ÖRAGA Bibliata guelgajcuna waquin asuntucunapita yaparir yaparir parlargan, ¿imanirtaj chayta rurargan? Quimsalata ricärishun:

Imay guelgacashgan wichan. Israelitacuna cawashgan wichan achca runacuna Leypa copiancunata manami charajchu. Chaymi cada cadala tabernaculupa naupancho y templuchopis shuntacärej Ley nishganta wiyananpaj (Deut. 31:10-12). Pero achca horacuna ichishgala caycar shumaj manachi wiyapäcojchu leipashganta (Neh. 8:2, 3, 7). Chaymi waquin asuntucunapita yaparir yaparir parlaptin más facilchi cargan yarparänanpaj y cäsucärinanpaj. Chaywanga israelitacuna manachi gongarganchu Diospa leynincuna y ima mandätuncuna cashgantapis (Lev. 18:4-22; Deut. 5:1).

Imano guelgacashgan. Salmos, El Cantar de los Cantares y Lamentaciones librucuna wilacushganga israelitacunapa cantacuna caycan. Waquin cantacunaga coro nirajmi. Waquin palabracuna yaparir yaparir yurimuptin ricächicun chay canciunpita ima teman cashganta y umachicurcunapaj fácil cashgantapis. Yarpäshun Salmo 115:9-11 nishganman, chaycho nin: “Israel runakuna, ¡TAYTA DIOSLAMAN yärakäriy! Paymi yanapamantsi y escüduno imapitapis tsapämantsi. Aarón aylu cürakuna, ¡TAYTA DIOSLAMAN yärakäriy! Paymi yanapamantsi y escüduno imapitapis tsapämantsi. TAYTA DIOSTA mantsakuqkuna, ¡payman yärakäriy! Paymi yanapamantsi y escüduno imapitapis tsapämantsi”. Pipis chay canciunta cantarga imaypis yarparajchi Jehovaman.

Imanirtaj guelgacashgan. Juccunaga waquin asuntucunapita yaparir yaparir parlargan imapis alapa importante captin o yarpächiyta munar. Israelitacuna yawarta micunanpaj mana munaptin, Jehová Moisesta nergan chay asuntupita yaparir yaparir parlapänanpaj. Diosga munargan israelitacuna mana gongananpaj yawarcho uywacunapa cawaynin cashganta (Lev. 17:11, 14). Tiempuwanpis apostulcuna y Jerusalencho caycaj ancianucunapis chay wichan cristianucunata yarpächergan yawarta mana micunanpaj (Hech. 15:20, 29).

Bibliacho waquin asuntucunapita yaparir yaparir parlaptinpis, chayga manami ninanchu noganchipis chayno ruranapaj. Diosta mañacushganchipita parlar, Jesús nergan umachicushganchi palabracunalawan yaparir yaparir mana mañacunapaj (Mat. 6:7). Payga wilacurgan imacunapita mañacunapaj, y nerganpis Dios munashganno cananpaj (Mat. 6:9-13). Chauraga, Diosta mañacushpanchega chay palabracunalawan yaparir yaparir mañacushwanchu. Pero ayca cutipis juc asuntupita Diosta mañacuyta puedinchi (Mat. 7:7-11).

¡Ima alishi Bibliacho waquin asuntucunapita cutin cutin parlaramun! Chayta rurar Taytalanchi Jehovaga quiquinchitami yachachimanchi (Is. 48:17, 18).