بائبل لکھن والیاں نے کجھ جملیاں نُوں لفظ بہ لفظ دُہرایا۔ اوہناں نے اِنج کیوں کیتا؟ آؤ ایہدے بارے تِن گلاں تے غور کرئیے۔‏

ایہہ گلاں کدوں لکھیاں گئیاں۔‏ بنی‌اِسرائیل دے زمانے چ زیادہ‌تر لوکاں کول شریعت دی ذاتی کاپی نئیں ہوندی سی۔ اوہ اکثر ایہنوں اوس موقعے تے سُن‌دے سن جدوں ساری قوم خیمۂ‌اِجتماع چ جمع ہوندی سی۔ (‏اِستثنا 31:‏10-‏12‏)‏ پر اوس ویلے وی اوہناں لئی دھیان نال سننا ایناں اسان نئیں ہوندا ہوئے گا کیونکہ اوتھے بڑا رش ہوندا سی تے اوہناں نُوں کئی کئی گھنٹے کھلو کے سُننا پیندا سی۔ (‏نحمیاہ 8:‏2، 3،‏ 7‏)‏ ایس لئی ایہو جہے موقعیاں تے کجھ خاص جملیاں یاں گلاں نُوں دُہران نال لوکاں لئی ایہناں نُوں یاد رکھنا تے ایہناں تے عمل کرنا اسان ہو جاندا ہوئے گا۔ کجھ خاص لفظاں نُوں دُہران نال اہم معاملیاں نُوں یاد رکھن چ لوکاں دی مدد ہوندی ہوئے گی، جیویں کہ خدا دے قانون تے اوہدے فیصلے وغیرہ۔—‏احبار 18:‏4-‏22؛‏ اِستثنا 5:‏1‏۔‏

ایہہ گلاں کیویں لکھیاں گئیاں۔‏ بائبل دا تقریباً 10 فیصد حصہ گیتاں دی شکل چ لکھیا گیا اے جدے چ زبور،غزلُ‌الغزلات تے نوحہ دِیاں کتاباں شامل نیں۔ کجھ گیتاں چ کجھ جملے یاں شعر وار وار دُہرائے جاندے سن تاکہ سنن والیاں نُوں گیت دا موضوع پتہ چل جائے تے اوہ اوہدے بول یاد رکھ سکن۔ مثال لئی، زبور 115:‏9-‏11 دے الفاظ تے غور کرو:‏ اَے اِسرائیل یہوواہ تے بھروسا رکھ۔ اوہی تیرا مددگار تے تیری ڈھال اے۔ اَے ہارون دے گھرانے یہوواہ تے بھروسا رکھ۔ اوہی تیرا مددگار تے تیری ڈھال اے۔ تُوں جیہڑا یہوواہ توں ڈرنا ایں، یہوواہ تے بھروسا رکھ۔ اوہی تیرا مددگار تے تیری ڈھال اے۔ ایہناں ایتاں تے غور کر کے تُسی ویکھ سکدے او کہ کجھ خاص لفظاں نُوں دُہران نال کجھ خاص سچائیاں تے زور دِتا گیا اے جدی وجہ توں ایہہ گان والیاں دے دل تے دماغ اُتے نقش ہو گئیاں ہون گیاں۔‏

ایہہ گلاں کیوں لکھیاں گئیاں۔‏ بائبل لکھن والیاں نے کجھ جملیاں نُوں ایس لئی دُہرایا کیونکہ اوہ بڑے اہم سن۔ مثال لئی، جدوں یہوواہ نے اِسرائیلیاں نُوں خون نہ کھان دی ہدیت دِتی تے اوہنے موسیٰ کولوں ایہدی وجہ وار وار لکھوائی۔ خدا اوہناں نُوں ایہہ گل سمجھانا چاہندا سی کہ جسم دی جان خون چ وے یعنی خون چ زندگی اے۔ (‏احبار 17:‏11،‏ 14‏)‏ فیر بعد چ جدوں بزرگاں تے رسولاں نے خدا نُوں ناراض کرن توں بچن بارے کجھ طریقے دَسے تے اوہناں نے فیر توں ایس گل تے دھیان دَوایا کہ خون توں پرہیز کیتا جائے۔—‏اعمال 15:‏20،‏ 29‏۔‏

یہوواہ نے بائبل چ کجھ گلاں نُوں ایس لئی نئیں وار وار لکھوایا کہ اوہناں نُوں رٹ لیا جائے۔ مثال لئی، یسوع نے کہیا:‏”‏تُوں رٹیاں رٹائیاں دُعاواں نہ کر۔“‏ (‏متی 6:‏7‏)‏ فیر اوہنے کجھ ایہو جہیاں گلاں بارے دَسیا جیہڑیاں خدا دی مرضی دے مطابق نیں تے جنہاں بارے اَسی دُعا کر سکنے آں۔ (‏متی 6:‏9-‏13‏)‏ ایہہ سچ اے کہ اَسی اپنی دُعا چ اِکو جہے لفظ وار وار نئیں دُہراندے پر فیر وی اَسی کجھ گلاں بارے وار وار دُعا کر سکنے آں۔—‏متی 7:‏7-‏11‏۔‏

اَسی ویکھ لیا اے کہ خدا دے کلام چ جیہڑے لفظاں تے جملیاں نُوں وار وار دُہرایا گیا اے، اوہناں توں لوکاں نُوں بوہت فائدہ ہویا اے۔ ایہہ اِک بوہت ودھیا طریقہ اے جدے ذریعے ساڈا عظیم اُستاد سانوں فائدہ‌مند تلیم دے رہیا اے۔—‏یسعیاہ 48:‏17، 18‏۔‏