KUDI misangu idi bafundi ba Bible bambulule bimue biambilu anu mudibi amu. Tumonayi malu asatu avua mua kuikala mabasake bua kubiambulula.

Dîba divuabu bafunde malu au. Mu Isalele wa kale, bantu ba bungi kabavua ne mivungu ivua ne mikenji to. Bavua batamba kumvua mikenji ayi pavuabu bayibala dîba divua tshisamba tshidisangisha pamue ku ntenta wa tshitendelelu. (Dut. 31:10-12) Kuvua ne bua kuikala malu avua ababueja mu ditanaji pavuabu bayiteleja bu muvuabu benza mêba a bungi munkatshi mua tshisumbu tshinene. (Neh. 8:2, 3, 7) Bikondo bia nanku, kuambulula malu avua ne mushinga kuvua pamuapa kuambuluisha bantu bua bikale bavuluka mifundu ne bayitumikila. Kuambulula amue malu kuvua kubambuluisha nangananga bua kuvuluka malu kampanda too ne mu katoba, bu mudi mikenji ya Nzambi mifunda ne mapangadika ende.—Lew. 18:4-22; Dut. 5:1.

Mushindu uvuabu bafunde malu au. Bimue bitupa bia mu Bible mbabifunde bu misambu. Tshilejilu, mukanda wa Misambu, Musambu wa Solomo, ne mukanda wa Muadi. Kudi imue misambu itu ne dipunguluja didi ne mêyi adi apetangana ne musambu, didi diambuluisha badi bauteleja bua kuwukuata ku muoyo. Tshilejilu, mona mêyi adi mu Misambu 115:9-11: “Wewe Isalele, eyemena Yehowa, yeye udi muambuluishi wabu ne ngabu wabu. Wewe nzubu wa Alona, eyemena Yehowa, yeye udi muambuluishi wabu ne ngabu wabu. Nuenu badi batshina Yehowa, eyemenayi Yehowa, yeye udi muambuluishi wabu ne ngabu wabu.” Udiku mumone muvua kuambulula mêyi au kuenze bua bantu kuvuluka malu avua ne mushinga ne kuakuata ku muoyo anyi?

Dijinga dia kushindika malu avua ne mushinga. Bafundi ba Bible bavua imue misangu bambulula malu avua ne mushinga. Tshilejilu, pavua Yehowa muelele bena Isalele mukenji wa kubenga kudia mashi, Mose uvua muambulule misangu ne misangu bua tshinyi bavua ne bua kuenza nanku. Nzambi uvua musue kushindika ne: muoyo wa tshintu udi mu mashi, mmumue ne: mashi ke muoyo. (Lew. 17:11, 14) Pashishe pavua bapostolo ne bakulu bavua ku Yelushalema baleje malu adi bena Kristo ne bua kuepuka bua kusankisha Nzambi, bavua batambe kuakula bua kudilama ku mashi.—Bien. 15:20, 29.

Yehowa ki mmusue bua tuikale ne tshibidilu tshia kuambulula miaku ya mu Bible to. Tshilejilu, Yezu wakamba ne: “Panudi nusambila, kanuambuludi malu amue amue” to. (Mat. 6:7) Wakaleja too ne malu makumbane adi apetangana ne disua dia Nzambi atudi mua kuamba mu masambila etu. (Mat. 6:9-13) Nansha mutudi katuyi ne bua kuambulula mêyi amue amue mu masambila etu, ki mbibi bua kusambila misangu ne misangu bua malu atukavua balombe to.—Mat. 7:7-11.

Padi Nzambi mufundishe malu amue amue mu Bible, ki mbibi to. Ngumue wa ku mishindu ya bungi idi Mulongeshi wetu Munene utulongesha bua diakalenga dietu.—Yesh. 48:17, 18.