຢໂຫວາຢາກເນັ້ນວ່າຊີວິດຢູ່ໃນເລືອດ ເຊິ່ງໝາຍຄວາມວ່າເລືອດໝາຍເຖິງຊີວິດ. (ລລວ. 17:11, 14) ຕໍ່ມາ ຕອນທີ່ພວກອັກຄະສາວົກແລະຜູ້ເບິ່ງແຍງໃນເມືອງເຢຣູຊາເລັມເວົ້າເຖິງສິ່ງທີ່ຄລິດສະຕຽນຄວນຫຼີກລ່ຽງເພື່ອຈະເຮັດໃຫ້ພະເຈົ້າພໍໃຈ ເຂົາເຈົ້າກໍເນັ້ນອີກເທື່ອໜຶ່ງວ່າໃຫ້ງົດເວັ້ນຈາກເລືອດ.—ກຈກ. 15:20, 29
ເຖິງວ່າຄຳພີໄບເບິນມີຄຳເວົ້າທີ່ຂຽນຊ້ຳກັນ ແຕ່ບໍ່ໄດ້ໝາຍຄວາມວ່າພະເຢໂຫວາຢາກໃຫ້ເຮົາທ່ອງຄຳເຫຼົ່ານັ້ນ. ພະເຢຊູບອກວ່າ: “ຕອນທີ່ພວກເຈົ້າອະທິດຖານ ຢ່າເວົ້າຊ້ຳຄຳເກົ່າ.” (ມທ. 6:7) ຈາກນັ້ນ ເພິ່ນກໍເວົ້າເຖິງເລື່ອງທີ່ເຮົາຄວນອະທິດຖານເຊິ່ງສອດຄ່ອງກັບຄວາມຕ້ອງການຂອງພະເຢໂຫວາ. (ມທ. 6:9-13) ດັ່ງນັ້ນ ເຖິງວ່າເຮົາບໍ່ໄດ້ອະທິດຖານຄຳເກົ່າຊ້ຳໄປຊ້ຳມາ ແຕ່ເຮົາສາມາດອະທິດຖານກ່ຽວກັບເລື່ອງເກົ່າໄດ້ຫຼາຍເທື່ອ.—ມທ. 7:7-11
ພະເຢໂຫວາຄູຜູ້ຍິ່ງໃຫຍ່ມີເຫດຜົນທີ່ດີທີ່ໃຫ້ຄຳພີໄບເບິນມີບາງຄຳທີ່ເວົ້າຊ້ຳກັນ. ນີ້ເປັນໜຶ່ງໃນຫຼາຍໆວິທີທີ່ພະເຢໂຫວາໃຊ້ໃນການສອນເຮົາເພື່ອປະໂຫຍດຂອງເຮົາເອງ.—ອຊຢ. 48:17, 18
