ISINI kaachi echi Biblia osáami wisabé niraa osali jaré raʼíchali ibili niraa. ¿Chúsiá echi riká nokali? Inepo bikiá japi jitra echi riká nokáliré:

Chu kabú osairu. Wiká israelitas japi chabé pireili, ke olali bilé copia japoná oserúami nili echi Nulalíwami, alí ne sojí sinéami bi kipuli japalí simíali echoná tabernáculo alí echoná templo (Deut. 31:10-12). We jilí níliré alí ke me omériliré aʼlá kipúa jiti wiká horas simárili jaka nasipa japoná niruili wiká pagótami (Neh. 8:2, 3, 7). Echalí, wisabé niraa kipúa echi raʼíchali we natéami iʼwírili echi israelitas jiti ke me jilí nirama ku néwalayá alí nokayá japi bineli. Alí wabé natéami nili wisabé niraa kipúa echi raʼíchali we natéami japalí newalasa riweili wiká namuti, japi riká echi nulalíwami japi Jeobá aneli echi israelitas (Lev. 18:4-22; Deut. 5:1).

Chúriká osairu. Jaré libros japi oserúa uchuwi echoná Biblia canciones ju, japi riká Salmos, El Cantar de los Cantares alí Lamentaciones. Jaré canciones olali bilé estribillo. Echi raʼíchali japi wisabé niraa wikarali, iʼwírili jiti inámima piri jitra raʼicha echi canción alí jiti ke jilí nirama néwalayá echi canción. Jiti machiboa, leéripo Salmo 115:9-11: “Oh, Israel, bichiwi Jeobá. (Echi ju japi emi iʼwiri alí emi níwala escudo). Oh, Aarón bitélachi, bichiwi Jeobá. (Echi ju japi emi iʼwiri alí emi níwala escudo). Emi japi majaa Jeobá, bichíwisi Jeobá. (Echi ju japi emi iʼwiri alí emi níwala escudo)”. Japalí bilé wikarae echi canción, we aʼlá newalali echi namuti we natéami japi bineli.

Chúsiá osairu. Jaré osáami wisabé niraa anili jaré raʼíchali jiti we natéami nili alí nakili japi we aʼlá binema. Japi riká, japalí Jeobá aneli echi israelitas japi ke okésaré echi la, Jeobá ko isili japi Moisés wisabé niraa animea chúsiá nijéwisaré jepuná. Onorúami ko nakiyé japi we aʼlá inámima japi echi la jitra piré sinéami (Lev. 17:11, 14). Pe aminana, japalí echi apóstoles alí echi ancianos japi mochili echoná Jerusalén, raʼíchili echi namuti jitra japi ta ke nokisáré ati kanílitinalaká Onorúami, checho anijoli japi we natéami ju ke néea echi la (Hech. 15:20, 29).

Tákoré echoná Biblia isini kaachi jaré raʼíchali wisabé niraa oserúa uchuwi, jepuná ko ke aniwáami ju japi Jeobá nakí japi ta wisabé niraa aniboa jaré raʼíchali. Jesús anili japi ta ke wisabé niraa aniboa bilepi bi namuti (Mat. 6:7). Ayénachó anili jaré namuti japi ta omeri ruyea Jeobá japalí ti echi yúa raʼicha alí japi echi galé (Mat. 6:9-13). Tákoré japalí ti raʼicha Jeobá yúa, ke ti echi bi raʼíchali nee wisabé niraa, ati omeri raʼichia Jeobá yúa wisabé niraa echi namuti jitra japi ta nakí (Mat. 7:7-11).

¡We aʼlá ju japi echoná Biblia wisabé niraa oserúa uchuwi jaré raʼíchali! Echi riká tamó bineri Jeobá jiti nakí japi ta aʼlá pirélipo (Is. 48:17, 18).