BIBLIATA quillcaj runacunaca huaquin partecunata, palabracunatami cutin repitishpa quillcajcuna carca. ¿Imamantataj chaitaca rurajcuna carca? Cunanmi chaitaca yachashun:

¿Ima tiempopitaj quillcarcacuna? Israelitacunapaj tiempopica Leypaj quillcashcacunataca mana cada uno charircacunachu. Chaimantami Leypi ima nishcata uyangapaj templopi tucuicuna tandanacujcuna carca (Deuteronomio 31:​10-12). Achcacunapurapi cashcamantami israelitacunaca huaquinpica mana atencionhuan uyai tucurcacuna (Nehemías 8:​2, 3, 7). Shinallataj Jehová Diosca israelitacunamanca achca mandashcacunatami curca (Levítico 18:​4-22; Deuteronomio 5:1). Chaimantami ashtahuan valishca partecunata cutin cutin nijpica israelitacunaca chaicunataca yuyari tucurcacuna. Qꞌuipaca imalla uyashcataca paicunapaj causaipimi pajtachi tucurcacuna.

¿Ima shinataj quillcarcacuna? Bibliapica huaquin librocunaca cantocunami can. Por ejemplo, Salmos, Cantar de los Cantares, Lamentaciones librocunaca cantocunatami charin. Chai librocunata quillcajcunaca huaquin cantocunapica ashtahuan valishca yuyaicunatami cutin cutin repitijcuna carca. Chaita rurajpimi chai canto ima nisha nishcata israelitacunaca intindijcuna carca. Shinallataj huaquin partecuna repitirij cashcamantami chai cantota yachangapajca ashtahuan jahualla carca. Shuj ejemplota ricushun. Salmo 115:​9-11-pica cashnami nin: “Israel, Mandaj Diospi shunguta churai. Paica canta ayudajmi. Cambaj escudopishmi. Aaronpaj huahuacunapish, Mandaj Diospi shunguta churaichij. Paica cancunata ayudajmi. Paica cancunapaj escudomi. Mandaj Diosta manchajcuna, Mandaj Diospi shunguta churaichij. Paica cancunata ayudajmi. Paica cancunapaj escudomi”. Israelitacunaca cai cantota chashna cantashpami imalla cantashcata yuyarijcuna carca.

¿Imamantataj repitishpa quillcajcuna carca? Huaquin Bibliata quillcajcunaca importante yuyaicunata yachachingapajmi cutin cutin repitijcuna carca. Por ejemplo, Jehová Diosca israelitacunaman: “Yahuartaca mana micunachu canguichij” nichunmi Moisesman mandarca. Paica chaitaca cutin cutinmi israelitacunamanca yuyachina carca. Pero Yaya Diosca ¿imamantataj cutin cutin chaita nichun mandarca? Israelitacunaca yahuar causaita ricuchishcatami intindina carcacuna (Levítico 17:​11, 14). Qꞌuipa tiempopica apostolcuna, Jerusalenpi causaj ancianocunapish, Diospaj ñaupajpi alli cangapaj yahuarta mana micuna cashcatami cutin yuyachircacuna (Hechos 15:​20, 29).

Caipi ricushca shinaca Bibliapica huaquin partecunapica cutin cutinmi chaillatataj nin. Shinapish ¿ñucanchijpish Diosta adorangapaj Bibliapi nishcacunataca cutin cutinchu de memoria repitina canchij? Mana. Jehová Diosca chaita rurachunca mana munanchu. Chaimantami Jesusca “Diosta mañacushpaca ama chaillatataj chaillatataj ninguichu” nirca (Mateo 6:7). Shinallataj Yaya Dios ñucanchij mañaicunata uyachun imacunallamanta mañai tucushcatami Jesusca yachachirca (Mateo 6:​9-13). De memoria chaillatataj chaillatataj nishpa mana mañana cashpapish ñucanchij ima minishtishcatami cutin cutin Yaya Diosta shungumanta mañai tucunchij (Mateo 7:​7-11).

Jehová Diosca Bibliapica huaquin yuyaicunata, huaquin partecunatami cutin repitishpa quillcachishca. Chashnami alli causangapaj imata rurana cashcata yachachin (Isaías 48:​17, 18).