NO MAMINSAN, wala ray nabasa tayo ed Biblia ya salita por salitan naulit. Niay talora ya posiblin rason no akin ya ontan so ginawa na arum ya managsulat na Biblia:

Panaon no kapigan itan insulat. Diad Israel nensaman, pigpigara labat so walaay kopya na Ganggan. Narerengel da labat so karga na Ganggan no ibabasa itan diad tabernakulo. (Deu. 31:10-12) Walay posibilidad ya agda narengel so amin ya ibabasa ta wala ray makaisturbo. Sakey ni, aliwan mainomay so ontalineng ta diretso ran akaalagey. (Neh. 8:2, 3, 7) Kanian no naulit iray importantin punto, mas mainomay da itan ya natandaan tan iyaplika. Makatulong met itan pian agda nalingwanan iray detalye na Ganggan.​—Lev. 18:4-22; Deu. 5:1.

Estilo na panagsulat. Halos 10 porsiento na Biblia et kansion—singa say libron Salmo, Kansion nen Solomon, tan Tagleey. Diad sakey ya kansion, mabetbet et wala ray linya ya ginagalan uliten pian idanet so tema tan mainomay ya na-memorize na saray ondedengel. Singa bilang, imanoen iyan parte na kansion ya walad Salmo 115:9-11: “O Israel, manmatalek kad si Jehova​—Sikatoy mananulong da tan samper da. O sankaabungan nen Aaron, manmatalek kayod si Jehova​—Sikatoy mananulong da tan samper da. Sikayo ran ontatakot ed si Jehova, manmatalek kayod si Jehova—Sikatoy mananulong da tan samper da.” Kasin apansin mo imay linya ya aminpigan naulit? Lapud aminpiga itan ya naulit, mas ontatak itan ed puso tan isip na mangakansion.

Pangidanet ed manunan punto. No maminsan, uuliten na saray managsulat na Biblia so sakey ya punto ta importantin maong. Singa bilang, nen ingganggan nen Jehova iray Israelita ya ag-ira nayarin mangan na dala, aminpiga ton impaisulat ed si Moises so rason. Labay nen Jehova ya natalosan da ya “say bilay na laman et walad dala,” o diad arum ya salita, irerepresenta na dala so bilay. (Lev. 17:11, 14) Diad panaon na saray inmuunan Kristiano, nen sinulatan na saray apostol tan saray mamatatken ed Jerusalem iray agagi, indanet da lamet ya kaukolan dan ‘arawian so dala.’ Sakey itan ed saray kailangan dan iwasan pian napaliket da so Dios.​—Gawa 15:20, 29.

No ontan sirin, kasin labay nen Jehova ya ulit-uliten tayo ray salita ed Biblia ya singa la itan ritual? Andi. Singa bilang, oniay imbaga nen Jesus: “Sano manpipikasi ka, agmo uulit-uliten ya ibaga iray apasakey a bengatla.” (Mat. 6:7) Insan imbaga to iray topic ya sarag tayon ipikasi. (Mat. 6:9-13) Kanian iwasan tayo ya apasakey so salitan uusaren tayo ed saray pikakasi tayo. Pero siempre, aliwan mauges no maminpiga tayon ipikasi so sakey a bengatla.​—Mat. 7:7-11.

On, walay rason no akin ya wala ray nababasa tayo ed Biblia ya aminpigan naulit. Sakey itan ed saray paraan ya uusaren na Makapadinayew ya Managbangat tayo pian agtayo nalingwanan iray ibabangat to tan nagunggonaan tayo.​—Isa. 48:17, 18.