NTHAWE zinango, onemba Baibolo anango ambabwerezera mawu yabodzibodzi pakuyanemba mawu na mawu. Onani vinthu vitatu vomwe iwo adachitira vimwevi:

Nthawe yomwe idanembewa. Aizirayeli oyamba, azinji wa iwo wenze alibe bukhu ya chilamulo kuti ambayiphatisire basa nthawe zizinji, nthawe ibodzi yomwe iwo ambakwanisa kubva chilamulo ni pa nthawe yomwe wanthu ambasonkhana pa chihema. (Deut. 31:10-12) Pa vochitika ninge vimwevi venze vosashupa kuti wanthu asokonezeke na gulu ya wanthu. Ndawa yakuti ambakhala nthawe ikulu maninge ali imirire pakati pa wanthu kuti abve chilamulo. (Neh. 8:2, 3, 7) Ndawa ya vimwevi, kuti wanthu akwanise kukumbukira vomwe vawerengewa nakuti aviphatise basa pa moyo wawo, venze vodekana kuti ambachite kubwerezera mawu yodekana maninge. Kubwerezera mawu yanango kwenze kodekana maninge kuti wanthu ambakwanise kukumbukira bwinobwino mawu yanango ya chilamulo yomwe yenze na mpfundo zizinji.—Lev. 18:4-22; Deut. 5:1.

Momwe yadanemberewa. Mbali zinango za m’Baibolo, zidanembewa ninge nyimbo. Mwakulinganiza, bukhu ya Masalimo, Nyimbo ya Solomo na Maliro. Nyimbo zinango zikhala na makolasi ya mawu yobwerezerabwerezera ndipo mawu mwaya yachatikumbusa va msolo wa nyimbo yake ndipo vithandizapomwe obvesera nyimbo mweyo kuti akumbukire mawu yake. Ndowonani mwakulinganiza vomwe viri nembewe pa Salimo 115:9-11: ‘Aizirayeli thembani Yahova. Iye ndiye achakuthandizani ndipo ni chishango chanu. Imwe wa nyumba ya Aroni, thembani Yahova, iye ni nthandizi wanu na chishango chanu. Imwepo omwe mumugopa Yahova, thembani Yahova, iye ni nthandizi wanu na chishango chanu.’ Ko imwepo munkukwanisa kuwona mawu yobwerezerabwereza mwaya momwe yangathandizire woyimba kuphata na kusunga m’maganizo mwake na muntima mwake mawu mwaya?

Ubwino wobwerezera mpfundo zodekana. Onemba Baibolo nthawe zinango ambabwerezera mawu yodekana maninge. Mwakulinganiza, pomwe Yahova adapereka malangizo kwa Aizirayeli yakuti aleke kudya magazi, Yahova adalamula Mose kuti iye ambabwerezere kunemba vifukwa vochitira vimwevi. Yahova ambafuna kutsimikizira kuti magazi yachaimira moyo. (Lev. 17:11, 14) Patsogolo pake pomwe atumi na akulu wa ku Yerusalemu adanemba pa vomwe Akhrisitu angadekana kuchita kuti akondwerese Yahova na vomwe angadekana kupewa kuti asamukalipise, iwo adatsindika kudekana kwa kusadya magazi.—Mac. 15:20, 29.

Ni shuwadi kuti Baibolo ibwerezera mawu yazinji, koma vimwevi vinkutanthauzalini kuti Yahova ankufuna kuti timbabwerezerebwerezere mawu mwaya. Mwakulinganiza, Yesu adati: “Ukambapemphera, ayi kumbandobwerezera mawu yabodzi na yabodzi.” (Mat. 6:7) Iye adalewa vinthu vinango vomwe isepano tingavilewe m’mapemphero yathu. (Mat. 6:9-13) Ndawa ya vimwevi, podiya kuti tipewa kubwerezera mawu yabodzi na yabodzi pa mapemphero yathu, koma nthawe zose tingambaviphatanidze vinthu mwevi m’mapemphero yathu.—Mat. 7:7-11.

Pa na vifukwa vobveka kuti Baibolo imbabwerezere mawu yanango. Ni njira ibodzi mwanjira zizinji zomwe Yahova, Mpfunzisi wathu nkulu apfunzisira vinthu vabwino kwa isepano.—Yes. 48:17, 18.