EENJE Bibelschriewa wadaholden eenjemol de Saza Wuat fa Wuat. See wie mol dree Uasoaken, wuarom dee eenje Wieed un Saza woomäajlich wadaholden:

Wanea daut jeschräwen wort. De mieeschte Israeliten hauden ieeschtemma nich selfst eene Schreftroll met daut Jesaz tus. Mieeschtens hieeden dee daut Jesaz bloos, wan daut Volkj bie daut Aunbädungszelt toopjekomen wia un daut doa väajeläst wort (5. Mo. 31:10-12). Dauts goot mäajlich, daut dee doa aufjelenkjt worden un nich soo fein toohorchen kunnen, wäajen dee doa stundenlank mank de groote Häad stunden (Neh. 8:2-3, 7). Bie soon Toopkomen deeden dee eenje Wieed ooda wichtje Saza wadaholen, daut de Menschen eenje Sachen leichta em Denkj hoolen kunnen un dee dan uk nokomen. Eenje Wieed to wadaholen, haft dee besonda jeholpen, daut dee de Eenselheiten em Denkj hoolen kunnen von daut Jesaz, waut Jehowa dee jejäft haud (3. Mo. 18:4-22; 5. Mo. 5:1).

Woo daut jeschräwen wort. Rom 10% von de Bibel sent Leeda – biejlikj daut Buak Psalmen, daut scheenste Leet von Salomo un Kloagleeda. En eenje Leeda worden de Wieed wadaholt. Soo wort dietlich jemoakt, von waut sikj daut Leet haundeld, un daut holp de Toohiera uk, de Wieed utwendich to lieren. Een Biespel doavon es en Psalm 115:9-11. Doa sajcht daut: “Oba, Israel, sat dien vetruen opp däm HARN. Wiels hee es diene Help un dien Schilt. Oo jie, ut Aaron siene Famielje, de Priesta Staum, sat jun vetruen opp däm HARN. Dee es june Help un jun Schilt. Jie, dee jie dän HARN ferchten, velot junt opp am. Dee es june Help un jun Schilt.” De Wieed to wadaholen biem sinjen, holp deejanje secha, waut daut Leet sungen, dise scheene Jedanken em Denkj to hoolen.

Wuarom daut jeschräwen wort. De Bibelschriewa deeden eenjemol wichtje Saza wadaholen. Biejlikj aus Jehowa to de Israeliten säd, daut see nich sullen Bloot äten, bestald hee aun Moses, daut hee dee daut mieremol säd, wuarom nich. Gott wull daut dietlich moaken, daut daut Läwen em Bloot es, aulsoo, daut Bloot daut Läwen väastalt (3. Mo. 17:11, 14). Lota, aus de Apostel un Eltestasch en Jerusalem de Sachen oppschreewen, wuavon Christen sikj motten wajchhoolen, om Gott to jefaulen, muaken see daut wada dietlich, daut dee sikj sullen vom Bloot wajchhoolen (Apj. 15:20, 29).

Jehowa well nich haben, daut wie ons daut aunwanen, emma wada deeselwje Saza ut de Bibel to wadaholen. Biejlikj säd Jesus: “Wan du bätst, dan saj nich emma un emma wada dautselwje äwa” (Mat. 6:7). Hee jeef ons uk Biespels, woo wie bäden kjennen, daut et met Gott sienen Wellen tooppaust (Mat. 6:9-13). Wan wie uk nich emma wada deeselwje Wieed brucken, wan wie bäden, kjenn wie oba wellich emma wada äwa deeselwje Sach bäden (Mat. 7:7-11).

Daut jeft goode Uasoak, wuarom Gott sien Wuat eenje Wieed ooda Saza wadaholt. Daut es eene Wajch, woo ons Groota Liera ons lieet, daut ons daut selfst togood kjemt (Jes. 48:17-18).