AANYOLI yOmbiimbeli olundji ohaya endulula omautumbulilo ngoka ga popi nale kuyakwawo. Tala iinima itatu mbyoka tashi vulika ya ningitha aanyoli ya ninge ngawo:

Pethimbo ya nyolwa. MuIsraeli shonale, aantu oyendji kaya li ye na ookopi dhOmpango. Olundji oya li owala haya uvu Ompango tayi leshwa, ngele oshigwana ashihe sha ka gongala ketsalihangano. (Deut. 31:10-12) Uuna ya thikama taya pulakene ye li engathithi enene uule woowili dhontumba, otashi vulika pwa li hapu kala omapiyaganeko. (Neh. 8:2, 3, 7) Poompito dha tya ngaaka, omautumbulilo ga simana oga li haga endululwa, opo shi kale oshipu kaantu okudhimbulukwa omanyolo noku ga tula miilonga. Okweendulula omautumbulilo gontumba okwa li haku ya kwathele lela, ya dhimbulukwe uuyelele wu na ko nasha noompango ndhoka Jehova e ya pa. — Lev. 18:4-22; Deut. 5:1.

Omukalo moka ya nyolwa. Oopelesenda 10 lwaampono dhOmbiimbeli odha thikama po momaimbilo, mwa kwatelwa omambo gOmapisalomi, Ondjimbolela nosho wo Oontakumandjimbo. Omathimbo gamwe momaimbilo ohamu longithwa oohapu dha iyendulula, ndhoka tadhi tsu omuthindo enenedhiladhilo lyeimbilo notadhi kwathele aapulakeni ye dhi koneke. Pashiholelwa, tala oohapu ndhoka tadhi adhika mEpisalomi 115:9-11, tadhi ti: “Ne Aaisraeli, inekeleni Omuwa. Oye ote mu kwatha note mu gamene. Ne yomezimo lyaAaron, inekeleni Omuwa. Oye ote mu kwatha note mu gamene. Ne mboka hamu mu tila, inekeleni Omuwa. Oye ote mu kwatha note mu gamene.” Mbela owu wete ngaa nkene oohapu ndhoka dha endululwa dha li dha kwathele aaimbi ya kaleke oohapu ndhoka momadhiladhilo nomomitima dhawo?

Okutsa omuthindo iitsa ya simana. Aanyoli yOmbiimbeli omathimbo gamwe ohaya endulula omautumbulilo ngoka ga simanenena. Pashiholelwa, sho Jehova a li a lombwele Aaisraeli kaaya lye ombinzi, Moses okwa li a endulula lwiikando oyindji etompelo kutya omolwashike kaaye na oku yi lya. Kalunga okwa li a hala okutsa omuthindo kutya omwenyo gwomomayulu ogwa kala mombinzi, sha hala kutya ombinzi oyi lile po omwenyo. (Lev. 17:11, 14) Lwanima, sho aayapostoli naakuluntu yomuJerusalem ya nyola iinima mbyoka Aakriste ye na okuyanda, opo ya hokiwe kuKalunga, oya li ishewe ya tsu omuthindo kutya osha simana okuyanda ombinzi. — Iil. 15:20, 29.

Nonando Ombiimbeli oyi iyendulula, shoka itashi ti kutya Jehova okwa hala tu shi ninge omukalondjigilile okukala hatu endulula omautumbulilo gomOmbiimbeli. Pashiholelwa, Jesus okwa ti: “Uuna to galikana, ino endulula iinima ya faathana lwiikando niikando.” (Mat. 6:7) Opo nduno okwa tumbula iinima mbyoka tatu vulu okugalikana kombinga yayo, mbyoka tayi tsu kumwe nehalo lyaKalunga. (Mat. 6:9-13) Ano nonando katu na okweendulula oohapu dha faathana momagalikano getu, otatu vulu okugalikana kombinga yiinima mbyoka a tumbula. — Mat. 7:7-11.

Kalunga okwe shi ninga netompelo ewanawa, sho a nwetha mo Oohapu dhe dhi endulule iitya nomautumbulilo gontumba. Ngoka ogo gumwe gwomomikalo odhindji moka Omulongi gwetu Omunene he tu longo shoka tashi tu opalele. — Jes. 48:17, 18.