JEMPƗK ijayyaj jeʼm Biblia dyaʼ numaaj tyun̈kɨy ipɨkyajpa idyɨk jeʼtyim an̈maatyi. ¿Tyiʼiga iwatyajpa idyɨk jeempɨk? Tan̈kɨʼpin̈taʼmiñ tukuteen jɨɨxiyaj:

Juchix jaytya. Wiñɨk jeʼm israelitajyaj dyaʼ iniityyaj idyɨk ityɨkkɨʼɨm tuum copia de jeʼm Ley. Jesɨk an̈tuʼumaayajpa en jeʼm tabernáculo y en jeʼm templo, numaaj jesɨgam ikumaton̈yajpa idyɨk (Deut. 31:​10-12). Iga jaʼyan̈yaj teeññeyajpa idyɨk y waatyña hora, wɨap tan̈kujɨɨs iga dyaʼ ityumpɨy ijaamaktsɨʼyyajpa (Neh. 8:​2, 3, 7). Jeʼyukmɨ iga watykɨy jɨykimtaap jeʼtyim an̈maatyi, maaj dyaʼ tan̈kaʼap ijɨɨsaktsɨʼyyaj y ikupɨkyaj. Iga watykɨy pɨktaap idyɨk jeʼm an̈matyiyaj, yooxpadoy iga ikutɨʼɨyɨyyajiñ tyi wɨɨ iga iwatyajiñ, juʼuts akwiñkejoʼoyi jesɨk jɨykimtaap idyɨk jeʼm an̈kiʼmayoʼoyiyaj (Lev. 18:​4-22; Deut. 5:1).

Juutypɨk jaytya. Tuumtsam 10% de jeʼm Biblia iniity waañiyaj, juʼuts jeʼm Salmos, El Cantar de los Cantares y Lamentaciones. Weeñi waañiyaj watykɨy ipɨkpa idyɨk tuum an̈maatyi. Yɨʼp yooxpadoʼyba idyɨk iga kutɨʼɨyɨytyaiñ juʼp tema iniity jeʼm waañi y odoy tan̈kaʼaiñ ijɨɨsaktsɨʼyyaj. Iga maaj tan̈wɨkutɨʼɨyɨʼyiñ, tan̈kɨʼpin̈iñ Salmo 115:​9-11: «Oh, Israel, naidyaʼayɨ confianza Jehová. (Jeʼ iñescudo y miyooxpaʼtpa). Oh, jeʼm Aarón imanɨktam, naidyaʼayɨ confianza Jehová. (Jeʼ iñescudo y miyooxpaʼtpa). Mimichtyam iga in̈kɨɨn̈taʼmpa Jehová, naidyaytyaʼamɨ confianza Jehová. (Jeʼ iñescudo y miyooxpaʼtpa)». Jesɨk algun i iwanba idyɨk yɨʼp waañi, wɨap tan̈kupɨk iga jobity ijɨɨsaktsɨʼyba.

Tyiʼiga jaytya. Jempɨk ijayyaj, watykɨy ipɨkyaj jeʼtyim an̈matyiyaj iga odoy kujaʼamaytyaiñ idyɨk jeʼm jɨɨxiyaj tsampɨk importante. Juʼuts akwiñkejoʼoyi, jesɨgam Jehová iñɨʼmay jeʼm israelitajyaj iga odoy ikɨʼɨsyajiñ nɨʼɨpiñ, iwat iga Moisés ijaykunuʼguiñ watykɨy yɨʼp an̈kiʼmayoʼoyi. Jeʼ ixunba idyɨk iga wɨkutɨʼɨyɨytyaiñ iga jeʼm nɨʼɨpiñ ikwiñkejpa jeʼm ityi (Lev. 17:​11, 14). Jaʼyan̈ amtyɨy okmɨ, jeʼm apóstoles y jeʼm ancianojyaj ityyajwɨʼɨp Jerusalén ijɨykimyaj tyityam dyaʼ ikusuʼnɨʼyba Dios iga tan̈wattaʼmiñ, eybɨk nɨmyaj iga odoy pɨktaiñ jeʼm nɨʼɨpiñ (Hech. 15:​20, 29).

Mex iga jeʼm Bibliajom ity an̈matyiyaj iga watykɨy pɨkyajtaap, yɨʼp dyaʼ nɨmtoʼoba iga Jehová ixunba iga juchixkej tan̈wadyiñ jeempɨk. Jeempɨgam ikwiñkej Jesús jesɨk nɨm: «Cuando iniŋwejpátpa Dios, odoy nɨ̱mɨ jeet́im jeet́im aŋma̱t́i» (Mat. 6:7). Ijɨykiʼm waatyi jɨɨxiyaj jempɨk ikusuʼnɨʼyba Dios y wɨap tannɨm jesɨk tan̈watpa an̈wejpadoʼoyiyaj (Mat. 6:​9-13). Mex iga jesɨk tanan̈wejpaʼtpa Jehová dyaʼ tanɨmpa jeʼtyim an̈matyiyaj, dyaʼ tyi naspa siiga watykɨy tanjɨykiʼmpa jeʼtyim tema (Mat. 7:​7-11).

¡Tsaam wɨɨ iga jeʼm Biblia watykɨy ipɨkpa jeʼtyim an̈matyiyaj! Yɨʼɨmpɨgam, jeʼm Maaj Wɨbɨk An̈kejayoypaʼap tan̈kejaʼyba iga tawɨnɨgaʼyiñ (Is. 48:​17, 18).