AKIN okijkuilojkej Biblia kemantika san noyejua tlajtoltin okimijkuilojkej. ¿Tleka ijkon okichiujkej? Matiknankilikan yeyi tlemach tlen techpaleuis matikasikamatikan yejon.

Kemanon onoijkuilo. Yeuejkaui, miyekej israelitas xkipiayaj se copia itech Tlanauatijli, kuakon, yejuamej san kikakiyaj Tlanauatijli ijkuak nopouaya ipan tabernáculo niman ipan teopan (Deut. 31:​10-12). Kemantika kintekiyomakaya kuajli tlakaktoskej pampa ijkuak nosentlaliayaj, uejkauiyaj notelketstoyaj, melak tojlan katka niman onkatka miyek tlajtlamach tlen xkinkauiliaya kuajli matlakaktokan (Neh. 8:​2, 3, 7). Niman ijkuak itlaj miyekpa noteneuaya, kinpaleuiyaya israelitas maka nimantsin makilkauakan tlen kikakiyaj niman ijkon ueliskiaj kichiuaskiaj tlen ueliyaj. Niman ijkuak kimijliayaj nochi itlanauatiluan Jehová niman nochi tlen yejua kinekiya makichiuakan, más miyekpa kinteneuayaj niman ijkon más kuajli makimasikamatikan (Lev. 18:​4-22; Deut. 5:1).

Kenijki onoijkuilo. Biblia kinpiya miyek tlakuikaltin. Ipan Salmos, El Cantar de los Cantares niman Lamentaciones miyek tikinnextiaj. Tlakuikaltin kipiyaj tlen kitokayotiaj estribillo. Ipan estribillo noteneuaj tlajtoltin tlen miyekpa noijtoua ipan tlakuikaltin niman ijkon uelis tikintsontekontlalis. San matikteneuakan se tlakuikajli tlen tiknextiaj ipan Salmo 115:​9-11, ompa ijkin kijtoua: “Pero nemejuamej chanejkej ne Israel, xtlalikan nemoyojlo itech toTEKO. Yejua mechpaleuiya niman mechmanauiya. Niman nemejuamej tiopixkej, xtlalikan nemoyojlo itech toTEKO. Yejua mechpaleuiya niman mechmanauiya. Nemejuamej yejuan nenkitlakaitaj toTEKO, xtlalikan nemoyojlo yejua itech. Yejua mechpaleuiya niman mechmanauiya”. Ijkuak yakaj nokuikatiaya yejuin kualtsin tlakuikajli, nimantsin kitsontekontlaliaya tlen ompa noijtouaya.

Tleka onoijkuilo. Akin okijkuilojkej Biblia miyekpa okinteneujkej seki tlajtoltin para ijkon maka nimantsin kilkauaskiaj akin kiamapouaskiaj. Jehová noijki ijkon okichiuj ijkuak okimijli israelitas maka makikuakan yestli. Yejua okichiuj ika Moisés miyekpa makimijli yejon tlanauatijli pampa kinekiya makasikamatikan ika ipampa yestli, ueli tinemij niman ika melak kipatiojkaitaya (Lev. 17:​11, 14). Sakin, apóstoles niman tlayekankej akin chantiyaj Jerusalén oksejpa okijtojkej ika tla tiknekiyaj tikyolpaktiskej toTajtsin, xnonekiya tijkuaskej yestli (Hech. 15:​20, 29).

Maski kemantika Biblia miyekpa sa no yejua tlajtoltin kinteneua, xkijtosneki tla Jehová kineki nochipa san yejon matikijtotokan. Hasta Jesús okijto: “Ijkuak nenkichiuaskej oración, maka miyekpa san noyejua tlajtojli nenkijtoskej” (Mat. 6:7). Yejua okijto tlenon uelis tikijliskej Jehová ijkuak tiknotsaskej (Mat. 6:​9-13). Maski tejuamej uelis miyekpa itlaj tikijliskej Jehová, xnoneki san noijki tlajtoltin tikijtoskej (Mat. 7:​7-11).

Melak kuajli ika Biblia miyekpa san noijki tlajtoltin kinteneua. Jehová, toUeyi Tlamachtijkauj, ijkon kichiua pampa kineki kuajli techmachtis niman ijkon kuajli matinemikan (Is. 48:​17, 18).