EWÕR iien ko ri-jeje Baibõl̦ ro rar ãliji jet naan. L̦õmn̦ak kõn jilu un ko unin aer maroñ kar kõm̦m̦ane men in:

Tõre eo kar jeiki. Ilo kar Israel eo etto, ear ejjel̦o̦k an elõñ iaan armej ro make kaape in Kien eo. Ekkã aer kar roñjake aer riiti Kien eo ilo iien ko me aolep ro ilo aelõñ eo rar kobal̦o̦k ippãn doon ilo im̦õn kõppãd eo. (Dut. 31:​10-12) Ejjel̦o̦k pere bwe ekar wõr menin kõm̦ad ko ke rar jutak ãinwõt juon jarlepju im roñjake aer riiti Kien eo ium̦win jejjo awa ko. (Nih. 8:​2, 3, 7) Innem aer ãliji jet naan ilo iien rot kein, enaaj kar jipañ bwe en pidodo an armej ro keememeji eoon ko im jerbali. Bareinwõt, enaaj kar lukkuun jipañ armej ro ñan keememeji tipdikin kakien ko me Jeova ear lil̦o̦k ñan er.—Liv. 18:​4-22; Dut. 5:1.

Wãween kar jeiki. Baibõl̦ eo eobrak kõn al ko—ekitibuj bokin Sam, Al eo an Solomon, im Liaajlo̦l̦. Ilo jet iaan al kein, kar ãliji jet naan ko ñan lukkuun kõmeeje boin eo el̦aptata ilo al eo im ñan jipañ ri-roñjake ro kiili al eo. Ñan waanjoñak, l̦õmn̦ak kõn naan kein ilo Sam 115:​9-11: “O Israel kom̦win lõke Jeova. E wõt aer jipañ im aer likõpejñak. O nukũn Aron kom̦win lõke Jeova, e aer jipañ im aer likõpejñak. Kom̦ eo kom̦ij mijak Jeova, kom̦win lõke Jeova; E aer jipañ im aer likõpejñak.” Kwõmaroñ ke lo wãween an naan kein maroñ kar jipañ ri-al ro ñan lukkuun mel̦el̦e im kiili naanin kaenõm̦m̦an kein raorõk?

Unin kar jeiki. Ewõr iien ri-jeje Baibõl̦ ro rar ãliji mel̦el̦e ko raorõk. Ñan waanjoñak, ke Jeova ear jiroñ ri-Israel ro ñan jab m̦õñã bõtõktõk, ear kõm̦akũt Moses bwe en ãliji etke ren jab kõm̦m̦ane men in. Anij ear kõn̦aan lukkuun kaalikkar bwe mour an kanniõk otemjej ej pãd ilo bõtõktõkier, mel̦el̦ein bwe bõtõktõk ej jutak kõn mour. (Liv. 17:​11, 14) Tokãlik ke rijjilõk ro im em̦m̦aan ro rerũtto ilo Jerusalem rar kõllaajraki men ko Kũrjin ro rar aikuj kõm̦m̦ani bwe ren kabuñbũruon Anij, rar bar ãliji aorõkin aer kõjparok er jãn bõtõktõk.—Jrb. 15:​20, 29.

Meñe Baibõl̦ ej ãlijinmen, men in ejjab mel̦el̦ein bwe Jeova ekõn̦aan bwe jen imminene in ãliji naan ko jãn Baibõl̦. Ñan waanjoñak, Jesus ear ba: “Ñe kom̦ij jar, kom̦win jab ãlijinmen.” (Matu 6:7) Tokãlik, ear kwal̦o̦k kõn jet iaan men ko jemaroñ jar kaki me rej ekkar ñan ankilaan Anij. (Matu 6:​9-13) Innem, meñe jejjab ãlijinmen ilo jar ko ad, ak ejjel̦o̦k jorrããn ñe jej jar kõn jet men elõñ alen.—Matu 7:​7-11.

Alikkar bwe ewõr un ko rem̦m̦an unin an Naanin Anij ãlijinmen. Eñin ej juon iaan wãween ko ri-Kaki eo ad em̦m̦antata ej katakin kõj bwe jen maroñ bõk tokjãn ko rem̦m̦an.—Ais. 48:​17, 18.