ƆDWU mekɛ ne bie a, Baebolo kɛlɛvoma ka ɛdendɛsinli bie mɔ mɔɔ bɛha ye dɛba la bieko pɛpɛɛpɛ. Suzu ninyɛne nsa mɔɔ bie a ɔmaa bɛyɛ zɔ la anwo:

Mekɛ mɔɔ bɛhɛlɛle edwɛkɛ ne la. Wɔ tete Yizilayɛ, ɛnee menli dɔɔnwo ɛnlɛ Mɛla ne mɔɔ bɛhɛlɛ la bie. Ɛnee saa maanle ne amuala yia nu wɔ ndanlɛsua ne nee ɛzonlenlɛsua ne anyunlu a, yɛɛ bɛte kɛ bɛlɛkenga Mɛla ne a. (Dit. 31:​10-12) Noko ɛnee ninyɛne twehwe bɛ adwenle yɛɛ ɛnee bɛta bɛgyinla dɔnehwele dɔɔnwo wɔ menli dɔɔnwo ne anu. (Nih. 8:​2, 3, 7) Saa bɛka ɛdendɛsinli titili ne mɔ bieko anzɛɛ bɛsi zolɛ wɔ mekɛ zɛhae mɔ anu a, ɔmmaa ɔnyɛ se kɛ menli ne bahakye ngɛlɛlera ne anu edwɛkɛ ne na bɛava bɛali gyima. Saa bɛsi edwɛkɛ agbɔkɛ bie mɔ azo a, ɔboa bɛ kpalɛ ɔmaa bɛkakye ninyɛne mɔɔ hyia kpalɛ, mɔɔ bie a le Nyamenle mɛla nee ye ngyehyɛleɛ ne mɔ la.—Lɛv. 18:​4-22; Dit. 5:1.

Kɛzi bɛkɛlɛ ye la. Saa ɛkyɛ Baebolo ne anu edwɛkɛ ne anu 100 a, nuhua 10 le edwɛne—Edwɛne, Sɔlɔmɔn Edwɛne nee Awolɛyelɛ boka nwo. Ɔyɛ a bɛsi edwɛkɛ agbɔkɛ ne mɔ azo wɔ edwɛne ne anu, na ɛhye maa bɛkakye ye edwɛkɛtile ne yɛɛ ɔboa tievolɛma ɔmaa bɛkye nuhua edwɛkɛ agbɔkɛ ne mɔ bɛgua bɛ ti anu. Kɛ neazo la, nea edwɛkɛ agbɔkɛ mɔɔ wɔ Edwɛne 115:​9-11 la. Ɔse, “O Yizilayɛ, bɛva bɛ nwo bɛdo Gyihova anwo zo—Ɔle bɛ boavolɛ nee bɛ enyinlike. O Aalɔn abozoamra, bɛva bɛ nwo bɛdo Gyihova anwo zo—Ɔle bɛ boavolɛ nee bɛ enyinlike. Bɛmɛ mɔɔ bɛsulo Gyihova la, bɛva bɛ nwo bɛdo Gyihova anwo zo—Ɔle bɛ boavolɛ nee bɛ enyinlike.” Ɛkola ɛnwu kɛzi zɔhane edwɛkɛ ne mɔ mɔɔ bɛzile zolɛ la boale maanle edwɛndovoma ne vale zɔhane nɔhalɛ edwɛkɛ ne ziele bɛ adwenle nee bɛ ahonle nu la ɔ?

Bɛfa bɛsi edwɛkɛ mɔɔ hyia la azo. Ɔyɛ a Baebolo kɛlɛvoma si ɛdendɛsinli mɔɔ anwo hyia kpalɛ la azo. Kɛ neazo la, mɔɔ Gyihova hanle hilele Yizilayɛma kɛ bɛmmadi mogya la, ɔmaanle Mosisi zile deɛmɔti ɔngulo kɛ bɛdi la azo fane dɔɔnwo. Ɛnee Nyamenle kulo kɛ ɔsi zolɛ kɛ nwonane ne ngoane ne wɔ mogya ne anu, mɔɔ kile kɛ mogya gyi ɛkɛ maa ngoane. (Lɛv. 17:​11, 14) Nzinlii mɔɔ ɛzoanvolɛma ne nee mgbanyima mɔɔ wɔ Gyɛlusalɛm la hɛlɛle ninyɛne mɔɔ ɔwɔ kɛ Kilisienema yɛ amaa Nyamenle anye alie bɛ nwo la, eza bɛzile deɛmɔti ɔhyia kɛ yɛtwe yɛ nwo yɛfi mogya nwo la azo.—Gyi. 15:​20, 29.

Tɛ Gyihova adwenle a le kɛ ɔmaa bɛaha Ngɛlɛlera ne anu ɛdendɛsinli ne mɔ bieko ala. Kɛ neazo la, Gyisɛse hanle kɛ: “Saa ɛlɛyɛ asɔne a, mmaka edwɛkɛ ko ne ala fane dɔɔnwo.” (Mat. 6:7) Akee ɔhilele ninyɛne bie mɔ mɔɔ ɔ nee Nyamenle ɛhulolɛdeɛ yia mɔɔ yɛbahola yɛayɛ nwolɛ asɔne la. (Mat. 6:​9-13) Ɔti yɛnga edwɛkɛ ko ne ala fane dɔɔnwo wɔ yɛ asɔneyɛlɛ bie anu ala ɛdeɛ, noko yɛbahola yɛaha deɛ ko ne ala anwo edwɛkɛ wɔ mekɛ ngakyile nu.—Mat. 7:​7-11.

Adwenle kpalɛ bie ati a bɛzi edwɛkɛ agbɔkɛ nee ɛdendɛsinli bie mɔ azo wɔ Nyamenle Edwɛkɛ ne anu a. Ɔle ndenle dɔɔnwo mɔɔ yɛ Kilehilevolɛ Kpole Kpalɛ ne dua zo kilehile yɛ amaa yeawie yɛ boɛ la anu ko.—Aye. 48:​17, 18.