NTHAWE ziyakine, ŵanthu ayakine amene elemba Mawu a Mulungu enzewelejela mawu ŵamo na ŵamo polemba Baibolo. Onani vifukwa vitatu vamene payakine niye vechitisha olemba Baibolo kuti achite vamene ivo:

Nthawe yechilembewa mawu amene awo. Mu nthawe ya Isiraeli wakale, ŵanthu anyinji enzenkhalalini na buku ya Chilamulo kuti akoikatishila ntchito. Kanyinji-kanyinji, ŵanthu enzenkhala na mwayi wakumvwa kuŵelengewa kwa Chilamulo akasonkhana pamozi pa chitenti cha Mulungu. (Deut. 31:10-12) Vuwoneka kuti pa nthawe yamene iyo venze vosavuta ngako kuti maganizo aŵanthu akoyenda-yenda chifukwa chonkhala ali pulu kwa maawazi anyinji kuti amvwishile Chilamulo komasoti pakati pa gulu ikulu ya ŵanthu. (Neh. 8:2, 3, 7) Kuwelejela mawu ayakine, kwenze kofunika ngako kuti ŵanthu akokwanisha kukumbukila mawu ayakine am’Chilamulo amene enzepamikijapo vinthu vinyinji. Kuchita vamene ivo, sembe kweyavya ngako ŵanthu kukumbukila nkhani zofunika ngako, monga ushamwali wawo na Mulungu komasoti vigamulo vake.—Lev. 18:4-22; Deut. 5:1.

Mwechiŵalembela. Mbali ziyakine za m’Baibolo zilembewa monga ni nyimbo, mwachisanzo—pali buku ya Masalimo, nyimbo ya Solomo, komasoti ya Maliro. Nyimbo ziyakine zili na makolasi amene owelejela mawu amo na ŵamo amene osimikijila ngako mutu wa nyimbo vamene vuyavwa ŵanthu kuti akokwanisha kukumbukila mawu ŵake. Mwachisanzo, onani mawu amene ali pa Salimo 115:9-11 amene onena kuti: “Mwewo Aisiraeli, khulupililani Yehova—wamene niye okuyavyani komasoti ni chishango chanu. Mwewo a mng’anda ya Aroni, khulupililani Yehova—yove niye wamene okuyavyani komasoti ni chishango chanu. Mwewo amene muyopa Yehova, khulupililani Yehova—yove niye wamene okuyavyani komasoti ni chishango chanu.” Kansi mwewo mukwanisha kuwona kuti kuwelejela mawu amo na wamo kwamene uku sembe kweyavya oimba kuti akokwanisha kukumbukila mawu amene awo m’maganizo komasoti m’mitima yawo?

Kuwama kosimikijila ngako mawu ayakine. Nthawe ziyakine olemba Baibolo enzesankha kuwelejela mawu ofunika ngako. Mwachisanzo, Yehova pechipeleka lamulo kuli Aisiraeli yoŵalesha kulya milopa, yove euja Mose kuti awelejele lamulo yamene iyo kwa maulwendo anyinji ngako. Mulungu enzefuna kusimikijila ngako kuti milopa yupanamila moyo. (Lev. 17:11, 14) Pavuli pake, atumwi komasoti akulu aku Yerusalemu penzelemba vokhuza vangachite Akhilisitu kuti akokondwelesha Yehova nopewa kumukhudwisa, ove esimikijila ngako nkhani ya kufunika kopewa kulya milopa.—Mach. 15:20, 29.

N’chendi kuti Babolo nthawe zinyinji yuwelejela mawu amo na ŵamo, koma vamene ivi vutanthauzalini kuti Yehova ofuna kuti tikowelejela mawu amo na ŵamo nthawe zonse. Mwachisanzo, Yesu enena kuti: “Wewo popemphela osalaŵila vinthu moweleja-weleja.” (Mat. 6:7) Pavuli pake, yove elaŵila vinthu vokatijana na vakufuna Mulungu vamene tufunika kuvitomola m’mapemphelo ŵasu. (Mat. 6:9-13) Chifukwa cha vamene ivi, sewo tupewa kuwelejela mawu amo na ŵamo m’mapemphelo ŵasu, koma tilisoti na ufulu wotomola mfundo imozi moweleja-weleja m’mapemphelo ŵasu.—Mat. 7:7-11.

Baibolo yutomola mawu amozi moweleja-weleja pavifukwa viweme. Yamene iyi, ni imozi mwa njila zamene Yehova Mulangizi wasu nkulu zakukatishila ntchito potiphunzisa vinthu vamene ni viweme kuli sewo.—Yes. 48:17, 18.