BAÑOLI ba Bibele fokuñwi nebakutelanga lipulelo zeñwi linzwi ka linzwi. Halunyakisiseñi mabaka amalaalu ili ao mwendi naatahisize kuli bañoli ba, baeze cwalo:

Nako fone iñolezwi. Mwa Isilaele wa kwaikale, batu babañata nebasina kopi ya ka butu ya Mulao. Hañata nebautwanga Mulao haubalwa, sicaba hane sikopananga hamoho kwa tabernakele. (Deut. 31:​10-12) Kusina kukakanya, nekunani lika zenekona kubayaulula hane bateelezanga inze bayemi mwahalaa sicaba ka lihora zeñata. (Neh. 8:​2, 3, 7) Ka linako zeo, neli kwa butokwa hahulu kukutela lipulelo zeñwi ilikuli batu bakone kuhupula Mañolo ka bunolo ni kuasebelisa. Kukutela manzwi amañwi sihulu neku batusanga kuhupula litaba za butokwa, zecwale ka milao ya Mulimu ni likatulo zahae.—Liv. 18:​4-22; Deut. 5:1.

Mone liñolezwi litaba. Ibato ba 10 pesenti ya litaba ze mwa Bibele ki lipina—kukopanyeleza cwalo ni buka ya Lisamu, Pina ya Salumoni, ni Malilo. Fokuñwi manzwi amañwi a pina naakutelwanga ili kukoñomeka toho ya taba ni kutusa bateelezi kupeta manzwi ayona. Ka mutala, mulemuhe manzwi a kwa Samu 115:​9-11, ali: “Wena Isilaele, usepe Jehova—ki yena tuso yabona ni tebe yabona. Mina ba ndu ya Aruni, musepe Jehova—ki yena tuso yabona ni tebe yabona. Mina babasaba Jehova, musepe Jehova—ki yena tuso yabona ni tebe yabona.” Kana mulemuhile mo kukutela manzwi ao nekukona kutuseza baopeli kuzwelapili kuhupula litaba za butokwa mwa minahano yabona ni mwa lipilu zabona?

Kukoñomeka litaba za butokwa. Bañoli ba Bibele fokuñwi nebakutelanga lipulelo za butokwa. Ka mutala, Jehova hanaalaezi Maisilaele kuli basike baca mali, naabulelezi Mushe kuli akuta-kutele kutalusa libaka. Mulimu naabata kukoñomeka taba ya kuli bupilo bwa sibupiwa sesipila bu mwa mali, ili kutalusa kuli mali ayemela bupilo. (Liv. 17:​11, 14) Hasamulaho, baapositola ni baana-bahulu mwa Jerusalema hane bakolohanyize lika zeluswanela kutokolomoha kuli lutabise Mulimu, hape nebakoñomekile butokwa bwa kuambuka mali.—Lik. 15:​20, 29.

Mulelo wa Jehova nesi kuli lube ni mukwa wa kukuta-kutelanga lipulelo za mwa Mañolo. Ka mutala, Jesu naabulezi kuli: “Hamulapela, musike mwakuta-kutela kubulela manzwi aswana.” (Mat. 6:7) Hape naatalusize litaba zeswanela zelukona kulapelela ili zelumelelana ni tato ya Mulimu. (Mat. 6:​9-13) Kacwalo, niha lusaswaneli kukuta-kutela kubulela manzwi aswana mwa litapelo zaluna, lulukuluhile kulapelela taba yeswana hape ni hape.—Mat. 7:​7-11.

Kunani mabaka amande atahisize kuli manzwi ni lipulelo zeñwi likuta-kutelwe mwa Linzwi la Mulimu. Yeo ki yeñwi ya linzila zeñata zeo Muluti waluna Yapahami aluluta ka zona kuli lufumane tuso.—Isa. 48:​17, 18.