ABATLOLI beBhayibheli ngezinye iinkhathi bebabuyelela amezwi namkha imitjho eminengi ngendlela efanako. Cabanga ngamabanga amathathu okungenzeka enza abatlolaba benze njalo:

Isikhathi okwatlolwa ngaso. Ngesikhathi saka-Israyeli wakade, abantu abanengi bebanganawo amakhophi womThetho ekungewabo. Abanengi bebezwa umThetho ufundwa lokha isitjhaba nasihlangene soke eThabarnakeli. (Dut. 31:​10-12) Kungenzeka ukuthi bekuneenthikamezo ezinengi njengombana balalele bajame nangeenyawo, amawara amanengi esiqubuthwini esikhulu. (Nerh. 8:​2, 3, 7) Ngezinye iinkhathi, ukubuyelela imitjho eyihloko bekwenza kube lula ngabantu ukuthi bakhumbule imitlolo bebayisebenzise. Ukubuyelela amezwi athileko bekuzobasiza khulu bakhumbule imininingwana eqakathekileko, njengemiThetho kaJehova abanikelwa yona.—Lev. 18:​4-22; Dut. 5:1.

Indlela yokutlola. Iingcenye ezingaba maphesenti alitjhumi zeBhayibheli zineengoma—kuhlanganise incwadi yeRhubo, Ingoma Yeengoma neSililo. Ngezinye iinkhathi, iingoma bezinamabizo abuyelelwako, lokho bekugandelela isihloko sengoma begodu kusiza abalaleleko bakhumbule amezwi wakhona. Ngokwesibonelo, tjheja amezwi afumaneka kuRhubo 115:​9-11: “Maye! Israyeli, thembela kuJehova—Ulisizo lakho nesiviko sakho. Maye! Nzukulwana zaka-Aroni, thembelani kuJehova—Ulisizo lakho nesiviko sakho. Nina enisaba uJehova, thembelani kuJehova—Ulisizo lakho nesiviko sakho.” Kghani uyabona ukuthi ukubuyelela amezwi la bekuzobasiza kangangani abantu ababhinako ukuthi bakhumbule amaqiniso aligugu la begodu ahlale asehlizwenabo?

Ngebanga lokugandelela izinto eziqakathekileko. Ngezinye iinkhathi, abatloli beBhayibheli babuyelela amezwi aqakathekileko. Ngokwesibonelo, lokha uJehova nakatjela ama-Israyeli ukuthi angadli iingazi, watjela uMosi ukuthi abuyelele iinkhathi ezinengi. UZimu bekafuna ukugandelela ukuthi ukuphila kuseengazini, nokuthi iingazi zijamela ukuphila. (Lev. 17:​11, 14) Ekukhambeni kwesikhathi lokha abapostoli nabadala beJerusalema nabaveza iindlela eziqakathekileko ezingathabisi uZimu, bagandelela godu itlhogeko yokungathinti iingazi.—IzE. 15:​20, 29.

Nanyana iBhayibheli lizibuyelela, lokho akutjho ukuthi uJehova ufuna nathi sikwenze umukghwa ukubuyelela amezwi athileko aseBhayibhelini. Ngokwesibonelo, uJesu wathi: “Nawuthandazako, ungasolo ubuyelela into yinye kanengi.” (Mat. 6:7) Waveza nezinto esingazithandazela ezivumelana nentando kaZimu. (Mat. 6:​9-13) Nanyana singabuyeleli amezwi afanako kanengi emthandazwenethu, kukhona ezinye iinhloko namkha izinto esingathandaza ngazo esingazibuyelela.—Mat. 7:​7-11.

Kungebanga elihle ukuthi uZimu aphefumulele bona kubuyelelwe amezwi namkha imitjho ethileko. Kungenye yeendlela ezinengi uMfundisethu Omkhulu asifundisa ngayo bona sizuze.—Isa. 48:​17, 18.