WAKAT kẽere, Biiblã gʋlsdb mi n lebs n togsa goam n yɩlme. Tõe tɩ bũmb a tãab n kɩt tɩ b maan woto. Bɩ d gom bõn-kãens yelle.

Wakat ning b sẽn gʋls gom-kãensa wã. Pĩnd wẽndẽ wã, Israyɛll neb wʋsg ra pa tar Tõogã sebr ye. Sẽn yɩɩd fãa, yaa buudã tõr sẽn wat n tigim taab sɛk-roogẽ wã la b paamd tɩ b karem Tõogã tɩ b kelge. (Tõo. 31:​10-12) Yaa vẽeneg tɩ b sã n wa yas neb kʋʋngã sʋk lɛɛr-dãmb n kelgd karengã, tiisg pa kongd ye. (Nee. 8:​2, 3, 7) Wakat a woto sasa, b sẽn da lebsd n togsd goam nins sẽn tar yõodã n yɩlemdẽ wã ra sõngda nin-buiidã tɩ b tẽr Tõogã goamã la b tũudẽ. B sẽn da lebsd n togsd gom-biis kẽer n yɩlemdẽ wã ra sõngda nin-buiidã tɩ b tẽegd baa yel-bõonesã, wala makre noy nins Wẽnnaam sẽn da kõ bũmb sãnda wɛɛngẽ wã.—Maan. 18:​4-22; Tõo. 5:1.

B sẽn gʋls gom-kãensã to-to wã. Biiblã babs kẽer da yaa yɩɩla. Wala makre, Yɩɩn-sõamyã sebrã, a Salomo yɩɩllã, la Wiisg sebrã. Yɩɩl kẽer tara reesg sẽn lebgd n tẽegd yɩɩllã sẽn gomd bũmb ning yellã, la sẽn sõngd kɛlgdbã tɩ b tẽegd gom-biisã. Wala makre, ges-y goam nins sẽn be Yɩɩn-sõamyã 115:​9-11 pʋgẽ wã. Be b yetame: “Israyɛll neba, teeg-y-yã a Zeova. A yaa yãmb sõangda, la y gãongo. A Aarõ roogã rãmba, teeg-y-yã a Zeova. A yaa yãmb sõangda, la y gãongo. Yãmb a neb nins sẽn zoet a Zeova wã, teeg-y-yã a Zeova. A yaa yãmb sõangda, la y gãongo.” Yãmb pa ne tɩ b sẽn da lebsd n togsd goam kẽer n yɩlemdẽ wã sõngda yɩɩn-yɩɩndbã tɩ gom-kãens sẽn tar yõodã paad b yamẽ wã sɩda?

Bũmb ning sẽn kɩt tɩ b gʋls gom-kãensa wã. Wakat ninga, Biiblã gʋlsdbã mi n lebs n togsa goam nins sẽn tar yõodã n yɩlme. Wala makre, a Zeova sẽn wa n yeel Israyɛll nebã tɩ b ra rɩ zɩɩmã, a kɩtame t’a Moyiiz togs bũmb ning sẽn kɩt t’a yeel woto wã n yɩlme. Wẽnnaam da ratame tɩ b bãng tɩ bõn-vɩɩg vɩɩm bee a zɩɩmẽ wã, rat n yeel tɩ zɩɩmã makda vɩɩmã. (Maan. 17:​11, 14) Kaoosg zugẽ, tẽn-tʋmdbã ne kãsem-dãmbã sẽn da be Zerizalɛmmã sẽn wa n na n wilg bũmb nins kiris-nebã sẽn segd n zãag b mens ne sẽn na yɩl n ta Wẽnnaam yamã, b leb n wilgame tɩ b segd n laka b meng ne zɩɩm.—Tʋʋ. 15:​20, 29.

Baa Biiblã sẽn lebsd n togsd goam kẽer n yɩlemdẽ wã, pa rat n yeel t’a Zeova ratame tɩ d zãms goam sãnda ne zug n lebsd n togsdẽ ye. Wala makre a Zeezi yeelame: “Fo sã n wa pʋʋsdẽ, bɩ f ra togsd goam n yɩlemdẽ ye.” (Mat. 6:7) Rẽ poore a wilga bũmb kẽer d sẽn tõe n pʋʋs n kose. (Mat. 6:​9-13) Rẽnd d sã n wa pʋʋsdẽ d pa na n togsd gom-biis n yɩlemdẽ ye. La d tõe n pʋʋsa bũmb ning wɛɛngẽ naoor wʋsgo.—Mat. 7:​7-11.

Pa zaalem la Wẽnnaam Gomdã sẽn lebs n togs goam kẽer n yɩlmã ye. Yaa bũmb a ye d Karen-saam-kãsengã sẽn tũnugd ne n zãmsd tõnd d meng nafr yĩnga.—Eza. 48:​17, 18.