MALABO mamodha, anamaleba a Bibiliya yohogolowela wawoga madhu mamodhave, madhu ni madhu. Kabeni noone dhithu tharu dhathukulele anamaleba Bibiliya ohogolowela waleba madhu mamodhave:

Mudhidhi elebiwiwa. Mudhidhi wa amwaana Izarayeli, athu owinjhiva kiyanna kopiya ya nlamulo wihina yilerigi yekiwa. Dila dhowinjhivadhene aliwa yanda wiiwa wileriwa wa nlamulo yatugumana mutabernakulu. (Deut. 31:10-12) Podi wera mudhidhi yole, kiyaali yokweya opwasedha ovuruwana wileriwa wa nlamulo muwari mwa mudhidhi wowinjhiva egaali owiimmelene vaari wa muthithi wa athu. (Nee. 8:2, 3, 7) Vano wihina nlogo niwelele ndhe dhileriwa wi eparihedhe mabasa mwigumini mwewa, yaali yapama wahogolowela wasoriha madhu athima. Wahogolowela wasoriha madhu mamodhave, yaali ethu yathima wihina nlogo yandege wubuwela pamadhene malamulo mamodha yavolowelavo werana dhithu dhowinjhiva. — Lev. 18:4-22; Deut. 5:1.

Makalelo elebiwiwa. Dhipaddi dhimodha dha Bibiliya dhilebiwe ninga jhibo. Motajhiha, malivuru a Salmos, Cântico de Salomão ni Lamentações. Jhibo dhimodha dhihikanna ohanyedha ni madhu enaahogoloweliwa dhinoniha musolo wa jhiboya. Teto yowakavihera ale yavuruwana jhibo ndha wihina yawubuwelege madhu a jhiboya. Motajhiha, kasugwa madhu elebiwe va Salmo 115:9-11 enihina: ‘Nyu amwaana Izarayeli mmuroromele Yehova: Oliye di nikavihero nenyu ni yowithithana yenyu. Oo nyumba ya Arawu, mmuroromele Yehova: Oliye di nikavihero nenyu ni yowithithana yenyu. Nyu munamoova Yehova, mmuroromele Yehova: Oliye di nikavihero nenyu ni yowithithana yenyu.’ Onowanda woona makalelo ohogoloweliwa wa madhu ala yamukaviheriwa namiba wakoya mmubuweloni ni mmurimani mwaaye madhu ala?

Mwahaya bwaddi edhe elebiwege? Anamaleba a Bibiliya yowahogolowela wasoriha madhu a thima. Motajhiha, Yehova nuwavaha dhoholela amwaana Izarayeli wodhela muselu wohijha nikame, Yehova omuruma Moyizeji ahogolowela owoga dila dhowinjhivadhene mwahaya bwaddi aliwa kiyahowela ojha nikame. Yehova afuna onihe wi nikame nnatapulela egumi. (Lev. 17:11, 14) Nuuvira mudhidhi, arumiwi ni anamaholela mulogo oJeruzale, nuuleba wodhela ethu makiristawu yahoweliwa werana wihina emuhagalase Yehova obe ethu yahoweliwa orabela wihina yahimukule Yehova, aliwa ohogolowela owoga wodhela muselu worabela ojha nikame. — Dhowera Dhaarumiwi 15:20, 29.     

Ebaribari wi Bibiliya anohogolowela wasoriha madhu mamodhave, mbwenye eyo kinatapulela wi Yehova enafuna wi nahogolowelege wawoga madhu mamodhave. Motajhiha, Yesu ohuwoga egi: “Kamwawogege madhu mamodhave.” (Mat. 6:7) Oliye ahiwoga dhithu nnahowelihu osoriha naalobelaga. (Mat. 6:9-13) Bumwahaya, naarive nihowelaga orabela wawoga madhu mamodha nalobelaga, iyo podi ohogolowela owoga muselu mmodhave naalobelaga. — Mat. 7:7-11.

Dhihikalawo dhithu dhapama dhinamuthukulela Bibiliya ohogolowela wawoga madhu mamodhave — mwaha makalelo apama Yehova aliye namahudhiha munlubale ni analabihedhiye wihina anihudhihe ele eli yapama wa iyo. — Isa. 48:17, 18.