NTHAWI ziyakine olemba Baibo enzolemba mau amozimozi mowelezhyawelezhya. Onani vifukwa vitatu vamene payakine niye veŵapangisha kucita izi.

Nthawi peyelembewa. M’nthawi ya Aisiraeli, ŵanthu anyinji enzeve makope a Cilamulo. Kanyinji-kanyinji, ove enzomvwishila ku Cilamulo pecenzoŵelengewa ngati ŵanthu asonkhana pamozi monga mtundu ku cihema. (Deut. 31:​10-12) Pofwana kuti enzopanama kwa nthawi itali ndipo kwenzonkhala ŵanthu anyinji, cuoneka kuti penzonkhala vinthu vosokoneza kuti amvwishile. (Neh. 8:​2, 3, 7) Pa vocitika voteti, kuwelezhya mau ofunika ngako kwenzoyavya ŵanthu kukumbukila malemba noyaseŵenzesha. Kuwelezhya mau ayakine, kwenzoŵayavya makamaka kuti amvwishe bwino Cilamulo.—Lev. 18:​4-22; Deut. 5:1.

Mweyelembewela. Pafupifupi 10 pelesenti ya mabuku a m’Baibo ni nyimbo. Mabuku aŵa oyangizhyilapo buku ya Masalimo, Nyimbo ya Solomo na Maliro. Nthawi ziyakine, nyimbo izi zenzonkhala na mau amene enzolembewa mowelezhyawelezhya. Izi zenzogogomezela nkhani ikulu ya nyimbo ndipo zenzoyavya omvwishila kukumbukila mau. Mwacisanzo, onani mau opezeka pa Salimo 115:​9-11 akuti: “Weo Isiraeli, khulupilila Yehova. Yove niye thandizo yako na cishango cako. Mweo a m’ng’anda ya Aroni, khulupililani Yehova. Yove niye thandizo yanu na cishango canu. Mweo muyopa Yehova, khulupililani Yehova. Yove niye thandizo yanu na cishango canu.” Kuwelezhya mau aŵa kwenzoyavya oimba kukumbukila mau a nyimbo pa mtima.

Cifukwa cake yelembewa. Nthawi ziyakine olemba Baibo enzowelezhyawelezhya mau ofunika ngako. Mwacisanzo, Yehova pecilamula Aisiraeli kuti akopewa milopa, euzhya Mose kuŵauzhya cifukwa cake mowelezhyawelezhya. Mulungu enzofuna kugogomezela mfundo yakuti moyo wa nyama uli mu milopa, zamene zutanthauza kuti milopa yupanamila moyo. (Lev. 17:​11, 14) Pavuli pake, atumwi na akulu ku Yerusalemu peenzofotokoza zinthu zakufunika kupewa Akhristu kuti akondweleshe Mulungu, egogomezela soti nkhani yofunika kupewa milopa.—Mac. 15:​20, 29.

Olo kuti Baibo ili na mau amene elembewa mowelezhyawelezhya, zutanthauza lini kuti Yehova ofuna kuti tinkhale na ciyoŵelezi cokamba mau a m’Baibo mowelezhyawelezhya. Mwacisanzo, Yesu elaŵila kuti: “Popemphela osati ukolaŵila zinthu mowelezhyawelezhya.” (Mat. 6:7) Pavuli pake, efotokoza soti vinthu vatingapemphelele mokatizhyana na cifunilo ca Mulungu. (Mat. 6:​9-13) Tetyo, olo kuti tufunika lini kulaŵila mau mowelezhyawelezhya m’mapemphelo ŵasu, tingapemphelele nkhani imozimozi mowelezhyawelezhya.—Mat. 7:​7-11.

Pa cifukwa cabwino, mau ayakine a m’Baibo elembewa mowelezhyawelezhya. Iyi ni imozi mwa njila zinyinji zamene Mlangizi wasu Mkulu otiphunzisilamo kuti tipindule.—Yes. 48:​17, 18.