БИБЛИ чи фыста, уыдон-иу хатт кӕцыдӕр ныхӕстӕ иу хатт нӕ, фӕлӕ цалдӕр хатты ныффыстой. Цымӕ-иу афтӕ цӕмӕн бакодтой? Ӕркӕсӕм ӕртӕ хъуыдымӕ.

Фыст кӕд ӕрцыдысты. Раджы заман израилӕгтӕм сӕ фылдӕрмӕ Закъоны къопитӕ нӕ уыд. Ӕмӕ-иу уый тыххӕй арӕхдӕр афтӕ кодтой: адӕм-иу цатыры раз, фӕстӕдӕр та – кувӕндоны раз, ӕрӕмбырд сты ӕмӕ-иу сын левиттӕ Закъон кастысты (Дык. з. 31:10–12). Цалдӕр сахаты-иу лӕугӕйӕ хъуыстой ӕмӕ-иу бафӕлладысты, стӕй дзы бирӕ адӕм кӕй уыд, уый тыххӕй-иу цыдӕр нӕ фехъуыстаиккой (Неем. 8:2, 3, 7). Ӕмӕ-иу сӕйраг ныхӕстӕ цалдӕр хатты кӕй фехъуыстой, уый фӕрцы-иу сын ӕнцондӕр уыд Хуыцауы закъӕттӕ ӕмӕ уагӕвӕрдтӕ бахъуыды кӕнын ӕмӕ уыдонмӕ гӕсгӕ цӕрын (Лев. 18:4–22; Дык. з. 5:1).

Сӕ стиль, ома, куыд фыст сты, уый. Библийӕн йӕ 10 проценты бӕрц сты зарджытӕ, зӕгъӕм, Псаломты чиныг, Соломоны зарӕг ӕмӕ Йеремийы хъарӕг. Кӕцыдӕр зарджыты ис базард. Уый фӕрцы-иу, зарӕгмӕ чи хъуыста, уыдон зарӕджы темӕ хуыздӕр бамбӕрстой ӕмӕ-иу ын йӕ ныхӕстӕ бахъуыды кодтой. Дӕ хъус-ма ӕрдар Псаломы 115:9–11 стихты ныхӕстӕм: «О Израил, дӕ зӕрдӕ дар Йегъовӕйыл, уый у де ’ххуысгӕнӕг ӕмӕ дӕ уарт. О Аароны хӕдзарвӕндаг, уӕ зӕрдӕ дарут Йегъовӕйыл, уый у уе ’ххуысгӕнӕг ӕмӕ уӕ уарт. Йегъовӕйӕ чи тӕрсы, уыдон, уӕ зӕрдӕ дарут Йегъовӕйыл, уый у уе ’ххуысгӕнӕг ӕмӕ уӕ уарт». Ацы псалом заргӕйӕ-иу адӕймаг уыцы иу ныхӕстӕ цалдӕр хатты кӕй азарыд, уый фӕрцы-иу уыцы ахсджиаг хъуыдытӕ йӕ зонды ӕмӕ йӕ зӕрдӕйы баззадысты.

Фыст цӕмӕн ӕрцыдысты. Библи чи фыста, уыдон-иу хатт кӕцыдӕр ныхӕстӕ цалдӕр хатты ныффыстой, цӕмӕй-иу адӕмы ’ргом ахсджиаг хъуыдытӕм раздӕхтаиккой. Зӕгъӕм, Йегъовӕ израилӕгтӕн куы бафӕдзӕхста, цӕмӕй туг ма хордтаиккой, уӕд Моисейӕн цалдӕр хатты зӕгъын кодта, афтӕ сын цӕуылнӕ ис кӕнӕн, уый. Хуыцауы фӕндыд адӕмӕн бамбарын кӕнын, цӕрӕг удтӕн сӕ цард сӕ туджы кӕй ис, ома туг амоны цардмӕ (Лев. 17:11, 14). Бирӕ ӕнусты фӕстӕ, Иерусалимы чи уыд, уыцы апостолтӕ ӕмӕ хистӕр нӕлгоймӕгтӕ чырыстӕттӕм ныффыстой, сӕхи цавӕр хъуыддӕгтӕй хъуамӕ хизой, цӕмӕй Хуыцауы зӕрдӕ рухс кӕной. Ӕмӕ та уыдон дӕр загътой, сӕхи кӕй хъуамӕ хизой тугӕй (Хъуыд. 15:20, 29).

Йегъовӕйы нӕ фӕнды, цӕмӕй Библийӕ кӕцыдӕр скъуыддзӕгтӕ ӕнӕуи ногӕй ӕмӕ ногӕй дзурӕм. Йесо загъта: «Куы кувай, уӕд-иу... уыцы иу ныхӕстӕ ногӕй ӕмӕ ногӕй ма дзур» (Матф. 6:7). Уый фӕстӕ та ранымадта, нӕ бон цавӕр хъуыддӕгты тыххӕй у кувын, уыдон (Матф. 6:9–13). Уӕдӕ-иу Хуыцаумӕ кувгӕйӕ хъуамӕ ногӕй ӕмӕ ногӕй уыцы иу ныхӕстӕ ма дзурӕм. Фӕлӕ нӕ бон у иу цӕйдӕр тыххӕй ногӕй ӕмӕ ногӕй кувын (Матф. 7:7–11).

Уӕдӕ Библийы кӕцыдӕр ныхӕстӕ иу хатт нӕ, фӕлӕ цалдӕр хатты дзӕгъӕлы не ’рцыдысты фыст. Афтӕмӕй дӕр нӕ нӕ Кадджын Зондамонӕг ахуыр кӕны, пайда нын цы у, ууыл (Ис. 48:17, 18).