ANSONEKI aBayibolu kakavulu afuntishili-funtishileñahu nyikuku yamazu wowamu. Talenu iyi yuma yisatu hadaha yaletesheli ansoneki kwila mwenimu:

Chadiña yuma hampinji yayisonekeliwu. MuIsarela wakushankulu, antu amavulu hiyadiñahu namukanda waNshimbiku. Kakavulu adiña hohu nakutiyilila kuNshimbi neyi muza wunapompi hamu hatabanaka. (Kuhit. 31:​10-12) Chakadi nikujina, kwatela kwadiña yuma yaluwañesheleña antu hampinji yatiyilileñawu nikwimana maora amavulu mwizaza deneni dawantu. (Nehe. 8:​2, 3, 7) Dichi hampinji jidi neyi iji, kufuntisha-funtishahu nyikuku yamazu yalema kwakwashileña antu kwanuka nsona nikujizatisha. Kufuntisha-funtishahu mazu amakwawu kwatela kwayikwashileña nankashi kwanuka nsañu jakunama, chidi neyi nshimbi jaNzambi nimazu indi awunsompeshi.—Lev. 18:​4-22; Kuhit. 5:1.

Mutapu mwayisonekeleliwu. Nyikanda yimu yamuBayibolu ayisoneka neyi hitumina, chakutalilahu mukanda waMasamu, waKamina Kasolomoni niwaMukeña. Mpinji jikwawu, tumina twadiña namazu akufuntisha-funtishahu. Chumichi chakwashileña antiyilili kutiyishisha nsañu yayeni yinakuhoshahu oku kamina nikwanuka mazu adimu. Chakutalilahu, talenu mazu ekala haIsamu 115:​9-11: “Eyi Isarela, mukuhweleli Yehova—Yena diyi nkwashi yawu nawa nkebu yawu. Eyi itala daAroni, mukuhweleli Yehova—Yena diyi nkwashi yawu nawa nkebu yawu. Enu mwamutiyaña Yehova woma, mukuhwelelenu Yehova—Yena diyi nkwashi yawu nawa nkebu yawu.” Kufuntisha-funtishahu awa mazu, kwayikwashileña añimbi kwanuka iyi yuma yalema nikushimata munyichima yawu.

Kulonda akonkomweni hansañu yalema. Ansoneki aBayibolu mpinji jikwawu afuntishili-funtishileñahu nyikuku yamazu yalema. Chakutalilahu, Yehova chayilejeliyi aIsarela nindi hiyatela kuda mashiku, wamulejeli Mosi kufuntisha-funtishahu kakavulu chuma chaletesheli. Nzambi wakeñeleña kukonkomwena hachikuma chakwila nawu wumi wachuma chejima chachumi wudi mumashi, dikwila nawu, mashi emenañaku wumi. (Lev. 17:​11, 14) Mukuhita kwampinji, chelili apostolu niakulumpi muYerusalema asoneki yuma yalema yateleli kwilawu antu kulonda atondolweleña kumutiyisha Nzambi kutama, akonkomweneni cheñi hachikuma chakuleka mashi.—Yilw. 15:​20, 29.

Yehova hakeñeleña nindi kufuntisha-funtishahu kwanyikuku yamazu yamuNsona kwiikali hikashidikiluku. Chakutalilahu, Yesu wahosheli nindi: “Neyi wunakulomba, bayi wufuntisha-funtishahu mazu [wowamuku].” (Mat. 6:7) Kuhiñahu watulejeli yuma yatelela yitwatela kulomba yesekana nankeñelu yaNzambi. (Mat. 6:​9-13) Hela chakwila twatondolwelaña kufuntisha-funtishahu mazu wowamu neyi tunakulomba, chidi hohu chiwahi kulomba hansañu yoyimu kakavulu.—Mat. 7:​7-11.

Kudi yuma yalema yaletesha Izu daNzambi donenewa difuntishi-funtishihu mazu amakwawu ninyikuku yamazu yoyimu. Hinjila yimu hanjila jajivulu mwatudizishilañayi Ntañishi yetu Wabadika yuma yinateli kutukwasha.—Isa. 48:​17, 18.