INGI nsaa bafundi ba Bible babaadi abalushuula miaku imune kishima ku kishima. Tutaluleyi tubingilo tusatu tubaadi tutakule bafundi ba Bible buabadia kukita bino:

Kipungo kibaadi mufundibue. Mu Isalele a kala, bantu be bungi ta babaadi na wabo mukunda wa miiya nya. Be bungi babaadi abakatemesha ku’ababadika muiya pababadi abebungu ku tabernakele. (Miy. 31:​10-12) Kubaadi mianda ilombene kuibakutshishua kuteemesha na babaadi abemana munda mua nsaa i bungi munkatshi mua bantu bebungi. (Ne. 8:​2, 3, 7) Mu ino nsaa i bino, kuambuula mianda ikata kubaadi kulombene kukuasha bantu bua kutentekiesha bifundue na kuibapa mushindo wabadia kuibitumikila. Kuambula bingi bishima, kubaadi akuibakuasha ngofu buabadia kutentekiesha miiya ya Yehowa ibaadi ebapa kantu pa kantu.—Lv. 18:​4-22; Miy. 5:1.

Nfundilo. Bingi bipindi bia mu Bible mbebifunde bu misambo. Bu kileshesho, mukanda wa Misambo, Lono lua Salomone, na Kuidila. Ingi nsaa misambo ibaadi na bipunguluilo, bibaadi abilesha mutue wa muanda na kukuasha bantu abateemesha buabadia kulamiina bishima. Bu kileshesho, tala bishima biatupete mu mukanda wa Misambo 115:​9-11, abiamba’shi: “Baana ba Isaleele! Kulupilaayi kui Yehowa. bukwashi bwabo na ngabo aabo nnaaye! Nshibo ya Aarone! Kulupilaayi kwi Yehowa. bukwashi bwabo na ngabo aabo nnaaye! Anwe abatshinyi Yehowa! kulupilaayi kwadi. Bukwashi bwabo na ngabo aabo nnaaye!” Kuambuula bino bishima, kubaadi kulombene kukuasha batuyimba buabadia kutuesha bia binyibinyi mu binangu na mu mashimba aabo.

Bua kushinkamisha mianda i na muulo. Ingi nsaa bafundi ba Bible babaadi abambuula mianda i na muulo ukata. Bu kileshesho, pabaadi Yehowa mupeleshe bena Isalele kudia mase, badi mulungule Moyise buadia kuibambuluila kano kabingilo misuusa ibungi. Efile Mukulu badi akumiina kushimika kasele’shi muwa wa kintu kioso wi mu mase, na’shi mase aalesha muwa. (Lv. 17:​11, 14) Kunyima, Batumibua na bakulu ba mu Yelusalema pababaukile muulo wa kupela kuinyongosha Efile Mukulu, babaadi bashimikie kasele dingi pabitale kuilama ku mase.—Bik. 15:​20, 29.

Sunga’shi Bible baadi muambuule bino bishima, bino tabilesha’shi abitungu tuikale na kiubishi kia kuambulanga bishima bia mu Bible nya. Bu kileshesho, Yesu bakuile’shi: “Nsaa y’anutekie, tanuambuulanga mianda imuneimune.” (Mat. 6:7) Na dingi, baadi akumiina kuitulesha mushindo wi buwa watudia kuteka mianda ipushene na kikiebe ki’eshimba di’Efile Mukulu. (Mat. 6:​9-13) Sunga biekala’shi ta tui balombene kuambuula bishima bimune misuusa ibungi mu luteko, tui na bulungantu bua kuambuula ingi mianda i na muulo misuusa ibungi.—Mat. 7:​7-11.

Mu eyi di’Efile Mukulu diyokielue mbambuule ingi miaku na bingi bishima bua tubingilo tui buwa. Uno nyi ngumune wa ku mishindo yabetulongieshaa kui Mulongieshi etu Mukata bua’shi bitukuashe.—Yesh. 48:​17, 18.