AKIN kijkuilojkej Biblia kijtouayaj miakpa seki tajtolmej, uan kemansa hasta sejse tajtol miakpa kijtouayaj. ¿Keyej ijkon kichiuayaj? Maj tikitakan eyi taman tein kinextia keyej xa ijkon kichiuayaj:

Keman moijkuiloj. Keman nemiaj israelitas miakej amo kipiayaj se copia kampa ijkuiliujtoya Tanauatil. Nochipa kikakiaj keman mosentiliayaj para kinixtajtoltiliskej iniuan okseki israelitas itech takenkal uan itech templo (Deut. 31:​10-12). Tikmatij ke keman miak horas ijkatoyaj iniuan oksekin, xa miak taman kintapololtiaya (Neh. 8:​2, 3, 7). Sayoj ke, keman miakpa kikakiaj nejin tajtolmej kinpaleuiaya maj kielnamikikan uan maj kichiuakan. Uan keman miakpa moijtouaya teisa semi kinpaleuiaya, uan okachiok keman kiniluiayaj maj kichiuakan miak taman, kemej tein kiixtaliaya Jehová uan tein kinnauatiaya (Lev. 18:​4-22; Deut. 5:1).

Kemej moijkuiloj. Biblia kipia seki nekuikatilmej kemej Salmos, El Cantar de los Cantares uan Lamentaciones. Uan seki kipiayaj estribillo. Nejin tajtolmej tein miakpa moijtouaya, tapaleuiaya maj moajsikamati toni ika tajtouaya nekuikatil uan maj niman kielnamikinij. Para tikajsikamatiskej, maj tikitakan Salmo 115:​9-11: “Israelitas, xitakuaujtamatikan iuan Jehová. (Yejua namechpaleuia uan yejua namoescudo). Ichankauan Aarón, xitakuaujtamatikan iuan Jehová. (Yejua namechpaleuia uan yejua namoescudo). Namejuan akin nankimojkatokaj Jehová, xitakuaujtamatikan iuan Jehová. (Yejua namechpaleuia uan yejua namoescudo)”. Keman aksa mokuikatiaya nejin nekuikatil, xa kipaleuiaya maj amo kielkaua nejon tajtolmej tein tel kualtsitsin.

Keyej moijkuiloj. Kemansa sekin akin kijkuilojkej Biblia, miakpa kijtouayaj se tajtol tein motelnekia. Keman Jehová kiniluij israelitas maj amo kikuakan esti, kichiuak maj Moisés miakpa kiniluiani keyej ijkon kinnauatiaya. Dios kinekia maj kiajsikamatikan ke esti kichiua maj tiyoltokan (Lev. 17:​11, 14). Miak xiujmej satepan, keman tatitanilmej uan tayekananij de Jerusalén ika tajtojkej seki taman tein amo moneki tikchiuaskej komo tiknekij tikyolpaktiskej Dios, oksepa kijtojkej ke amo moneki tikuiskej esti (Hech. 15:​20, 29).

Maski kemansa Biblia miakpa kijtoua teisa, nejon amo kijtosneki ke Jehová kineki maj miakpa tikijtokan seki tajtolmej tein Biblia kijtoua. Jesús kijtoj: “Keman timotataujtis, amo miakpa xikijto sayoj se taman” (Mat. 6:7). Uan no kijtoj miak taman tein uelis tiktajtaniskej Jehová keman tiktataujtiskej uan tein kiyolpaktis (Mat. 6:​9-13). Maski keman tiktataujtiaj Jehová, amo miakpa tikijtouaj seki tajtolmej, seki taman kemaj uelis miakpa tiktajtaniskej (Mat. 7:​7-11).

¡Tel kuali keman Biblia miakpa kijtoua seki tajtolmej! Nejin se taman tein kichiua toUeyi Tamachtijkauj para okachi techpaleuis tein techmachtia (Is. 48:​17, 18).