VOKWAHONEKA Ombimbiliya, ponohika mbumwe vawana-wana onondaka. Tala ovipuka vitatu mokutala vievetwaile kokulinga ngootyo:

Pomuvo tyalingilwe. Ova Isilayeli ovanyingi ankho vetupu omukanda Wovitumino. Ovitumino ankho veviiva umwe vala tyina vameliongiya pekaka liefendelo, avitangwa. (Epal. 31:​10-12) Mokutala ankho tyina ovanthu vameliongiya ovanyingi, avakala onoola ononyingi lutai, vapondola okutalukwa, tyimwe atyivelambe. (Nee. 8:​2, 3, 7) Pomivo viatyo ngoopo, okupopia otyipuka, otyipaleka vali, novanthu opo haa vetyihinangela, avetyivili okutyilandula. Okuwana-wana onondaka mbumwe, ankho otyo tyikwatesako ovanthu okuhinangela ovitumino vya Huku vivelulika nthiki na nthiki, no monomphela. — Lev. 18:​4-22; Epal. 5:1.

Opi tyalingwa-lingwa? Onotesitu mbumwe mbuli m’Ombimbiliya, oviimbo, ngoombu ñgaa: Oviimbo, Otyiimbo Tya Salomau, Onongengeya. Oviimbo vimwe, vina umwe apa omunthu awana vala onondaka mbwike, opo ava veketyitehela vehetyilimbwe. Nkhele tala vala onondaka mbaenda ngootyo m’Oviimbo 115:​9-11: “Ove Isilayeli yumba onthumbi mu Siovaa, — Oe ukukwatesako, oe ondyakulilo yove. Ove umbo lya Alau yumba onthumbi mu Siovaa, — Oe ukukwatesako, oe ondyakulilo yove. Onwe vokuna owoma na Siovaa yumbei onthumbi mu Siovaa, — Oe umukwatesako, oe ondyakulilo yenyi.” Pahe wetyimona? Okuwana-wana onondaka ankho tyikwatesako vokwiimba, otyili tya Huku atyivekala umwe komutima!

Oityi tyalingilwa? Vokwahoneka Ombimbiliya, pamwe vawanaine onondaka ovanthu vahapondola okulimbwa. Pweetyi Siovaa apa ova Isilayeli otyitumino tyokuti kavapondola okulia ohonde, Mwisesi wawanaine-po ehimbwe, omokonda yatyi vahalila ohonde. (Lev. 17:​11, 14) Etyi ovatumwa, novakulu mo Selusalei vatuma omukanda momawaneno upopia evi ovanthu vena okuliyunga opo vahanumanese Huku, pokwapopia ohonde, vati umwe avapopi, avawane-po vali. — Ovil. 15:​20, 29.

Siovaa hakuti ankho wahanda otyo tyokuwana-wana onondaka mbumwe Movihonekwa, tyilinge vala ngatyina pahe otyiso. Tala onondaka mbapopia Sesusi, wati: “Tyina ulikwambela, wahawane-wane vala otyipuka.” (Mat. 6:7) Pahe apopi ovipuka vikahi nawa tupondola okupopia momalikwambelo tulinga, ovipuka Huku nae ahanda. (Mat. 6:​9-13) Tyina momalikwambelo tulinga twahapopi vala onondaka mbwike, matyitukwatesako atwahapopi vala otyipuka tyike ononthiki ambuho. — Mat. 7:​7-11.

Tyimwe Omulongesi wetu Omunene Siovaa alinga pokutulongesa, opo tupole-po ouwa, okuti otyipuka etyipopi, apaleka-po vali. Otyo apakela movanthu vokwahoneka Ondaka yae, olusoko lwokuwana-wana onondaka mbumwe. — Isa. 48:​17, 18.