Insita zimwi aalembanga Baibo yaomvyanga amazwi ali yamwi. Lolini ivintu vitatu limwi ivyalenzile ukuti aalembanga Baibo yaomvya amazwi ali yamwi:

Insita ino vyalembilwepo. Umu nsita zya ina Izlaeli antu aingi yataakweti impapulo zya masunde. Ilingi yuvwanga kuno amasunde yakubelengwa nga yakolongana api Itenti lya kupepelapo. (Malan. 31:​10-12) Ukwaula nu kutwisika kwayanga ivyayapuvyanyanga lino ya kukutika lino masunde yakubelengwa nupya imililanga pa nsita itali mwi umba. (Neem. 8:​2, 3, 7) Fwandi apa nsita ii ukuswililizya amazwi kwali nu kuyazwa ukwiusya amalembo alino nu kuomvya vino yuvwa. Ukuswilizyapo amazwi kwali nu kuyazwa ukwiusya vyonsi pa masunde yano Yeova wayapeezile.—Levi 18:​4-22; Malan. 5:1.

Vino yalembwanga. Umu mabuku yamwi amuli Baibo mwaya inyimbo wakwe Malumbo, Lwimbo Lwakwe Solomoni, alino Ni Nyimbo Zya Ulanda. Insita zimwi inyimbo zyakwatanga amazwi aliyamwi ci cayazwanga ukumanya cino ulwimbo lukulandapo. Wakwe amazwi akazanwa pa Masamu 115:​9-11: akuti “Ala mwe ina Izlaeli, simwataila sile Umwene pano aliwe sile akamwazwa nu kumuvwangila. Mwe amu luko lwakwe Aaloni, mwataila sile Yawe pano aliwe sile akamwazwa nu kumuvwangila mwe, mwemuno mwakwatila Yawe icoopo, mwamutaila. Pano aliwe sile akamwazwa nu kumuvwangila.” Ukuswilizyapo amazwi kwali nu kwazwa ya kimba ukumanya amazwi yaa?

Nga yakulonda ukulanda pa visinka ivicindame. Insita zimwi aalembanga Baibo yaswilizyangapo amazwi acindame umwi lyasi. Wakwe Lino Yeova wanenyile aina izlaeli ukuti yataalya uwazi, wanenyile Mose ukuti aiusyako aina izlaeli lyonsi umulandu uno walandiile vivyo. Yeova walondanga aina izlaeli uku manya ukuti umi wa ciumbwa waya umu wazi pano uwazi ali umi kwene. (Lev. 17:​11, 14) Lino papisile insita atumwa na ya eluda ali umu Yelusalemu yalemvile pa vintu vino Aina Klisitu yalinzile ukucita pakuti yatasosya Leza, yalanzile sana pa mulandu uno cacindamile ukutaluka uku wazi.—Mili. 15:​20, 29.

Nanti icakuti Baibo ikaswilizyapo amazwi yamwi Yeova asilonda ukuti twaomvya amazwi ali yamwi. Yesu watiile “Lino ukupepa utaaswilizya kulanda ivili vimwi.” (Mate. 6:7) Walanzile na pa vintu vino tulinzile ukupepelapo. (Mate. 6:​9-13) Nanti icakuti tusiswilizyapo amazwi aliyamwi lino tukupepa tungapepela pa cintu conga apa miku ingi.—Mate. 7:​7-11.

Kwaya umulandu ucindame uno Baibo ikaswilizizyapo amazwi ali yamwi. Yaya inzila ino Kasambilizya witu uwa Papelapela akaomvya pa kutusambilizya.—Eza. 48:​17, 18.