EMA neʼebé hakerek Bíblia dala ruma repete fraze neʼebé hanesan liafuan ba liafuan. Hanoin toʼok razaun tolu tanbasá hakerek-naʼin sira halo nuneʼe:

Neʼe hakerek iha períodu saida? Iha Izraél antigu, ema barak la iha kópia ba Ukun-Fuan. Sira barak rona ba Ukun-Fuan bainhira nasaun neʼe halibur hamutuk iha tenda santu. (Deut 31:​10-12) Karik iha buat barak neʼebé bele dada sira-nia atensaun nuʼudar sira rona no hamriik ba oras barak iha ema-lubun nia leet. (Neem 8:​2, 3, 7) Iha situasaun hanesan neʼe, hodi temi beibeik liafuan neʼebé importante sei halo fasil ba ema atu hanoin-hetan eskritura no aplika. Hodi repete liafuan neʼebé espesífiku, neʼe sei ajuda sira atu hanoin-hetan ho didiʼak kona-ba ukun-fuan neʼebé Jeová fó ona ba sira.—Lev 18:​4-22; Deut 5:1.

Neʼe hakerek iha dalan oinsá? Maizumenus porsentu 10 husi Bíblia mak kona-ba knananuk sira. Neʼe inklui livru Salmo, Salomão nia Knananuk, no Lamentasaun. Dala ruma knananuk sira uza liafuan neʼebé repete hodi tau énfaze ba tema husi knananuk. No neʼe ajuda rona-naʼin atu hanoin-hetan liafuan sira. Porezemplu, haree liafuan iha Salmo 115:​9-11: “Oh Izraél, tau fiar ba Jeová, nia mak imi-nia ajuda-naʼin no imi-nia eskudu. Oh Arão nia umakain, tau fiar ba Jeová, nia mak imi-nia ajuda-naʼin no imi-nia eskudu. Oh imi neʼebé hamtaʼuk Jeová, tau fiar ba Jeová, nia mak imi-nia ajuda-naʼin no imi-nia eskudu.” Ita bele haree katak hodi repete liafuan sira-neʼe sei ajuda kantadór atu hanoin-hetan pontu importante no rai ida-neʼe iha sira-nia neon no laran.

Tanbasá neʼe hakerek? Dala ruma ema neʼebé hakerek Bíblia repete fraze neʼebé importante. Porezemplu, bainhira Jeová bandu ema Izraél atu labele han raan, nia husu Moisés atu fó sai beibeik razaun tanbasá labele han raan. Maromak hakarak atu énfaze katak kriatura hotu nia moris mak iha ninia raan, no raan mak reprezenta moris. (Lev 17:​11, 14) Liután neʼe, bainhira apóstolu no katuas sira iha Jeruzalein hakerek kona-ba ema Kristaun presiza hasees an husi saida atu halo Maromak kontente, sira énfaze tan katak importante tebes atu hasees an husi raan.—Após 15:​20, 29.

Maski nuneʼe, Jeová lakohi ita atu hatoman an hodi repete beibeik fraze husi Eskritura sira. Porezemplu, Jesus hatete: “Kuandu ó halo orasaun, keta repete beibeik liafuan neʼebé hanesan.” (Mt 6:7) Tuirmai nia fó sai kona-ba buat neʼebé ita bele husu iha orasaun neʼebé tuir Maromak nia hakarak. (Mt 6:​9-13) Entaun, maski ita la repete liafuan neʼebé hanesan iha ita-nia orasaun, maibé ita bele repete ka halo orasaun kona-ba tópiku neʼebé hanesan.—Mt 7:​7-11.

Bíblia repete beibeik liafuan no fraze sira ho razaun neʼebé diʼak. Neʼe mak dalan ida neʼebé ita-nia Mestre Boot hanorin ita oinsá atu bele hetan benefísiu.—Isa 48:​17, 18.