БИБЛИ ка финста, етӕ еуӕй-еухатт кӕцидӕр дзурдбӕститӕ цалдӕр хатти ниффинсиуонцӕ. Ӕркӕсӕн ӕртӕ гъуддагемӕ ӕма базонӕн, уотӕ цӕмӕн кодтонцӕ.

Финст кӕд ӕрцудӕнцӕ. Рагон израилӕгтӕн сӕ фулдӕремӕн сӕхе Финстади къопитӕ н’ адтӕй. Закъонмӕ игъосиуонцӕ сугъдӕг цатури рази, фӕстӕдӕр ба ковӕндони рази ку ӕрӕмбурд уиуонцӕ, уӕд (Дук. з. 31:10–12). Адӕн цалдӕр сахаттей дӕргъи лӕугӕй закъонмӕ игъустонцӕ (Неем. 8:2, 3, 7). Берӕ адӕн си ке адтӕй, уой туххӕй сӕмӕ, ка ’й зонуй, алци хуарз не ’гъустӕй. Фал сӕйраг дзурдтӕ ӕма гъудитӕ цалдӕр хатти ке зӕгъиуонцӕ, уой фӕрци израилӕгтӕн ӕнцондӕр адтӕй Хуцауи закъӕнттӕ ӕма фӕдзӕхститӕ нигъгъуди кӕнун ӕма уонӕмӕ гӕсгӕ архайун (Лев. 18:4–22; Дук. з. 5:1).

Финст куд ӕрцудӕнцӕ. Библийӕн ӕ 10 процентти ӕнцӕ зартӕ. Уонӕмӕ хаунцӕ Псаломтӕ, Соломони зар ӕма Йеремий гъарӕнгӕ. Еуӕй-еухатт зарти адтӕй базард. Уой фӕрци адӕнӕн ӕнцондӕр адтӕй зари сӕйраг гъуди балӕдӕрун ӕма дзурдтӕ нигъгъуди кӕнун. Зӕгъӕн, дӕ гъос ӕрдарӕ Псалом 115:9–11 финст дзурдтӕмӕ: «О Израил, дӕ зӕрдӕ дарӕ Йеговӕбӕл, е ӕй де ’нхусгӕнӕг ӕма дӕ уарт. О Аарони хӕдзарвӕндаг, уӕ зӕрдӕ даретӕ Йеговӕбӕл, е ӕй уе ’нхусгӕнӕг ӕма уӕ уарт. Йеговӕй ка тӕрсуй, етӕ, уӕ зӕрдӕ даретӕ Йеговӕбӕл, е ӕй уе ’нхусгӕнӕг ӕма уӕ уарт». Аци дзурдтӕ цалдӕр хатти финст ке ’рцудӕнцӕ, уой фӕрци сӕ ка зардта, уонӕн еци ӕхсидзгӕ гъудитӕ сӕ зӕрдитӕмӕ хъӕбӕрдӕр багъариуонцӕ.

Финст цӕмӕн ӕрцудӕнцӕ. Еуӕй-еухатт Библи ка финста, етӕ сӕйраг гъудитӕ цалдӕр хатти ниффинсиуонцӕ, цӕмӕй сӕйраг гъудитӕ баханхӕ кодтайуонцӕ. Зӕгъӕн, Йеговӕ израилӕгтӕн ку загъта, цӕмӕй тог ма хуардтайуонцӕ, уӕд Моисей еци дзурдтӕ Закъони берӕ хӕттити ниффинста. Уотемӕй Хуцауи фӕндадтӕй израилӕгтӕн уӕлдай хатт се ’ргом раздахун, зӕнхӕбӕл цидӕриддӕр ес, уонӕн сӕ уод сӕ тоги ке ӕй, гъома, тог цард ке нисан кӕнуй (Лев. 17:11, 14). Фӕстӕдӕр Йерусалими апостолтӕ ӕма хестӕр нӕлгоймӕгтӕ дӕр киристӕнттӕмӕ ниффинстонцӕ, цӕмӕй сӕхе тогӕй хезонцӕ ӕма уотемӕй Хуцауи зӕрдӕ рохс кӕнонцӕ (Гъуд. 15:20, 29).

Йегови нӕ фӕндуй, цӕмӕй Библийӕй цӕхуӕндӕр скъуддзӕгтӕ ӕнӕуой нӕуӕгӕй ӕма нӕуӕгӕй дзорӕн. Зӕгъӕн, ӕ Фурт загъта: «Ку ковай, уӕд аци дуйней адӕни хузӕн алкӕд еци-еу дзурдтӕ ма дзорӕ» (Матф. 6:7). Уой фӕсте ба ранимадта, Хуцауи фӕндонмӕ гӕсгӕ нӕ бон цӕй туххӕй ӕй ковун, уӕхӕн гъуддӕгтӕ (Матф 6:9–13). Мадта Хуцаумӕ ковгӕй гъӕуама нӕуӕгӕй ӕма нӕуӕгӕй еци еу дзурдтӕ ма дзорӕн, фал нӕ бон ӕй еу цӕйдӕр туххӕй нӕуӕгӕй ӕма нӕуӕгӕй ковун (Матф. 7:7–11).

Мадта бӕрӕг ӕй, Хуцауи Дзурди кӕцидӕр дзурдтӕ цалдӕр хатти дзӕгъӕли финст ке не ’рцудӕнцӕ. Е ӕй, нӕ кадгин Зундамонӕг нӕ ци мадзӕлттӕй ахур кӕнуй, уонӕй сӕ еу (Ис. 48:17, 18).