MISY fotoagne o mpanoratse Baibolio magneregne mirehake fehezanteny raike mitovy. Andao tika handineke ty anto’e telo va’e nahavy iareo nanao izay:

Ty fotoagne nanoratagne aze. Tsy nanagne ty nandikagne i Lalà i Mosesỳ ty ankamaroa o Israelita talohao. Naharey i Lalànay avao iareo naho fa niarake nivory raike tamy i tragnolaỳ teo. (Deot. 31:10-12) Va’e nisy raha zao nagnelengelegne ndra tsy nampifantoke naho fa nitsangagne teo avao tagnate ty lera maro iareo. (Neh. 8:2, 3, 7) Naho fa naheregne nirehafegne indraike areke i rehake taloha rey, le ho mora amy iareo ty nitadidy naho nampihatse aze. Nagnampe iareo hahazo ty pitsopitso i Lalàna nimea i Jehovah-ay ty fagneregnagne i rehakey.​—Lev. 18:4-22; Deot. 5:1.

Ty fomba nanoratagne aze. Hira ty folo isan-jato o Baibolio. Agnisa izay ty boke Salamo, Tononkiran’i Solomona naho Fitomaniana. Misy fotoagne o hirao misy rehake miherenkeregne, mba hagnasongadignagne i foto-keve’ey naho hagnampeagne i mpitsanogney hahatadidy i rehakey. Henteo fa misy rehake hoe izay ty amy Salamo 115:9-11 ao tie: “Matokisa i Jehovah ry Israely! Ireke ty mpagnampe naho fikalagnam-bala iareo. Matokia i Jehovah ry tarira i Arona! Ireke ty mpagnampe naho fikalagnam-bala iareo. Ze matahotse le matokia i Jehovah! Ireke ty mpagnampe naho fikalagnam-bala iareo.” Nagnampe i mpihiray mba hitadidy ty hamarenagne sarobily agnate fo’e ao ty fagneregnagne o rehake reo.

Ty anto’ e nanoratagne aze. Misy fotoagne o mpanoratse Baibolio nagneregne nanoratse ze rehake lahibey. Naho fa nandily o Israelitao mba hifaly lio ohatse ty Jehovah, le nasae’e naherenkere i Mosesy ty anto ze raha zay. Tean’Agnahare hasongadigne tie agnate o liò ao ty ay o nofotseo. Aigne areke o liò. (Lev. 17:11, 14) Tafara tatoy naho fa nitanisa ty raha hejen’Agnahare i apostoly naho i androanavi-pagnahy ta Jerosalema tao rey, le mbe tinogno iareo tao ka tie toko’e hofaliegne o liò.​—Asa. 15:20, 29.

Faie tsy tihoe magnerenkeregne i rehake rey ty Jehovah, le hidika zay tie tea’e hagnerekeregne i rehake rey ka tikagne. Nirehake aza ty Jesosy tie: “Naho fa mivavake nareo, le ko magnerenkeregne raha mitovy avao.” (Mat. 6:7) Avy eo reke nirehake raha azontikagne rehafegne amy ty vavake sady mifagnarake amy ty zoton’arofo i Jehovah. (Mat. 6:9-13) Faie ndra tie tsy toko’e hagnerekeregne rehake mitovy aza tikagne naho fa mivavake, le azontika atao ty magneregne mirehake ty hevetse fa nirehafentika.​—Mat. 7:7-11.

Misy anto’e soa areke mahavy ty Saontsin’Andrianagnahare magnerenkeregne rehake. Agnisa ty raike amy ty fomba fampianara i Mpampianatse Lahibeỳ antikagne zay, mba hahavy antikagne handrambe soa.​—Isaia 48:17, 18.