QULLAAWA MAXAAFA borreessino manni mittu gari hedo noo gedeenni marro marro hige borreessino woyiti no. Hanni Qullaawa Maxaafa borreessino manni konni garinni borreessanno gede assansara dandaannoha sase korkaata laˈno:

Qullaawa Maxaafa borreessinoonni yanna. Hundi Israeele waro rooru mannira uminsahu Seeru maxaafi dinonsa. Insa roore woyite xaadooshshu dukkaniwa mannu gamba yiinowa Seera nabbambanna macciishshitanno. (Mar. 31:10-12) Insa lowo manni noowa Seera nabbambanna seeda saate uurrite macciishshitanno woyite hedonsa bebbeehantannoha ikkara dandaanno. (Neh. 8:2, 3, 7) Togoo yannara qara hedo galagale nabbawa macciishshanni noo manni qummeeshsha qaaganno gedenna loosu aana hosiisanno gede kaaˈlitanno. Mite qaalla galagalle nabbawa roorenkanni insa Yihowa uyinonsa Seeri giddo borreessinoonniha mitto mittonka coye qaagganno gede kaaˈlitannonsa.—Lew. 18:4-22; Mar. 5:1.

Qullaawa Maxaafa borreessinoonni gara. Mite Qullaawu Maxaafi maxaaffa lawishshaho Faarsote maxaafi, Faarso Roore Faarso maxaafinna Ermiyaasi Qurto maxaafi batinye faarso amadino. Mito woyite faarsote cuˈmo luphi assine kulate faarsuwate giddo mite qaalla marro marro hinge borreessinoonni; tini qolte macciishshanno manni tenne qaalla qaaganno gede kaaˈlitanno. Lawishshaho hanni Faarso 115:9-11 noo hedo laˈno; qummeeshshu togo yaanno: “Kiˈne Israeelete manni kayinni, kaaˈlannoˈnehunna agarannoˈnehu Kaaliiqa ikkinohura, iso addaxxe. Kiˈne Kaaliiqi qeese, kaaˈlannoˈnehunna agarannoˈnehu iso ikkinohura Kaaliiqa addaxxe. Kiˈne waajjitinannisiri baalu, kaaˈlannoˈnehunna agarannoˈnehu isootina, Kaaliiqa addaxxe.” Kuri qaalla marro marro hinge borreessa faarsanno manni konne muxxe ikkino halaale wodaninsara wodhanno gede kaaˈlitanno.

Lowo geeshsha hasiisanno halaale luphi asse kulate. Qullaawa Maxaafa borreessino manni mito woyite lowo geeshsha hasiisanno halaale marro marro hige borreessino. Lawishshaho Yihowa Israeelete manni mundee itannokki gede hajaji woyite ita hasiissannonsakkihu mayiraatiro Muse duucha hige kulanno gede assino. Maganu kalaqamu lubbo mundeete giddo noota yaano mundee heeshsho riqibbannota luphi asse kula hasiˈrino. (Lew. 17:11, 14) Gedensoonni Yerusaalamete heedhanno cimeeyyenna soqqamaasine Magano hagiirsiisate maa qoropha hasiissannoro kultu woyite mundeetewiinni xooqa hasiissannota wirro luphi assite kultino.—Soq. 15:20, 29.

Yihowa mite Qullaawa Borro hedo marro marro hinge coyiˈra ammaˈnote budi gede asse dihedanno. Lawishshaho Yesuusi, “Huuccatto assidhinanni woyite, . . . yitinoonnita calla yitinoonte” yiino. (Mat. 6:7) Hakkiinni isi Maganu fajjo ledo sumuu yitannoti hiittoo huuccattootiro kulino. (Mat. 6:9-13) Hakko daafira mittu gari qaalla calla horoonsiˈne huucciˈra qoropha hasiissannonkeha ikkirono, mitte hajo daafira duucha hinge huucciˈra dandiineemmo.—Mat. 7:7-11.

Qullaawu ayyaaninni borreessinoonnihu Maganu Qaali giddo mite qaalla woy hedo marro marro hinge borreessinoonnihu dimullaati. Bayiru Rosiisaanchinke woyyannonkere rosiisannonkete batinye doogga giddo mitte tenneeti.—Isa. 48:17, 18.