Bo Tabata Sa?
Dikon Beibel ta ripití sierto kos?
TIN sierto frase ku Beibel ta ripití palabra pa palabra. Ban wak tres motibu pakiko eskritornan di Beibel a hasi esei:
E tempu ku a skirbié. Den tempu di Israel, mayoria di hende no tabatin nan propio kopia di Lei pa nan mes por a lesa. Pues, generalmente nan tabata skucha i siña Lei ora nan tabata bai huntu na e tabernakel i e tèmpel. (Deu. 31:10-12) Ta di komprondé anto ku lo tabatin hopi distraishon segun ku nan tabata para oranan largu den un grupo grandi. (Neh. 8:2, 3, 7) Pero si a ripití sierto frase importante durante di e okashonnan ei, lo tabata hopi mas fásil pa nan kòrda e skrituranan i sa kon pa apliká nan. E ripitishon ei a yuda e israelitanan kòrda detayenan di Dios su lei- i mandamentunan.—Lev. 18:4-22; Deu. 5:1.
E stail ku a skirbié. Mas o ménos 10 porshento di Beibel ta kantika, entre otro Salmo, Kantika di Sálomon i Lamentashon. Tin biaha kantikanan tabatin refrein ku a yuda e skuchadó kòrda e tema i siña e letranan for di kabes. Pa haña un idea, wak Salmo 115:9-11: “Israel, konfia den Yehova. E ta boso yudansa i boso eskudo. Desendientenan di Áròn, konfia den Yehova. E ta boso yudansa i boso eskudo. Boso ku tin rèspèt profundo pa Yehova, konfia den Yehova. E ta boso yudansa i boso eskudo.” Bo ta mira kon ripitishon di e palabranan ei lo a yuda e kantantenan graba e bèrdatnan presioso ei den nan mente i kurason?
E motibu ku a skirbié. Tabatin biaha ku eskritornan di Beibel a ripití sierto frase importante. Por ehèmpel, ora ku Yehova a instruí e israelitanan pa no kome sanger, el a pone Moises ripití e motibu mas ku un biaha. Dios kier a hasi sigur ku nan a komprondé ku sanger ta representá bida i p’esei e tabata masha presioso. (Lev. 17:11, 14) Mas despues, ora ku e apòstelnan i e ansianonan na Herúsalèm tabata papia over dje kosnan ku ta desagradá Dios, atrobe nan a ripití e importansia di apstené di sanger.—Echo. 15:20, 29.
Aunke Beibel ta ripití sierto kos, esei no ke men ku Yehova ke pa nos krea e kustumber di ripití sierto frase di Beibel bes tras bes, manera un rito. Kon nos sa esei? Wèl, wak kiko Hesus a bisa na Mateo 6:7. El a bisa: “Ora bo ta hasi orashon, no keda ripití e mesun palabranan.” Pero despues, el a menshoná algun kos ku nos por pidi den orashon ku ta di akuerdo ku Dios su boluntat. (Mat. 6:9-13) Pues, aunke no ta un problema pa nos pidi pa e mesun kosnan tur dia, loke sí nos ke evitá ta di djis keda ripití e mesun palabranan.—Mat. 7:7-11.
Pues anto, Dios tabatin bon motibu pa ripití sierto palabra i frase den Beibel. Esei ta un di e tantísimo métodonan ku nos Gran Instruktor ta usa pa siña nos pa nos mes bon.—Isa. 48:17, 18.