E BIBLIJAKE piscija podijekh puti ponovinđe disave izrazija lafi palo lafi. Akana ka razmotrina trin buća sebepi kola šaj ćerđe odova:

O vreme ked hine pisimo. Ko purano Izrael but manuša na hine len po lično primerak ando Zakon. Skoro uvek šunđe sar čitini pe o Zakon ked ćedinđe pe sare anglo sveto šator (Pon. zak. 31:10-12). Šaj te zamislina kobor buća šaj hine te len olengi pažnja đi hine satencar ko pre hem ki but bari gužva (Nem. 8:2, 3, 7). Ko asavke situacije, odova so ponovinđe nekobor putija disave važna lafija pomožinđa e manušenđe polokho te pamtinen len hem te primeninen len ko po životi. O ponavljanje posebno pomožinđa len te pamtinen o detaljija ando zakonija kola dinđa len o Devel (Lev. 18:4-22; Pon. zak. 5:1).

Sar hine pisimo? Oko 10 posto ki Biblija tane đilja, sar na primer: Psalam, Pesme nad Pesmama hem Tužbalice. Disave đilja isi len refren, avere lafencar, lafija kola ponovinena pe. Odola lafija istakninena i tema andi đili hem pomožinena te pamtinen pe o lafija. Na primer, zapazin o lafija kotar Psalam 115:9-11: „O Izrael, uzdajin tut upro Jehova – ov tano ti pomoć hem to štit. Tumen e Aronese potomkija, uzdajinen tumen upro Jehova – ov tano tumari pomoć hem tumaro štit. Tumen kola darana ando Jehova, uzdajinen tumen upro Jehova – ov tano tumari pomoć hem tumaro štit.“ Odova so akala lafija ponovinđe pe pomožinđa okolenđe so đilabđe te khuven lenđe ko vilo akala važna buća.

Sose hine pisimo? E biblijake piscija podijekh puti ponovinđe o važna izrazija. Na primer, ked o Jehova phenđa e Izraelcenđe te na han rat, ov e Mojsijese nekobor puti ponovinđa sose na valjani odova te ćeren. O Jehova manglja te istaknini so o životi ando telo tano ko rat, znači o rat predstavini o životi (Lev. 17:11, 14). Kasnije, ked o apostolija hem o starešine ko Jerusalim pisinđe kole bućendar o hrišćanija valjani te ciden pe te bi ugodinena e Devlese, on palem istakninđe so valjani te ciden pe ando rat (Dela 15:20, 29).

Iako ki Biblija isi lafija kola ponovinena pe, odova na značini so o Jehova mangela te ovel amen navika stalno te ponovina disave izrazija andi Biblija. Na primer, o Isus phenđa: „Ked molinena tumen, ma ponovinen uvek ista lafija“ (Mat. 6:7). Palo odova, ov phenđa aso kola buća šaj te molina amen (Mat. 6:9-13). Iako ked molinaja amen na ponovinaja uvek ista lafija, amen šaj te vaćera e Jehovaja ando ista buća kobor god putija mangaja (Mat. 7:7-11).

Dikhaja so isi šukar razlogija sose ki Biblija disave lafija hem izrazija ponovinena pe. Odova tano jekh ando but načinija sar amaro Baro Učitelj sikavi amen (Is. 48:17, 18).