IRA sanura Sura Niʼamoniʼö, itaria latötöi ngawua wehede si fagölö mato hauga kali. Nehegö tölu dane-dane wa tola lafalua daʼö:

Inötö me musura wehede andrö. Ba götö ndraono Gizaraʼeli me föna, ato sibai niha si lö mangokhögö zi Fulu oroisa si no musali. Si toʼölönia, larongo goroisa daʼö na labaso ba ginötö owulo ira ba nose Lowalangi mazui ba gosali. (5 Mo. 31:10-12) Me luo daʼö, mosindro-sindro manö ira mato hauga za ba simanö göi niha böʼö, ba tatu manö oya zamangoloi fangera-ngerara. (Neh. 8:2, 3, 7) Börö daʼö, na lafuli latötöi duho-tuhonia, abölö aoha ba niha samondrongo irege lö olifu ira ba lafalua zi no larongo andrö. Tobali göi fanolora na lafuli latötöi irege lö olifu ira ngawalö nidunö-dunö ba goroisa Yehowa.—3 Mo. 18:4-22; 5 Mo. 5:1.

Lagu ba wanura yaʼia. Arakhagö 10 persen nösi Zura Niʼamoniʼö yaʼia daʼö sinunö. Duma-dumania buku Zinunö, Sinunö Sebua hegöi Ngenu-Ngenu Yeremia. So ösa zinunö lafuli-fuli furi wanötöi yaʼia, enaʼö laʼila nösi zinunö daʼö ba alio latanö ba dödöra ngawua wehede zinunönia. Duma-dumania, nehegö nösi Zinunö 115:9-11, ”Yaʼami iraono Gizaraʼeli, mifaduhusi tödö Yehowa; Yaʼia zanolo yaʼami ba balusemi ia. Yaʼami ngaʼötö Gaʼaroni, mifaduhusi tödö Yehowa; Yaʼia zanolo yaʼami ba balusemi ia. Yaʼami sangataʼufi Yehowa, mifaduhusi tödö Yehowa; Yaʼia zanolo yaʼami ba balusemi ia.” Börö me so ngawua wehede nifuli-fuli furi, sindruhu si tesöndra ba ngawua wehede daʼö tatu manö abölö tofakha ia ba wangera-ngera hegöi ba dödö niha soʼanunöisi.

Ohitö dödö wa lasura daʼö. So ösa zanura ösi Zura Niʼamoniʼö, itaria lafuli latötöi ngawua wehede sabölö moguna. Duma-dumania, me iʼandrö Yehowa ba ndraono Gizaraʼeli enaʼö böi laʼa ndro, ifatunö hadia mbörö ba iʼogunaʼö Moze ba wanötöi daʼö mato hauga kali. Omasi Yehowa ba wangombakha wa fefu noso zaliwa-liwa ba danö, bakha ba ndro so nosonia. Mazui eluaha tanö böʼönia, do andrö fagölö ia waʼauri. (3 Mo. 17:11, 14) Ba gafuriata, me owulo ndra sinenge hegöi ira satua sokubaloi ba Yeruzalema, latötöi hadia manö zinangea laʼaröuʼö si lö möi fangomuso dödö Lowalangi. Daʼö mbörö wa lafuli latötöi enaʼö taʼaröuʼö ita moroi ba ndro.—Hal. 15:20, 29.

Hewaʼae oya nifuli nitötöi bakha ba Zura Niʼamoniʼö, tenga daʼö geluahania iʼandrö khöda Yehowa enaʼö tafuli tatötöi ngawua wehede si fagölö ba Zura Niʼamoniʼö simane nifalua niha sato. Imane Yesu, ”Na mangandrö ami, böi mifuli mitötöi wehede si no mitötöi mege.” (Mat. 6:7) Aefa daʼö, ifuli itötöi hadia manö duho-tuho si tola taʼohe ba wangandröda si tefaudu ba zomasi Lowalangi. (Mat. 6:9-13) Börö daʼö, hewaʼae na lö tafuli tatötöi ngawua wehede si fagölö na mangandrö ita, hizaʼi tola tafuli-fuli taʼohe ba wangandröda duho si fagölö.—Mat. 7:7-11.

Ba daʼa taʼila hadia mbörö wa ifuli itötöi ngawua wehede si fagölö bakha ba Daromali Lowalangi. Daʼö sambua lala nifalua Yehowa khöda, Samahaʼö Sebua, ba wamahaʼö yaʼita ba ngawalö zoguna khöda.—Yes. 48:17, 18.