VAKUA KU SONEKA Mbimbiliya vintsimbu vimo va hilukilile mezi. Tu hilulenu viuma vitatu halumo via va lingisilemo:

Ntsimbu i va sonekele muzimbu. Mu Isaleli ya laza, cingi ca vantu ka va kele na vikopia viavo mpundu via Mezi a Lisiko. Ngeci va kele na kuivua ku tanda ca Lisiko mu va kele na ku likungulula ku tavenakulu. (Ndeu. 31:10-12) Kaha citava halumo kua kele vitanganeso via vingi via kaluuisile ku halakana vuino, ngeci mua ku lana ca mbunga na kuimana viola via vingi. (Neh. 8:2, 3, 7) Ha vintsimbu viaco, ku hilukila mezi halumo ca kuasele vantu ku vuluka visoneka na ku vi ononoka. Ku hilukila amo mezi halumo ca va kuasele ku vuluka vintsina via seho via mu Masiko a va hele Yehova.—Levi. 18:4-22; Ndeu. 5:1.

Sonekesi. Imo mitamba (ni nguetu 10%) ya Mbimbiliya ya pua miaso. Ngeci mua mavulu a Visamo, Muaso ua Solomone na Viniengo. Imo miaso ya kala na mezi a ku taveya, eci ce ku tsindika ha mutue ua muaso na ku kuasa vakua ku halakana ku u patekeya. Ca ku muenako, talenu mezi a ku Visamo 115:9-11 nguayo: “A Isaleli, tsiliela ove muli Yehova: Ikeye ku-va-kuasa cavo na ntelo yavo. A ndzivo ya Alone, tsilielenu muli Yehova: Ikeye ku-va-kuasa cavo na ntelo yavo. Enu vakua ku vuila Yehova vuoma, tsilielenu muli Yehova: Ikeye ku-va-kuasa cavo na ntelo yavo.” Ku hilukila mezi, citava ca kuasele vakua kuimba ku patekela ovu vusunga vua seho.

Ca tondekele ku tsindika vimpande via seho. Vakua ku soneka Mbimbiliya vintsimbu vimo va hilukilile mezi a seho. Ca ku muenako, omo Yehova ua vindikile vaIsaleli kulia maninga, ua lekele Mosesa a hilukile vusunga vua lisiko liaco vintsimbu via vingi. Vusunga vuka? Muono ua muntu ni kasitu ua kala mu maninga, ni nguetu maninga emanena muono. (Levi. 17:11, 14) Mu nima ya ntsimbu, omo vapostolo na vakuluntu mu Yelusalema va tandangele viuma ka vie kuya Yehova ku mutima, va tumbuileho na ku zila ku maninga.—Vili. 15:20, 29.

Vutuhu Mbimbiliya ya hilukila amo mezi, vunoni eci ka ca lombolokele ka pua kalingo-lingo ka ngoco, houe. Muomu Yesu ua handekele ngueni: “Mu ku vundila kati u hilukile-hilukilemo [mu mezi amo lika].” (Mat. 6:7) Kaha ua tumbuile vimo viuma vi tu hasa ku vundila, vize via litombola na cizango ca Njambi. (Mat. 6:9-13) Ngeci mukemuo, vutuhu ka tua pandele ku hilukila mezi amo lika mu civundilo, vunoni citava tu pue na ku hilukila vimpande vimo lika mu vivundilo vietu.—Mat. 7:7-11.

Mua vusunga, kua kala vusunga vua cili, vua lingisa Mbimbiliya ku hilukila-hilukila mezi amo lika. Ku lingamo, ca pua imo ya vinjila via vingi vie ku pangesa Mulongisi uetu ua ku Hiana mu ku tu longesa.—Isaya 48:17, 18.