VATARI vo Bhaibheri mukuvo jimweni vakaphinda kutara magama akaezana, gama ngo gama. Vonanyi mathangwe matatu okuti kangaije akaitisa kuti ivona vaite izvi:

Mukuvo wo zvakatahwa. Ku Iziraeri yo kare, vandhu vakawanda avacaengepi no makhopi o mutemo kuti vakwanise kumashandisa pacavo. Kazinji ivona vaizwa mutemo paya pokuti jinja rese raiungana pamberi po tabhernake. (Deuteronòmio 31:​10-12) Zvingaita kuti pamugariro iji zvaizova zvakareruka kuti vandhu vaphingaijike pamukuvo wovaizwari mutemo weciverengwa ko nguva jakawanda pakati po vandhu vazinji. (Neemia 8:​2, 3, 7) Ngo kudaro, kuti vandhu vazokwanise kuceukija zvainga zvaverengwa no kuzvishandisa mu upenyu hwavo, zvaisisira kuti magama aphindhwe no kuphindhwa. Kuphindwa uku kwaaithwari kwaibesera kuti vandhu vanase kuceukija mutemo jimweni jaibatanija zvizinji.—VaLevi 18:​4-22; Deuteronòmio 5:1.

Manera o zvakatahwa. Mativi amweni o Bhaibheri akatahwa inga mumbo, inga muezaniso, mabhuku a Nduyo, Ndumbo ja Soromona no Macumbiro. Nguva jimwe ndumbo iji jina divi ro mupingura pamwe, izvo zvinojekesa musoro wo ndumboyo no kubeseravo vaya vari kuzwa kuti vakwanise kuceukija magama. Inga muezaniso, sotanyi magama anowanika pana Nduyo 115:​9-11 iyona inoti: “VaIsraeli, gondanyi Tenji Mwari: ndiyena mubeseri no muthaviri wenyu! Vo mbhuri ya Aroni, gondanyi Tenji Mwari; ndiyena mubeseri no muthaviri wenyu.” Makwanisa kuvona kuti kuphindhwa kwakaithwa magama aya kwaizobesera kudini kuti vaimbi vavige maretera mu mwoyo?

Ngenyi zvakatahwa? Vatari vo Bhaibheri njiku jimweni vakaphindha magama aisisira maningi. Inga muezaniso, Jehovha paakavhunja Vaiziraeri kuti vatame kuha ngazi, iyena wakavhunja Mosi kuti aphinde no kuphinda mathangwe akona. Mwari waida kunasa kujekesa kuti ngazi inoimirira upenyu. (VaLevi 17:​11, 14) Pakufamba ko nguva Vapostori pomwe no vakuru ku Jerusarema pavakatara ngo zviro zvokuti Makristu aizozviita kuti akwanise kudakajisa Mwari kana kuti zvavaidikana kungwarira kuti vatame kumunyangajisa, ivona vakaphindazve dikano yokutama kushandisa ngazi.—Mabasa o Vapostori 15:​20, 29.

Ngo zvokadi kuti mu Bhaibheri muno magama akawanda akaphindhwa asi izvi azvirevi kuti Mwari anoda kuti itusu tiphindhe no kuphindha kazinji magama aya. Inga muezaniso, Jesu wakati: “Paunoita mukumbiro, ucandophinda-phinda magama ondhowo.” (Mateu 6:7) Iyena wakanangazve zviro zvokuti tingazvibatanijavo pamukumbiro jedu. (Mateu 6:​9-13) Pikija atingaiti mukumbiro teciphindha no kuphindha magama ndhowo basi, itusu tingaita mukumbiro tecibhuya ngo pamusoro po shwiro jakafanana.—Mateu 7:​7-11.

Pano matwangwe anoitisa kuti Soko ra Mwari riphinde no kuphinda magama amweni. Ndi imwe njira inoshandisa Mujijisi wedu Mukuru Jehovha kuti atijijise zviro zvaushoni kwatiri.—Isaia 48:​17, 18