E TAIKU putuputu ana te aronga tata Pipiria i te au tuatua puapinga. Ka uriuri tatou e toru tumu i pera ai ratou:

No naea i tataia ai. I Iseraela i taito, te maata anga o te tangata, kare a ratou puka Ture. Ka rongo ratou i te Ture e tatauia ra me uipa kapiti ratou i ko i te ngai akamorianga. (Deu. 31:​10-12) Penei e maata te au tamanamanata anga i rotopu i te urupu tangata ia ratou e tu ua ra e e akarongo ra no tetai tuatau roa. (Nehe. 8:​2, 3, 7) I te reira atianga, kua riro te taiku putuputu i te au tuatua ei tauturu i te tangata kia akamaara i te au apiianga puapinga mei te irava e kia taangaanga i te reira. Na roto i teia ravenga, kua tauturuia ratou kia maara i te au akonoanga e te au ture taka meitaki a te Atua.—Levi. 18:​4-22; Deu. 5:1.

Akapeea te reira te tataia anga. E 10 patene o te Pipiria e au imene ’atuia—kapiti mai te puka o Salamo, te Pe’e o Solomona e te Aue o Ieremia. Tetai au imene, ka taiku putuputuia te au tuatua ei akateiaa i te tumu manako o te imene. Ka tauturu i te aronga akarongo kia akamaara i te reira. Ei akaraanga, karanga a Salamo 115:​9-11: “E Iseraela e, e irinaki koe ia Iehova: koia to ratou tauturu e to ratou paruru. E te ngutuare o Aarona, e irinaki koe ia Iehova: koia to ratou tauturu e to ratou paruru. Ko kotou tei mataku ia Iehova, e irinaki ia Iehova: koia to ratou tauturu e to ratou paruru.” Na te taiku putuputu anga i te au tuatua, kua tauturu i te aronga imene kia tamou ngakau i te au tuatua mou.

Eaa te reira i tataia ai. Kua taiku putuputu te aronga tata Pipiria i te au manako puapinga. Ei akaraanga, te akaue anga a Iehova ia Iseraela auraka e kai i te toto, kua akakite aia kia Mose kia taiku putuputu i te tumu no te reira. Akakite te Atua tei te toto oki te ora e ora ai te au mea katoatoa. Koia oki ko te toto te ora. (Levi. 17:​11, 14) I muri mai te akakite anga te au apotetoro e te aronga pakari i Ierusalema i te au mea ka patoi te au Kerititiano ei akamareka i te Atua, kua akakite akaou ratou e auraka e kai i te toto.—Anga. 15:​20, 29.

Kare a Iehova i akakoro e kia riro te au tuatua taokioki ei peu mātauia. Ei akaraanga, karanga a Iesu: “Kia pure kotou, auraka e maata te tuatua rikiriki puapinga kore.” (Mata. 6:7) Aru mai, kua taiku aia i te au tumu manako ka pure tatou kia rotai ki to Iehova anoano. (Mata. 6:​9-13) Noatu kare tatou e tuatua taokioki i roto i ta tatou pure, ka pure ra tatou i te au tumu manako tukeke.—Mata. 7:​7-11.

No reira, e tumu meitaki tetai i taiku putuputu ei te Pipiria i te au tuatua. Ko tetai ravenga ïa e apii mai ana to tatou Puapii Maata Rava Atu i te au mea e puapinga ai tatou.—Isa. 48:​17, 18.