BƐBƆ bɛhworɔle Bible ne, ɔtɔ mmerɛ bie a, sɛ bɛkã edwirɛ bie wɔ Bible ne bue bie a, ekonwu ye ne, né basa bahã sɔ dwirɛ ne ala wɔ nekaa foforɛ. Nzuati ɔ? Ɛmɔma yɛnea nningyein nzã bɔ ebia ɔmaa bɛyɛle sɔ ɔ.

Mmerɛ bɔ bɛhworɔle ne. Wɔ tete Yisraelfoɛ nemɔ aberɛ so ne, né mmeni pẽe llé Mmraa nwomaa ne bie. Yeti sɛ né bekoyia nu wɔ ɛtena sua nanu a, yeɛ né bɛkenga bekyire bɛ ɔ. (Deut. 31:​10-12) Mmeni pẽe yeɛ né beyia nu wɔ berɛ ɔ, na né begyina berɛ bɛkyɛ. Ɛhẽne ati, ɔkɔhora kɔwa kyɛ, sɛ bɛkenga Mmraa nwomaa ne a, na nningyein ahoroɛ kora twẽtwẽ b’adwene. (Neh. 8:​2, 3, 7) Yeti bɔ ɔkɔyɛ na bahora bakae edwirɛ biemɔ bɔ yenwo hia ne, né bɛkenga sɔ dwirɛ ne mmerɛ pẽe kyɛbɔ ɔkɔyɛ a, bɛkɔhora bɛkɔfa bɛkɔyɛ adwuma ɔ. Sɔ nikyee bɔ né bɛyɛ ne bokale mmenia nemɔ maa bɛkaele ahyɛdeɛ bɔ Nyameɛ fa mane bɛ ne.—Lew. 18:​4-22; Deut. 5:1.

Atẽe bɔ bɛfale so bɛhworɔle ɔ. Sɛ ɛkenga Bible ne a, dwein ahoroɛ pẽe yeɛ ekonwu ye wɔ nu ɔ. Ebie yeɛ ole Edwein, Edwein Nu Dwein, ɔne Awuye nwomaa ne. Edwirɛ bɔ ɔwɔ sɔ dwein ahoroɛ hemɔ nu ne, enu bie wɔ berɛ a, bɛhãne ye mmerɛ pẽe kyɛbɔ ɔkɔyɛ a, bɔ otie ne kɔhora kɔhye kogua ye tianu ɔ. Wɔde nea edwirɛ bɔ ɔwɔ Edwein 115:​9-11 ne: “Ao Yisrael, fa wɔ wora wura AWURADE nu! Ye yeɛ ɔte wɔ bokafoɛ ne w’akokyɛm ɔ. Ao Aarɔn awuro ama, ɛ́mɔfa ɛmɔ wora béwura AWURADE nu! Ye yeɛ ɔte ɛmɔ bokafoɛ ne ɛmɔ akokyɛm ɔ. Ɛmɔ bɔ ɛmɔsuro AWURADE ne, ɛ́mɔfa ɛmɔ wora béwura AWURADE nu! Ye yeɛ ɔte ɛmɔ bokafoɛ ne ɛmɔ akokyɛm ɔ.” Ɔnate kyɛ bahã edwirɛ ne mmerɛ pẽe wɔ dwein nanu nati, wamaa edwein ne ayɛ fɛ, na bɛbɔ bɛto ne koso, bɛkɔkae enu edwirɛ ne.

Bɔ yeti yeɛ bɛhworɔle ɔ. Bɛbɔ bɛhworɔle Bible ne, ɔtɔ mmerɛ bie a, edwirɛ bɔ yenwo hia paa ne, né bɛtworɔ ye mmerɛ pẽe. Ebie yeɛ ole mmerɛ bɔ Yehowa hãhyirele Yisraelfoɛ nemɔ kyɛ nnɛmaa bedi mogya ne. Yehowa maa Mose hworɔle bɔ yeti yeɛ né ɔnzɛkyɛ bɛyɛ sɔ ne mmerɛ pẽe. Né Yehowa pena kyɛ Yisraelfoɛ nemɔ nwu kyɛ anwoɔnaen biala, ye ngõa wɔ ye mogya nu, kyire kyɛ, mogya ne gyi berɛ ma ngõa. (Lew. 17:​11, 14) Nzieɛn, mmerɛ bɔ né asomafoɛ ne, ɔne mbanyi bɔ bɛwɔ Yerusalem ne kã nningyein bɔ ɔnzɛkyɛ Kristofoɛ yɛ nanwo dwirɛ ne, besa bɛhãne mogya bɔ ɔnzɛkyɛ bedi nanwo dwirɛ biekũ.—Aso. 15:​20, 29.

Ɔwɔ nu kyɛ Bible ne kã edwirɛ biemɔ mmerɛ pẽe de, nakoso ɛhẽne ngyire kyɛ, odikyɛ yɛ koso yɛkye tworɔnzɛm bie yegua yɛ tianu na yɛkã ye mmerɛ pẽe. Yesu po hãne kyɛ: “Sɛ ɛmɔbɔ mbaeɛ a, nnɛma ɛmɔyɛ ndoatoa.” (Mat. 6:7) Yesu maa yenwuni nningyein bɔ ɔsɔ Nyameɛ nye bɔ yɛkɔhora yɛkɔbɔ yenwo mbaeɛ ɔ. (Mat. 6:​9-13) Yeti sɛ yɛbɔ mbaeɛ a, ɔnzɛkyɛ yɛyɛ ndoatoa, nakoso yɛkɔhora yɛkɔbɔ nningyein bɔ ohia yɛ nanwo mbaeɛ mmerɛ pẽe.—Mat. 7:​7-11.

Edwirɛ bɔ Bible ne kã ye mmerɛ pẽe ne, Nyameɛ amma bandworɔ ye mbaen. Na mmom, ɔte atẽe kõ bɔ yɛ Kyerɛkyerɛniɛ Yehowa faso kyirekyire yɛ bɔ ɔte pá ma yɛ ɔ.—Yes. 48:​17, 18.