KEMANTIKA katli kiijkuilojkej Biblia kiompauijkej se keski tlajtoli. Tikitasej eyi tlamantli tlen uelis techpaleuis ma tijmatikaj kenke kiampa kichijkej.

Kema moijkuilok. Uejkajkia amo nochi israeleuanij kipixtoyaj toTeotsij itlanauatiljuaj tlen ueliskia kipouasej ininchaj. San kikakiyayaj kema kipouayayaj ipan tabernáculo uan ipan teokali (Deut. 31:10-12). Uelis amo kuali kitlakakiliyayaj tlen mopouayaya pampa ijkatoyaj miak horas uan itstoyaj ininuaya sekinok (Neh. 8:2, 3, 7). Yeka kema miakpa kikakiyayaj se tlajtoli, kinpaleuiyaya ma kiilnamiktokaj uan ma kichiuakaj. Uan pampa kiompauiyayaj se keski tlajtoli, kinpaleuiyaya kuali ma kikuamachilikaj se tlanauatili o sekinok tlamantli tlen tlauel ipati (Lev. 18:4-22; Deut. 5:1).

Kej moijkuilok. Ipan Biblia ijkuilijtok miak uikatl, kej tlen uala ipan Salmos, El Cantar de los Cantares, uan Lamentaciones. Se keski tlen nopa uikatl kipia tlen moompauia. Kiampa kichiuayayaj pampa kinekiyayaj kipankixtisej tlen tlauel ipati uan nima ma kitsontekontlalikaj tlen kiijtouayaya nopa uikatl. Kiampa kichijkej kema kiijkuilojkej Salmo 115:9-11: “¡Inisraelitajmej, ximotemachikaj ipan TOTEKO, pampa san yajaya inmechpaleuia uan inmechmanauia tlen nochi tlamantli tlen axkuali! Intotajtsitsij tlen ininixuiuaj Aarón uan ininaxkauaj TOTEKO, ximotemachikaj ipan ya, pampa san yajaya inmechpaleuia uan inmechmanauia tlen nochi tlamantli tlen axkuali. Nochi inmojuantij tlen inkiimakasij uan inkitlepanitaj TOTEKO ximotemachikaj ipan ya, pampa san yajaya inmechpaleuia uan inmechmanauia tlen nochi tlamantli tlen axkuali”. Kema se akajya uikayaya nopa uikatl, nima kitsontekontlaliyaya tlen kiijtouayaya uan asiyaya ipan iyolo.

Kenke moijkuilok. Se keskij katli kiijkuilojkej Biblia kiompauijkej se keski tlajtoli tlen tlauel ipati, pampa kinekiyayaj kipankixtisej. Se neskayotl, kema Jehová kiniljuik israeleuanij amo ma kikuakaj estli, kichijki Moisés ma kiompaui kenke kinnauatijtoya nopa tlamantli. ToTeotsij kinekiyaya ma kikuamachilikaj estli kiixnextia nemilistli (Lev. 17:11, 14). Teipa, kema apóstoles uan ueuejtlakamej tlen Jerusalén kiijtojkej tlen amo moneki tijchiuasej tlaj tijnekij tijyolpakiltisej Jehová, sampa kiijtojkej moneki kuali tijtekiuisej estli (Hech. 15:20, 29).

Maske ipan Biblia moompauia se keski tlajtoli, nopa amo kiijtosneki Jehová kineki ma tikompauikaj. Jesús kiijtok: “Kema timomaijtos, amo san xikojompauijto tlen tijtsontekontlalijtok” (Mat. 6:7). Nojkia kiijtok tlake ueliskia tijtlajtlanisej toTeotsij kema timomaijtosej (Mat. 6:9-13). Maske kema timomaijtouaj amo tikojompauiaj tlen tikijtouaj, kena uelis miakpa tikiljuisej Jehová se keski tlamantli tlen tijnekisej (Mat. 7:7-11).

Tlauel kuali pampa ipan Biblia moompauia se keski tlajtoli. Ni eli se tlamantli tlen Jehová kitekiuia pampa kineki kuali techmachtis (Is. 48:17, 18).