O BIBLISKA pisatelija ponekogaš povtorinena sine o ista fraze taro lafi ko lafi. Te dikha trin pričine soske šaj kerena sine adava:

O vreme keda sine pišime. Ko purano Izrael, but taro manuša na sine len plo lično primerok taro e Mojseeskoro zakoni. Edinstveno kaj so šunena sine o čitibe taro Zakoni sine keda khedena pe zaedno anglo šatori (5. Moj. 31:10-12). Bari tani i verojatnost kaj nesave bukja lena sine lengoro vnimanie džikote šunena hem saatencar tergjona sine ki adaja bari gužva (Neem. 8:2, 3, 7). Ko asavke prilike, nesave važna fraze sine povtorime te šaj o narodo polokheste te pamtinel o stihija hem te primeninel len. Adaleske so povtorinena pe sine nesave lafija posebno pomožinela len sine te pamtinen o detalija taro zakonija so dengja len o Jehova (3. Moj. 18:4-22; 5. Moj. 5:1).

Sar sine pišimo. Okolu 10 posto taro teksti ki Biblija tano gilja, kote soj vklučime o Psalmija, Pesna nad Pesnite hem Plač Eremiin. Ko nesave gilja isi refreni, javere lafencar, lafija so povtorinena pe. Agjaar šaj sine te istakninel pe i tema e giljakiri hem polokheste te pamtinen pe o lafija. Na primer, primetin o lafija soj pišime ko Psalm 115:9-11: „Tu Izrael, neka ovel tut doverba ko Jehova! Ov tano tli pomoš hem tlo štiti. Tumen so avena taro Aron, neka ovel tumen doverba ko Jehova! Ov tano tumari pomoš hem tumaro štiti. Tumen so darana taro Jehova, neka ovel tumen doverba ki leste! Ov tano tumari pomoš hem tumaro štiti“. Adava so povtorinena pe akala lafija, pomožinela sine e pejačenge te čhiven akala važna čačipa ki pumari godi hem ko pumaro vilo.

Soske sine pišime. O bibliska pisatelija ponekogaš povtorinena sine o fraze kola so sine važna. Na primer, keda o Jehova zapovedingja e Izraelconge te na han rat, ov vakergja e Mojseeske nekobor puti te povtorinel soske rodela lendar adava. O Devel manglja te istakninel kaj o životo taro sekova telo tano leskoro rat, javere lafencar kaj o rat pretstavinela o životo (3. Moj. 17:11, 14). Pokasno, keda o starešine hem o apostolija ko Erusalim pišingje taro so valjani o hristijanja te arakhen pe te šaj te keren adava so rodela o Devel, ola palem istakningje kaj valjani te vozdržinen pe taro rat (Apo. 15:20, 29).

Iako i Biblija povtorinela nesave fraze, adava na značinela kaj o Jehova mangela te ovel amen navika te povtorina o bibliska fraze. Na primer, o Isus vakergja: „Keda molinena tumen ma vakeren sekogaš o ista bukja“ (Mat. 6:7). Palo adava ov spomningja nesave bukja kolenge so šaj te molina amen, a tane sprema e Devleskiri volja (Mat. 6:9-13). Adaleske, iako amen na povtorinaja o ista lafija ko amare molitve, sepak adava na značinela kaj na smejnaja te molina amen poviše puti baši jekh isto buti (Mat. 7:7-11).

Isi šukar pričine soske ko e Devleskoro lafi povtorinena pe nesave lafija hem fraze. Akava tano jekh taro but načinija sar amaro Baro Učiteli sikavela amen amare šukaripaske (Isa. 48:17, 18).