E TELE taimi e toe sii mai ai e i latou na tusia le Tusi Paia, ni faaupuga lava e tasi. Seʻi mātau ni vala se tolu na māfua ai ona latou faia faapea:

Le vaitaimi na tusia ai. I Isaraelu anamua, o le toʻatele o tagata e leʻi iai ni a latou kopi o le Tulafono. O le auala autū e latou te faalogo ai i le faitauina o le Tulafono, pe a faapotopoto le nuu i le faleʻie paia ma le malumalu. (Teu. 31:​10-12) E mautinoa e tele mea na latou tosina ese ai a o faalogologo, ma e latou te tutū foʻi mo se taimi umi i se faapotopotoga toʻatele. (Nee. 8:​2, 3, 7) I taimi o na faatasitasiga, o le toe taʻua o faaupuga autū na faigofie ai i tagata ona manatua na tusitusiga ma faatatauina. O le toe taʻua o ni faaupuga patino, e matuā fesoasoani iā i latou e manatua ai faamatalaga auʻiliʻili o nisi o mataupu, e pei o poloaʻiga a le Atua ma ana iʻuga faafaamasinoga.—Levi. 18:​4-22; Teu. 5:1.

Le auala na tusia ai. E pe tusa o le 10 pasene o le Tusi Paia na tusia o ni pese, lea e aofia ai tusi o Salamo, Pese a Solomona, ma Auega. O nisi pese e toe taʻua ai lava faaupuga e tasi, ina ia faamatilatila ai lona autū ma fesoasoani i tagata faalogologo e manatua upu o le pese. O se faaaʻoaʻoga, seʻi mātau faaupuga o loo i le Salamo 115:​9-11: “Isaraelu e, ia faatuatua iā Ieova, o ia o lo outou fesoasoani ma lo outou talita. Le aiga e, o Arona, ia faatuatua iā Ieova, o ia o lo outou fesoasoani ma lo outou talita. O outou o ē e matataʻu iā Ieova, ia faatuatua iā Ieova, o ia o lo outou fesoasoani ma lo outou talita.” Seʻi faaata le faigofie ona tāmau i mafaufau ma loto o tagata pepese o na upu moni tāua, ona o le toe taʻua o faaupuga lava e tasi.

Le māfuaaga na tusia ai. O nisi taimi e toe sii mai ai e tagata na tusia le Tusi Paia ni faaupuga tāua. O se faaaʻoaʻoga, ina ua faatonuina e Ieova tagata Isaraelu e aua le ʻaina le toto, na ia uunaʻia Mose e toe taʻua i le tele o taimi le māfuaaga o le faatonuga. Na finagalo le Atua e faamatilatila mai le manatu o le ola o le meaola ua iai i lona toto, o lea, o le toto e faaata mai ai le ola o le meaola. (Levi. 17:​11, 14) Mulimuli ane, ina ua faailoa mai e le ʻauaposetolo ma toeaina i Ierusalema mea e ao ona ʻalofia ina ia maua ai le finagalo malie o le Atua, na latou toe faamatilatila mai le manaʻomia ona latou taumamao mai i le toto.—Galu. 15:​20, 29.

E ui e iai taimi e toe taʻua ai i le Tusi Paia se faaupuga lava e tasi, ae e lē faapea ai e finagalo Ieova e tatou te aʻo faatauloto mau o le Tusi Paia. O se faataʻitaʻiga na fetalai Iesu: “Pe a e tatalo, aua le tautū i upu masani.” (Mata. 6:7) E lē gata i lea, na ia faailoa mai mataupu talafeagai e tatalo ai, lea e ōgatusa ma le finagalo o le Atua. (Mata. 6:​9-13) O lea, e ui e tatou te ʻalofia le tautū i upu masani i a tatou tatalo, ae e mafai ona tatou tatalo mai i lea taimi i lea taimi i se mataupu e tasi.—Mata. 7:​7-11.

O lea, e iai māfuaaga lelei e toe taʻua ai i le tele o taimi ni upu ma ni faaupuga patino i le Tusi Paia. O se tasi lea o auala ua aʻoaʻo ai i tatou e lo tatou Aʻoaʻo Sili i mea aogā.—Isa. 48:​17, 18.